निर्गमन 5

फिरौनो रे सामणे मूसा ओर हारूण

1 इजी ते बाद मूसा ओर हारूण फिरौनो गे आए ओर तिने तेसखे बोलेया, "इस्राएलो रा परमेशर यहोवा ईंयाँ बोलोआ कि मेरे लोका खे जाणे देओ, ताकि सेयो सुनसाण जगा रे मेरिया तँईं त्योआर करो।"

2 ये गल्ल सुणी की फिरौने ईंयाँ बोलेया, "ये यहोवा अया कुण कि आऊँ तेसरा वचन मानी की इस्राएलिया खे जाणे देऊँ? आऊँ यहोवे खे नि जाणदा ओर मां इस्राएली लोक पनि जाणे देणे।"

3 तिने बोलेया, "इब्रिया रा परमेशर आसा खे मिलेया। इजी री खातर आसा खे सुनसाण जगा रे तिंऊँ दिना रे सफरो रे आपणे परमेशर यहोवे खे बलिदान चढ़ाणे खे जाणे दे, एड़ा नि ओ कि से आसा पाँदे मरी फैलाओ या तलवार चलवाओ।"

4 तेबे मिस्रो रे राजे तिना खे बोलेया, "ओ मूसा, ओ हारूण, तुसे कऊँ माणूंआ ते काम छुड़ाणा चाओए? तुसे जाई की आपणे बेकारो रे कामो रे लगी जाओ।" 5 फेर फिरौने बोलेया, "सुणो, एते देशो रे सेयो लोक बऊत ऊईगे रे, तेबेई तो तुसे तिना री मईणता ते राम दलाणा चाओए!"

फिरौनो रे जरीये लोका खे सजा

6 फिरौने तेसी दिने तिना मईणत करने वाल़ेया खे ओर तिना रे सरदारा खे ये आज्ञा दित्ती, 7 "तुसे जो एबुओ तक ईटा बनाणे खे माणूंआ खे पराल़ देया करो थे, से आगे नि देणा; सेयो आपू ई जाई की आपू खे पराल़ कट्ठा करो। 8 तेबे बी तिना खे जितणिया ईटा एबुओ तक बनाणियां पड़ो थिया तिथणिया ई आगे बी तिना ते बनवाणियां, ईटा री गिणती कटाणी नि, कऊँकि सेयो आल़सी ए, इजी बजअ ते सेयो ये बोली की चिंगोए, ‘आसे जाई की आपणे परमेशरो खे बलिदान चढ़ाऊँए।’ 9 तिना माणूंआ ते ओर बी कठण काम कराओ, ताकि सेयो तिदे मईणत करदे रओ ओर चूठी गल्ला पाँदे त्यान नि देओ।"

10 तेबे लोका ते मईणत करवाणे वाल़ेया ओर सरदारे बारे जाई की इस्राएलिया खे बोलेया, "फिरौन ईंयाँ बोलोआ कि मां तुसा खे पराल़ नि देणा। 11 तुसेई जाई की जेती केथी बी पराल़ मिलो तेथा ते कट्ठा करी की ली आओ, पर तुसा रा काम बिल्कुल पनि कटाया जाणा।"

12 इजी री खातर सेयो लोक सारे मिस्र देशो रे ओरे-पोरे ऊईगे, ताकि पराल़ो रे बदले कानी कट्ठी करो। 13 मईणत करवाणे वाल़े ये बोली-बोली की तिना साथे जल्दबाजी करदे रये कि जिंयाँ तुसे पराल़ ऊँदे ऊए बी काम करेया करो थे तिंयाँ ई आपणा रोजका काम एबे बी पूरा करो। 14 इतणा ई नि जो इस्राएली फिरौनो रे मईणत कराने वाल़ेया तिना लोका पाँदे सरदार ठराए थे, सेयो मिस्रो रे मईणत करवाणे वाल़ेया कूटे बी ओर तिना ते पूछेया, "क्या बजअ कि तुसे आपणी ठराई री ईटा रिया गिणतिया रे मुताबिक पईले जेड़ी काल ओर आज पूरी नि कित्ती?"

15 तेबे इस्राएलिया रे सरदारे जाई की फिरौनो गे आथ जोड़ी की बोलेया, "तूँ आपणे दासो साथे एड़ा बर्ताव कऊँ लगी रा करने? 16 तेरे दासा खे पराल़ तो देंदे ई नि ओर सेयो आसा खे बोलदे रओए कि ईटा बणाओ, ईटा बणाओ, एड़ा बोली की तेरे दासा खे कुटणे लगी रे; पर देखेया जाओ तो दोष तेरे ई लोका राए।"

17 पर फिरौने बोलेया, "तुसे आल़सी ए, पूरे आल़सी; इजी बजअ ते बोलोए कि आसा खे यहोवे खे बलिदान करने खे जाणे दे। 18 एबे जाई की आपणा काम करो ओर तुसा खे कोई पराल़ नि मिलणा, पर ईटा री गिणती पूरी करनी पड़नी।"

19 जेबे इस्राएलिया रे सरदारे ये गल्ल सुणी कि तिना री ईटा री गिणती नि कटणी ओर हर रोज तिथणा ई काम करना पड़ना, तेबे तिना खे पता लगेया कि तिना रे मुसीबता रे दिन आईगे रे। 20 जेबे सेयो फिरौनो रे सामणे ते बारे निकल़ी की आईगे, तेबे मूसा ओर हारूण, जो तिना ते मिलणे खे खड़ी रे थे, तिना खे मिले। 21 तेबे तिने मूसा ओर हारूणो खे बोलेया, "यहोवा तुसा पाँदे नजर करी की न्याय करो, कऊँकि तुसे आसे फिरौनो रिया ओर तेसरे काम करने वाल़ेया रिया नजरा रे बुरे ठराई की आसा खे मरवाणे खे तिना रे आथो रे तलवार देई राखी।"

मूसे री परमेशरो ते शकाईत

22 तेबे मूसे यहोवे गे वापस जाई की बोलेया, "ओ यहोवा, तैं इना लोका साथे एड़ी बुराई कऊँ कित्ती ओर तैं आऊँ एती कऊँ पेजेया? 23 जदुओ ते आऊँ तेरे नाओं ते फिरौनो गे गल्ला करने खे गया तदुओ ते तिने इना लोका साथे बुरा ई बर्ताव करी राखेया ओर तैं आपणे लोका रा कोई छुटकारा बी नि कित्तेया।"