1 फेर इस्राएली लोके यहोवे री नजरा दे बुरा कित्तेया, इजी री खातर यहोवे सेयो मिधानी लोका री गुलामिया दे साता साला तक राखे। 2 ओर मिधानी लोक इस्राएली लोका पाँदे प्रबल ऊईगे। मिधानिया रे डरो रे मारे तिना ते बचणे रिया तँईं इस्राएली लोक पाह्ड़ा रे डूगे खड्डे, ओर गुफा ओर किलेया दे लूकी की रणे लगे। 3 इस्राएली लोक जेबे बी आपणे डोरूआ दे बेजा बाओ थे तेबे तिना रे दुश्मण मिधानी ओर अमालेकी लोक ओर पूर्वी लोक तिना खे लूटी लओ थे। 4 सेयो तेती इस्राएली लोका री जमीना दे डेरे लगाई की गाजा नाओं री जगा तक जमीना री सारी उपज नाश करी देयो थे ओर इस्राएली लोका खे ना तो खाणे खे कोई चीज, ना पेड-बाकरी, ना गाय-बल़द ओर ना ई गह्दा छाडो थे। 5 कऊँकि सेयो आपणे डांगर ओर डेरेया खे साथे लयी की टिड्डिया जेड़े बऊत आओ थे; ओर तिना रे ऊँट बी अणगिणत ओ थे; ओर सेयो देशो खे उजाड़ने खे तिना पाँदे अमला करेया करो थे। 6 जेबे मिधानिया रिया बजअ ते इस्राएली लोक बऊत दु:खी ऊईगे; तेबे तिने मतादा रिया तँईं यहोवे री दुहाई दित्ती। 7 जेबे इस्राएली लोके मिधानिया रिया बजअ ते रोई-रोई की यहोवे री दुहाई दित्ती। 8 तेबे यहोवे इस्राएली लोका गे एक नबी पेजेया, ओर तिने इस्राएली लोका खे बोलेया, "इस्राएलो रा यहोवा परमेशर ईंयाँ बोलोआ कि जेबे तुसे मिस्र देशो दे गुलाम थे तेबे मैं तुसे तेथा ते बारे निकयाल़ी की ल्याये थे। 9 मैं तुसे मिस्री लोका रिया गुलामिया ते, बल्कि जितणे तुसा पाँदे जुल्म करो थे, तिना सबी ते छुड़ाए ओर सेयो तुसा रे सामणे ते जबरदस्ती निकयाल़ी की तिना रा देश तुसा खे देईता। 10 ओर मैं तुसा खे बोलेया, ‘आऊँ तुसा रा यहोवा परमेशर ए; एमोरी लोक जिना रे देशो दे तुसे रओए तिना रे देवतेया री पूजा नि करनी।’ पर तुसे मेरा कईणा नि मानेया।"

11 तेबे परमेशरो रा स्वर्गदूत आयी की तेस बड़े डाल़ो निठे बैठी गा, जो ओप्रा नाओं री जगा दे अबीएजेर कुलो रे योआश नाओं रे माणूंए रा था। तेस बखते तेसरा पाऊ गिदोन अंगूरा रे रसकुण्डो दे कणक इजी खे चाड़ने लगी रा था ताकि तिजी खे मिधानिया ते लकोई की राखो। 12 परमेशरो रे स्वर्गदूते गिदोनो गे आई की बोलेया, "ओ शूरवीर सूरमा, यहोवा तां साथे ए।" 13 गिदोने तेसखे बोलेया, "ओ मेरे प्रभु, बुरा मत मानदा, जे यहोवा आसा साथे ऊँदा, तो आसा पाँदे यो सब मुसीबता कऊँ पड़नियां थिया? जितणे अचम्बे रे कामो रे बारे दे म्हारे बुजुर्ग ये बोलो थे कि यहोवा आसा खे मिस्र देशो ते छुड़ाई की ल्याया, पर सेयो काम आज नि ऊँदे। पर एबे तो यहोवे आसे छाडी ते रे ओर मिधानी लोका रे कब्जे दे करी ते रे।" 14 तेबे यहोवे तेसखे देखी की आपू बोलेया, "आपणी पूरी तागती साथे जा ओर तां इस्राएली मिधानी लोका रे आथो ते छुड़ाणे, कऊँकि ताखे पेजणे वाल़ा आऊँ ई अया।" 15 गिदोने तेसखे बोलेया, "ओ मेरे प्रभु, बुरा मत मानदा, आऊँ इस्राएली लोका खे नि छुड़ाई सकदा, कऊँकि मेरा कुल मनश्शे रे गोत्रो दे सबी ते कमजोर ए, ओर आऊँ आपणे बाओ रे कराने दे बी सबी ते छोटा ए।" 16 यहोवे तेसखे बोलेया, "पक्का मां तां साथे रणा, ओर जेड़ा एक कल्ला माणूं काणा आसान ए तिंयाँ ई तां सेयो मिधानी लोक काणे।" 17 गिदोने तेसखे बोलेया, "जे तेरी दया मां पाँदे ओ, तो माखे एतेरा कोई नशाण दखा कि तूँ यहोवा ई अया जो मां साथे गल्ला करने लगी रा। 18 जदुओ तक आऊँ तांगे फेर आई की आपणी पेंट निकयाल़ी की तां सामणे नि राखूँ, तदुओ तक तूँ एथा ते केथी नि जाया।" तिने बोलेया, "मां तेरे वापस आऊणे तक एथी रूके दे रणा।" 19 तेबे गिदोने जाई की बाकरिया रा एक बच्चा पकाया ओर कोई सोल़ा किलो* मैदे री बिना सजेड़े रिया रोटिया बणाईया, तेबे मास टोकरिया दे ओर तेतेरी तरी पतीले दे राखी की बड़े डाल़ो निठे तेसगे जाई की दित्तेया। 20 परमेशरो रे स्वर्गदूते तेसखे बोलेया, "मास ओर बिना सजेड़े रिया रोटिया लयी की एते पात्थरो पाँदे राखी दे ओर तरी लटी दे।" तिने तेड़ा ई कित्तेया। 21 तेबे यहोवे रे दूते आपणे आथो रा डण्डा आगे करी की मास ओर बिना सजेड़े रिया रोटिया छूँईंया; तेबे चट्टानी ते आग निकल़ी जेते कि मास ओर बिना सजेड़े रिया रोटिया स्वा ऊईगिया, तेबे यहोवे का स्वर्गदूत तेसरी नजरा ते दूर ऊई गा। 22 जेबे गिदोने ये जाणी ला कि से यहोवे रा स्वर्गदूत था, तेबे गिदोन बोलणे लगेया, "हाय, प्रभु यहोवा! आऊँ तो एबे जिऊँदा नि रणा कऊँकि मैं तो यहोवे रा स्वर्गदूत आपणिया आखी ते आपणे सामणे देखी राखेया।" 23 तेबे यहोवे तेसखे बोलेया, "डर नि, तूँ शान्त ऊई जा तूँ नि मरना।" 24 तेबे गिदोने तेती यहोवे री एक बेदी बणाई की तिजी रा नाओं यहोवा शलोम* राखेया। से आजो तक अबीएजेर कुलो रे ओप्रा जगा दे बणी री ए।

25 तेबे तेसा ई राती यहोवे गिदोनो खे बोलेया, "आपणे बाओ रे डांगरा बीचा ते एक साता साला रा बल़द लओ ओर बाल देवते री जो बेदी तेरे बाओ रिये, तेसा खे टाल़ी दे ओर जो अशेरा देविया रे नाओं रा लकड़िया रा खम्बा ए, तीजी खे बाडी दे; 26 ओर तेसा चट्टानी रिया चूँडिया पाँदे ठराई री रीतिया ते आपणे परमेशर यहोवे री एक बेदी बणा; तेबे तेस बल़दो खे बलि कर ओर तेस अशेरा नाओं रे खम्बे खे बाल़ी की तीजी पाँदे होमबलि करी की चढ़ा।" 27 तेबे गिदोने आपू साथे दस दास लयी की यहोवे रे वचनो रे मुताबिक कित्तेया। पर आपणे कअरो रे ओर शईरो रे लोका रे डरो रे मारे से काम दिने नि करी सकेया, पर तिने से काम राती कित्तेया।

28 शईरो रे लोक प्यागा उठी की क्या देखोए कि बाल देवते री बेदी टल़ी रिये ओर तेस साथली अशेरा रा खम्बा बाडी की पड़ी रा ओर बल़द बणाई री दूजिया बेदिया पाँदे चढ़ाया राए। 29 तेबे सेयो आपू बीचे बोलणे लगे, "ये काम किने कित्तेया?" जेबे तिने ठीक टंगो दे पूछताछ कित्ती, तेबे तिना खे किने बताया की ये योआशो रे पाऊ गिदोनो रा काम ए। 30 तेबे शईरो रे लोके योआशो खे बोलेया, "आपणे पाऊए खे बारे लई की आओ, ताकि से काया जाओ, कऊँकि तिने बालो री बेदी टाल़ी ती री ए ओर तेस साथला अशेरा रा खम्बा बी बाडीता रा ए।" 31 योआशे तिना सबी खे जो तेस सामणे खड़ी रे थे बोलेया, "तुसे बाल देवते रिया तँईं बईस करी की बाल देवते खे बचाणा चाओए? जो कोई बाल देवते रिया तँईं बईस करो तो से काया जाणा। प्यागा तक रूके रे रओ, तदुओ तक जे बाल देवता ईश्वर ओ, तो जिने तेसरी बेदी टाल़ी राखी तेस साथे से आपू ई आपणी बईस करो।" 32 इजी री खातर तेस दिने गिदोनो रा नाओं ये बोली की यरूब्बाल राखेया कि इने जो बाल देवते री बेदी टाल़ी राखी तो एसते बाल देवता आपू ई बदला लओ। 33 इजी ते बाद सब मिधानी ओर अमालेकी लोक ओर पूर्वी लोक कट्ठे ऊए ओर यरदन नदिया ते पार आई की यिज्रेलो री तराईया दे आपणे डेरे लगाए। 34 तेबे यहोवे रा आत्मा गिदोनो खे चलाणे लगेया ओर तिने नरसिंगा बजाया, तेबे अबीएजेर कुलो रे सब लोक तेसरी सुणने खे कट्ठे ऊए। 35 तेबे तिने सारे मनश्शे गोत्रो गे आपणे दूत पेजे ओर सेयो तेसरी मताद करने खे तेसगे कट्ठे ऊए। तेबे तिने आशेर, जबूलून ओर नप्तालिया रे गोत्रो रे लोका गे बी दूत पेजे; तेबे सेयो बी तिना री मताद करने खे तिना गे आए। 36 तेबे गिदोने परमेशरो खे बोलेया, "जे तां आपणे वचनो रे मुताबिक इस्राएल मेरे जरीये छुड़ाणा, 37 तो सुण, मां पेडा री कुछ ऊन खल्याणो दे राखणी ओर तेल़ बस तेते ऊना पाँदे ई पड़ो ओर तिजी खे छाडी की सारी जमीन सूकी रई जाओ, तो मां जाणी लणा कि तां आपणे वचनो रे मुताबिक इस्राएल मेरे जरीये छुड़ाणा।" 38 ओर तेबे एड़ा ई ऊआ। इजी री खातर जेबे तिने प्यागा उठी की तेसा ऊना खे पील्लेया, तेबे एक कटोरा पाणिए की परीगा। 39 तेबे गिदोने परमेशरो खे बोलेया, "जे आऊँ एक बार ओर बोलूँ, तो तूँ रोषे नि ऊणा, आऊँ एते ऊना रे जरीये एक ओर बार जाणना चाऊँआ कि बस ऊन ई सूकी रओ ओर सारी जमीना दे तेल़ पड़ो।" 40 एसा राती बी परमेशरे तेड़ा ई कित्तेया, मतलब बस ऊन ई सूकी रयी गी ओर तेतेरे चऊँ कनारे सारी जमीना दे तेल़ पड़ी।