निर्गमन 33

सीनै पाह्ड़ो ते चलणे री आज्ञा

1 तेबे यहोवे मूसे खे बोलेया, "तूँ तिना लोका खे जिना खे मिस्र प्रदेशो ते निकयाल़ी की ली आयी रा, तिना खे साथे लई की तेस देशो रे जा, जेतेरे बारे दे मैं अब्राहम, इसहाक ओर याकूबो साथे कसम खाई की बोलेया था, ‘मां से प्रदेश तुसा रे वंशो खे देणा’ 2 ओर मां तांते आगे-आगे एक संदेशा देणे वाल़ा दूत पेजणा ओर कनानी, एमोरी, हित्ती, परिज्जी, हिब्बी ओर यबूसी जातिया रे लोक जबरदस्ती निकयाल़ी देणे। 3 तुसे लोक तेते देशो रे जाओ जो सच्चो खेई बऊत ई पजणे वाल़ा ए; पर तुसे टीठ ए, इजी बजअ ते मां तुसा बीचे ऊई की नि चलणा, एड़ा नि ओ कि आऊँ बाटा रेई तुसा रा अन्त करी देऊँ।" 4 ये बुरी खबर सुणी की सेयो लोक दु:खी ऊणे लगे ओर किने बी आपणे गईणे नि पईने। 5 कऊँकि यहोवे मूसे खे बोलेया था, "इस्राएली लोका खे ये बोल कि तुसे लोक तो टीठ ए; जे आऊँ तुसा बीचे ऊई की थोड़ी जी देरा खे बी चलूँगा, तो आँऊ तुसा रा अन्त करी सकूँआ। इजी री खातर एबे आपणे-आपणे गईणे आपणे अंगो ते उतारी देओ, ताकि आऊँ जाणूं कि तुसा साथे क्या करना चाईयो।" 6 तेबे इस्राएली लोक होरेब पाह्ड़ो गे आपणे गईणे उतारी की आगे चलणे लगे।

मिलणे वाल़ा तम्बू

7 एबे मूसा तम्बूए खे डेरे ते बारे बल्कि थोड़ी दूर खड़ा करेया करो था ओर तिजी खे मिलणे वाल़ा तम्बू बोलो था ओर जो कोई यहोवे खे टोल़ो था से डेरे ते बारे मिलणे वाल़े तम्बूए गे चली जाओ था।

8 जेबे-जेबे मूसा तम्बूए गे जाओ था, तेबे-तेबे सब लोक उठी की आपणे-आपणे डेरे रे द्धारो पाँदे खड़े ऊई जाओ थे ओर जदुओ तक मूसा तेते तम्बूए दे नि चली जाओ था, तदुओ तक तेसखे देखदे रओ थे। 9 जेबे मूसा तेते तम्बूए रे जाओ था, तेबे एक एड़ा बादल़ जेतेरा आकार खम्बे जेड़ा था उतरी की तम्बूए रे द्धारो पाँदे ठईरी जाओ था ओर यहोवा मूसे साथे गल्ला करने लगी जाओ था। 10 ओर जेबे कदी लोक बादल़ो रे खम्बे खे तम्बूए रे द्धारो पाँदे रूकेया रा देखो थे, तेबे सब लोक उठी की आपणे-आपणे डेरे रे द्धारो पाँदा ते माथा टेको थे। 11 ओर यहोवा मूसे साथे ईंयाँ आमणे-सामणे गल्ला करो था, जिंयाँ कोई आपणे गईरे दोस्तो साथे गल्ला करोआ। तिजी ते बाद मूसा डेरे रे फेर वापस ऊई जाओ था, पर यहोशू नाओं रा एक जवान, जो नूनो रा पाऊ ओर मूसे रा सेवक था, से तम्बूए ते नि निकल़ो था।

मूसे खे यहोवे री महिमा रा दर्शण

12 ओर मूसे यहोवे खे बोलेया, "सुण, तैं माखे बोलेया कि इना लोका खे लई चल, पर एड़ा नि बताया कि तां मां साथे कुण पेजणा। तेबे बी तैं बोली राखेया, ‘आँऊ ताखे ठीक टंगो ते जाणूंआ ओर तां पाँदे मेरी दया-दृष्टि ए।’ 13 ओर एबे जे तेरी दया री दृष्टि मां पाँदे ओ, तो माखे आपणी बाट समजयाई दे, जेते कि आँऊ जाणी सकूँ, ईंयाँ आगो खे तेरी दया-दृष्टि मां पाँदे बणी री रओ ओर एते प्रदेशो रे लोक जो तेरे लोक ए तिना री बी सम्माल़ लओ।"

14 यहोवे बोलेया, "मां आपू तां साथे चलणा ओर ताखे राम देणा।"

15 तेबे मूसे यहोवे खे बोलेया, "जे तूँ आसा साथे मौजूद नि रओगा, तो आसे एथा ते आगे नि निणे। 16 कोई बी ये किंयाँ जाणी सकोआ कि तेरी दया-दृष्टि मां पाँदे ओर तेरे लोका पाँदे अए जदुओ तक तूँ आसा साथे नि चलो? ओर क्या चीज ए जेते कि आऊँ ओर तेरी प्रजा रे लोक पूरी तरतिया रे सबी लोका ते लग ठईरो?"

17 तेबे यहोवे मूसे खे बोलेया, "मां सेई करना जो तैं माखे बोली राखेया; कऊँकि मेरी दया-दृष्टि तां पाँदे ए ओर आँऊ ताखे ठीक टंगो ते जाणूंआ।"

18 तेबे मूसे परमेशरो खे बोलेया, "एबे माखे आपणा तेज दखाई दे।" 19 तेबे परमेशरे उतर दित्तेया, "मां तां सामणे ऊई की चलदे ऊए ताखे आपणी सारी पलाई दखाणी ओर तां सामणे आपणा यहोवे रे नाओं रा प्रचार करना ओर जेस पाँदे आऊँ दया करना चाऊँ, तेस पाँदे दया करनी ओर जेस पाँदे कृपा करना चाऊँ तेस पाँदे कृपा करनी।" 20 फेर तिने बोलेया, "तूँ मेरे मुंए रा दर्शण नि करी सकदा; कऊँकि माणूं मेरे मुंए रा दर्शण करी की जिऊँदा नि रयी सकदा।" 21 ओर यहोवे बोलेया, "देख, मांगे एक जगा ए, तूँ तेते चट्टानी पाँदे खड़ा ऊई जा 22 ओर जदुओ तक मेरा तेज तां सामणे ऊई की चलदा रओगा, तदुओ तक मां तूँ चट्टानी री दरारी रे राखणा ओर जदुओ तक आऊँ तेरे सामणे ते नि निकल़ी जाऊँगा, तदुओ तक मां तूँ आपू आथो साथे टकी की राखणा। 23 फेर मां आपणा आथ चकी लणा, तेबे तूँ मेरिया पीठी रा दर्शण तो करी सकेया, पर मेरे मुंए रा दर्शण नि करी सकदा।"