निर्गमन 17

चट्टानी ते पाणी निकयाल़ना

1 तेबे इस्राएलिया री सारी मण्डल़ी सीन नाओं री सुनसाण जगा ते निकल़ी गी ओर यहोवे री आज्ञा रे मुताबिक तेथा ते चली की रपीदीमो*17:1 रपीदीमो मतलब राम करने री जगा रे तिने आपणे डेरे खड़े कित्ते; तेती तिना माणूंआ खे पीणे खे पाणी नि मिलेया।

2 तो सेयो लोक मूसे साथे बईस करी की बोलणे लगे, "आसा खे पीणे रा पाणी दे।" मूसे तिना खे बोलेया, "तुसे मां साथे कऊँ बईस करने लगी रे ओर यहोवे री परीक्षा कऊँ करोए?" 3 पर तेती माणूंआ खे बऊत त्याये लगी ओर सेयो ये बोली की मूसे पाँदे बड़बड़ाणे लगे, "ये क्या ए? क्या तूँ आसा खे बाल-बच्चे ओर डांगरा साथे त्याये मारने खे मिस्र देशो ते ल्याया।"

4 तेबे मूसे यहोवे ते मतादा रिया तँईं प्रार्थना कित्ती ओर बोलेया, "इना माणूंआ साथे आऊँ क्या करुँ? ये सब तो माखे पात्थर बाणे खे त्यार ए।"

5 यहोवे मूसे खे जबाब दित्तेया, "इस्राएलिया रे स्याणे माणूंआ बीचा ते कुछ लोका खे आपू साथे लई लो ओर जेते सोठिए की तैं नील नदिया पाँदे बाया था, तिजी खे बी आपणे आथो रे लई की माणूंआ रे आगे लई की चल। 6 देख आऊँ तांते आगे चली की होरेब पाह्ड़ो रिया एक चट्टानी पाँदे खड़े रा रऊँगा; ओर तैं तेसा चट्टानी पाँदे बाणी, तेबे तिजी बीचा ते जो पाणी निकल़ना से एसा सारिया मण्डल़िया पीणा।" तेबे मूसे इस्राएलो रे स्याणे माणूंआ री नजरा रे सामणे तेड़ा ई कित्तेया। 7 ओर मूसे तेसा जगा रा नाओं मस्सा*17:7 मस्सा मतलब परख ओर मरीबा*17:7 मरीबा मतलब शकाईत राखेया; कऊँकि इस्राएलिये तेती मूसे साथे बईस कित्ती थी ओर यहोवे री परीक्षा ये बोली की कित्ती कि क्या यहोवा आसा बीचे अया कि नई?

अमालेकिया ते जीतणा

8 तिजी ते बाद अमालेकी आई की रपीदीमो रे इस्राएलिया रे खलाफ लड़ने लगे।

9 तेबे मूसे यहोशूए खे बोलेया, "आसा खे कई मर्दा खे चूणी की छाँटी लओ ओर बारे जाई की अमालेकिया रे खलाफ लड़ ओर मां काल परमेशरो री सोठी आथो रे लई की पाह्ड़ो री चूँडिया पाँदे खड़ना।"

10 जेड़ी मूसे आज्ञा दित्ती ई तिजी रे मुताबिक यहोशू अमालेकिया रे खलाफ लड़ने लगेया ओर मूसा, हारूण ओर हूर पाह्ड़ो रिया चूँडिया पाँदे चढ़ीगे 11 ओर जदुओ तक मूसा आपणे आथ ऊबे चकी राखो था तदुओ तक तो इस्राएली जीतदे रओ थे; पर जेबे-जेबे से आपणा आथ थाले करो था तेबे-तेबे अमालेकी जीती जाओ थे। 12 जेबे मूसे रिया बांयी थकी गिया, तेबे हारूणे ओर हूरे एक पात्थर लई की मूसे रे थाले राखी ता ओर से तेते पाँदे बैठीगा, ओर हारूण ओर हूरे एकी-एकी तरफा ते तेसरी बांयी समाल़ी की राखिया ताकि तेसरे आथ सूरज डूबणे तक उठे रे रओ।

13 तेबे यहोशूए आपणे सैनिका साथे मिली की अमालेकी तलवारी साथे युद्ध करी की अराई ते।

14 एसा लड़ाईया ते बाद यहोवे मूसे खे बोलेया, "याद करी की अमालेकिया ते जीतणे री एसा गल्ला खे कताबा रे लिखी दे ओर यहोशूए खे सुणाई दे कि मां अमालेकी तरतिया पाँदा ते पुरिया तरअ ते नाश करी देणे।"

15 तेबे मूसे एक बेदी बणाई की तेसा रा नाओं यहोवा निस्सी*17:15 यहोवा निस्सी मतलब यहोवा मेरा झंडा ए राखेया; 16 फेर तिने बोलेया, "यहोवे वादा करी राखेया कि यहोवा अमालेकिया साथे पीढ़िया तक लड़दा रणा।"