निर्गमन 35

रामो रा दिन मनाणे रा नियम

1 मूसे इस्राएलिया री सारी मण्डल़ी कट्ठी करी की तिना खे बोलेया, "यहोवे जिना कामा खे करने री आज्ञा देई राखी सेयो यो ए। 2 छे दिना तक तो काम काज करेया करना, पर सातुआ दिन तुसा खे पवित्र ओर यहोवे खे पवित्र रामो रा दिन ठईरो, तेस दिने जो कोई माणूं काम काज करो से जरूर काया जाणा; 3 बल्कि रामो रे दिने तुसे आपणे-आपणे कअरो रे आग तक नि बाल़नी।"

पवित्र तम्बूए खे पेंट

4 तेबे मूसे इस्राएलिया री सारी मण्डल़िया खे बोलेया, "जेसा गल्ला री आज्ञा यहोवे देई राखी से ये ए। 5 तुसा गे जो कुछ बी अए तिजी बीचा ते यहोवे खे पेंट लई जाओ। हर कोई जो आपणी इच्छा ते देणा चाओ, सेयो यहोवे री पेंट करी की इना चीजा खे मतलब सूईना, चाँदी, पीतल़ ली आओ, 6 नीले, बैंगणी ओर लाल रंगो रा टाल्ला ओर लीलणो रे टाल्ले ओर बाकरिया रे बाल़, 7 लाल रंगो रे रंगी रिया खाडूआ री खाला, बाकरेया री खाला ओर बबूल नाओं रे डाल़ो री लकड़ी,

8 "प्रयासा देणे खे जैतूनो रा तेल, अभिषेको रा तेल बनाणे खे चीजा ओर तूपो खे खुशबूदार चीजा,

9 "तेबे छातिया पाँदे पईनणे वाल़ी झिलम ओर एपोदो पाँदे लगाणे खे सुलैमानी पात्थरा री मणि ओर दूजी किमती मणि। 10 तुसा सबी बीचा ते जितणे बी काम करने रे कारीगर ए सेयो सारे आयी की जिना-जिना चीजा री आज्ञा यहोवे देई राखी तिना सबी खे बणाओ।"

11 मतलब मिलणे वाल़ा तम्बू, तम्बूए पाँदला टक्कण, तिजी री खूँडी, तख़्ते, डण्डे, खम्बे ओर पावे;

12 फेर वाचा रा सन्दूक, डण्डेया समेत दया रा आसण ओर तिजी पाँदे टकणे वाल़ा बीचला पर्दा,

13 मेज ओर तिजी रे डण्डेया समेत सारा समान ओर पेंटा रिया रोटिया;

14 प्रयासा देणे वाल़े दिऊए समेत तिजी खे राखणे री फट्टी ओर प्रयासा देणे खे तेल।

15 डण्डेया समेत तूपबेदी, अभिषेको रा तेल, खुशबूदार तूप ओर मिलणे वाल़े तम्बूए रे द्धारो रा पर्दा;

16 डण्‍डे समेत होमबलिया री बेदी, पीतल़ी री छानणी ओर पावे समेत पीतल़ी री अऊदी;

17 आँगणो रे पड़दे ओर तिना रे खम्बेया समेत पावे ओर आँगणो रे द्धारो रे पड़दे;

18 मिलणे वाल़े तम्बूए खे ओर तिजी रे आँगण दुँईं रे खूँडे ओर तिजी खे बानणे वाल़िया रस्सिया;

19 पवित्र जगा रे सेवा-टईल करने खे बेल-बूटे कढ़ाई कित्ते रे टाल्ले ओर पुरोईतो रा काम करने खे हारूण पुरोईतो रे पवित्र टाल्ले ओर तेसरे पाऊआ रे टाल्ले बी जेबे सेयो पुरोईतो रा काम करने लगो।

इस्राएली लोका रे जरीये पेंट ल्याऊणी

20 तेबे मूसे रे ये सब बोलणे ते बाद इस्राएलिया री सारी मण्डल़ी मूसे रे सामणे ते आपणे डेरे रे चली गी। 21 ओर जितणेया री ईम्मत ऊई ओर जितणेया रे मनो रे एड़ी इच्छा जागी थी, सेयो सब मिलणे वाल़े तम्बूए रे काम करने ओर तिजी री सारी सेवकाई ओर पवित्र टाल्ले बनाणे खे यहोवे री पेंट ल्याऊणे लगे। 22 क्या जवाणस, क्या मर्द, जितणेया रे मनो रे एड़ी इच्छा जागी सेयो सारे जुगनू, कोका, बाल़िया, छाप ओर बांगा बगैरा सूईने रे गईणे ल्याऊणे लगे, ईंयाँ जितणे माणूं यहोवे खे सूईने री एड़ी पेंट देणे वाल़े थे सेयो सारे तिना खे लईगे।

23 ओर जेस-जेस मर्दो गे नीले, बैंगणी ओर लाल रंगो रे टाल्ले, लीलणो रा टाल्ला, बाकरिया रे बाल़, लाल रंगो रे रंगी री खाडूआ री खाल या बाकरेया री खाल थी सेयो तिना खे ली आए।

24 फेर जितणे चाँदी या पीतल़ी री पेंट देणे वाल़े थे सेयो यहोवे खे तेड़ी ई पेंट ली आए ओर जेस-जेस गे बबूलो री लकड़ी कोई कामो री थी, सेयो तिजी खे ली आए।

25 ओर जितणिया जवाणसा बुणने री कारीगरी जाणो थिया सेयो आपणे आथो साथे नीले, बैंगणी ओर लाल रंगो रे तागेया ते ओर अच्छे लीलणो रे तागेया ते टाल्ले बुणी की ली आईया। 26 ओर जितणी जवाणसा बुणाई करने रे अक्लमंद ओर काम करने रे खुश थिया, तिने बाकरिया रे बाल़ बी काते।

27 ओर इस्राएली मण्डल़िया रे सारे परदान लोक पुरोईतो रा पईनणे वाल़ा एपोद ओर छातिया पाँदे पईनणे वाल़ी झिलमा पाँदे लगाणे खे सुलैमानी पात्थरा री मणि ओर दूजी किमती मणि ली आए। 28 सेयो प्रयासा देणे खे जैतूनो रा तेल ओर तूपो री खुशबूदार समग्री ओर अभिषेको रे तेलो रे मिलाणे खे खुशबूदार चीजा ली आए। 29 जिना-जिना चीजा खे बनाणे री आज्ञा यहोवे मूसे रे जरीये दित्ती थी, तिजी खे जो कुछ जरूरी था, से सेयो सारे मर्द ओर जवाणसा ली आईया, जिना रे मनो रे एड़ी ई इच्छा जागी थी। ईंयाँ इस्राएली यहोवे खे आपणी-आपणी इच्छा ते पेंट ली आए।

पवित्र तम्बू बनाणा

30 तेबे मूसे इस्राएलिया खे बोलेया, "सुणो, यहोवे यहूदा रे गोत्रो वाल़े बसलेल नाओं रे माणूंए खे चूणी राखेया, जो ऊरीए रा पाऊ ओर हूरो रा पोता ए। 31 ओर से परमेशरो री बुद्धि, समज, परविणता, ज्ञान ओर सब प्रकारा री कारीगरिया री समज देणे वाल़ी आत्मा ते परिपूर्ण करी राखेया। 32 कि से एते बुद्धिया ते परी की सूईने, चाँदी ओर पीतल़ी रे कारीगरिया रे काम करी सको। 33 तेसरी कारीगरी मणि कटणे रे ओर लकड़िया पाँदे नक्काशी करने रे, बल्कि सब केड़िया चीजा पाँदे कलाकारी करने री थी।"

34 यहोवे तेसखे ओर दानो रे गोत्रो रे अहीसामाको रे पाऊ ओहोलीआब नाओं रे माणूंए खे बी एड़ी समज देई राखी की से ओरी खे बी शिक्षा देई सको। 35 यहोवे इना दुँईं रा मन एड़ी अक्ला साथे परीता कि सेयो नक्काशी करने, कढ़ने, ओर नीले, बैंगणी ओर लाल रंगो रे तागेया ते ओर लीलणो रे टाल्लेया रे कढ़ाई करने खे बल्कि सब केड़ी बणावटा रे कारीगर ओर दमाको साथे काम निकयाल़ने रे, सब केड़े काम करो।