1 तेबे मूसे जबाब दित्तेया, "इस्राएलिया मेरा विश्वास नि करना ओर ना तिना मेरी सुणनी ओर बोलणा कि यहोवे ताखे दर्शण निए दित्तेया रा।" 2 यहोवे तेसखे बोलेया, "तेरे आथो रे ये क्या ए?" तिने बोलेया, "ये एक सोठी* ए।"

3 तेबे परमेशर यहोवा तेसखे बोलेया, "इजी खे जमीना पाँदे राखी दे।" जेबे तिने से सोठी जमीना पाँदे राखी तेबे से साप बणीगी ओर मूसा तेसरे सामणे ते नठीगा। 4 यहोवे मूसे खे बोलेया, "आथ बढ़ा ओर तेसरी पूँछ पकड़ी लो। तिने आथ बढ़ाई की से पकड़ेया तेबे से तेसरे आथो रे फेर सोठी बणीगी। 5 ताकि सेयो लोक तेरा विश्वास करो कि तुसा रे पितर अब्राहम, इसहाक ओर याकूबो रे परमेशर यहोवा ताखे दर्शण दित्ते।"

6 तेबे यहोवे मूसे खे दुबारा बोलेया, "आपणा आथ छातिया पाँदे राखी की टकी दे।" तेबे तिने आपणा आथ छातिया पाँदे राखी की टकी ता; फेर जेबे तिने से निकयाल़ेया तेबे देखेया कि तेसरा आथ कोढ़ो साथे बर्फा जेड़ा सफेद ऊईगा था।

7 तेबे यहोवे फेर बोलेया, "तूँ आपणा आथ छातिया पाँदे फेर राखी की टकी दे।" तेबे तिने आपणा आथ छातिया पाँदे राखी की टकी ता ओर जेबे तिने से छातिया पाँदो ते टाया तेबे तिने देखेया कि से तो फेर सारे शरीरो जेड़ा ऊईगा।

8 फेर यहोवे बोलेया, "जे सेयो लोक तेरिया गल्ला पाँदे फेर बी विश्वास नि करोगे ओर पईले चिह्नो खे नि मानो, तेबे तिना दूजे चिह्नो पाँदे विश्वास करना। 9 ओर जे सेयो इना दुँईं चिह्ना रा बी विश्वास नि करोगे ओर तेरी गल्ला खे नि मानो, तेबे तैं नील नदिया ते थोड़ा जा पाणी लणा ओर सूकी जमीना पाँदे सेटी देणा ओर जो पाणी तां नदिया ते निकयाल़ना से सूकी जमीना पाँदे खून बणी जाणा।" *

10 मूसे यहोवे खे बोलेया, "ओ मेरे यहोवा, आऊँ बोलणे रे काबिल निए, ना पईले था ओर ना जदुओ ते तूँ आपणे दासो साथे जपणे लगेया, मेरी जबान तोतल़ी ए ओर मेरे बोल कमजोर ए।"

11 यहोवे तेसखे बोलेया, "माणूंआ रा मूँ किने बणाई राखेया ओर माणूंआ खे गूँगा या टऊणा ओर देखणे वाल़ा ओर अन्दा, मां यहोवे खे छाडी की कुण बणाई सकोआ? 12 एबे जा, मां तेरे मुंए साथे ऊई की जो तां बोलणा ओगा से ताखे सखांदे जाणा।"

13 मूसे बोलेया, "ओ मेरे यहोवा, मईरबानी करी की तूँ केसी ओरी माणूंए खे पेज।" 14 तेबे यहोवे रा कोप मूसे पाँदे पड़केया ओर तिने बोलेया, "क्या तेरा पाई लेवी गोत्रो रा हारूण निए? माखे तो निश्चा ए कि से बोलणे रे काबिल ए ओर से मिलणे खे बी आऊणे लगी रा ओर ताखे देखी की मनो रे खुश ऊणा। 15 इजी री खातर तूँ तेसखे इना गल्ला सिखाया ओर मां तेसरे मुंए साथे ओर तेरे मुंए साथे ऊई की जो कुछ तुसा करना ओगा ओर से तुसा खे सखांदे जाणा। 16 तेस तेरिया तरफा ते लोका साथे गल्ला करेया करनिया; ओर तूँ तेसखे परमेशरो जेड़ा रणा। 17 ओर तू एसा सोठिया खे आथो रे लई जा ओर इजी साथे ई यो चिह्न दखाणे।"

18 एकी दिने मूसा आपणे सऊरे यित्रो गे गया ओर तेसखे बोलेया, "माखे मईरबानी करी की जाणे दे कि आऊँ मिस्रो रे रणे वाल़े आपणे पाईया गे जाई की देखूँ कि सेयो जिऊँदे कि नई।" तेबे यित्रे बोलेया, "ठीक ए, मजे साथे जा।"

19 ओर एड़ा ऊआ जेबे मूसा मिद्यान देशो रे था तेबे यहोवे तेसखे बोलेया, "मिस्रो खे वापस ऊई जा, कऊँकि जो माणूं तेरे प्राण लणा चाओ थे सेयो सब मरीगे रे।"* 20 तेबे मूसा परमेशरो री सोठिया खे आथो रे लई की आपणी लाड़िया खे ओर बच्चेया खे गह्देया पाँदे चढ़ाई की मिस्र देशो रिया तरफा खे वापस ऊआ।

21 यहोवे मूसे खे बोलेया, "जेबे तूँ मिस्रो रे आए तेबे सावधान ऊई जाया, ओर जो अचम्बे रे काम करने री सामर्थ मैं ताखे देई राखी तिजी की सेयो सब फिरौनो गे दखाणे; पर मां तेसरा मन टीठ करना ओर तेस मेरी प्रजा जाणे नि देणी।* 22 तेबे तैं फिरौनो खे बोलणा, ‘यहोवा ईंयाँ बोलोआ कि इस्राएलो रे लोक मेरे जेठे पाऊए जेड़े ए 23 ओर आऊँ जो ताखे बोली चुकेया रा कि मेरे पाऊए खे जाणे दे, ताकि से मेरी सेवा करो ओर तैं से एबुए तक जाणे नि दित्तेया, इजी बजअ ते मां एबे तेरा जेठा पाऊ कायी देणा।’ "

24 तेबे एड़ा ऊआ कि बाटा रे संरायी रे यहोवा मूसे खे मिलेया ओर तिने से काणा चाया। 25 तेबे सिप्पोरे एक पैना पात्थर लई की आपणे पाऊए रा खतना कित्तेया ओर बाडी री चामड़ी मूसे रे पैरा पाँदे ये बोली की सेटी ती कि पक्का तूँ खून बाह्णे वाल़ा मेरा लाड़ा ए। 26 तेबे परमेशरे से छाडीता ओर तेस ई बखते खतने रिया बजअ ते तेसे बोलेया, "तूँ खून बाह्णे वाल़ा लाड़ा ए।"

27 तेबे यहोवे हारूणो खे बोलेया, "मूसे खे मिलणे सुनसाण जगा रे जा।" तेबे से चली गा ओर परमेशरो रे पाह्ड़ो रे तेसखे मिलेया ओर तेसरे गल़े लगेया। 28 तेबे मूसे हारूणो खे ये बताया कि यहोवे क्या-क्या गल्ला बोली की से पेजी राखेया ओर कुण-कुण चिह्न दखाणे री आज्ञा तेसखे देई राखी। 29 तेबे मूसे ओर हारूणे जाई की इस्राएलिया रे सारे स्याणे कट्ठे कित्ते। 30 ओर जितणिया गल्ला यहोवे मूसे साथे कित्तिया थिया, सेयो सब हारूणे तिना खे सुणाईयां ओर लोका सामणे सेयो चिह्न बी दखाए। 31 तेबे लोके तिना पाँदे विश्वास कित्तेया ओर ये सुणी की कि परमेशरे इस्राएलिया री सम्बाल़ लई ओर तिना रे दु:ख देखी राखे, तिने सिर थाले करी की माथा तेकेया। *