मूसे रा आपणे सऊरे ते मिलणा
1 जेबे मिद्यान देशो रे पुरोईते यित्रो जो मूसे रा सऊरा था ये सुणेया कि परमेशरे मूसा ओर आपणी प्रजा इस्राएलिया खे क्या-क्या करी राखेया ओर किंयाँ यहोवे इस्राएली मिस्रो ते निकयाल़ी की ल्याये। 2 तेबे मूसे रा सऊरा यित्रो मूसे री लाड़ी सिप्पोरा खे, जो मूसे पईले ई आपणे बाओ रे करो खे पेजी री थी, 3 ओर तेसा रे दुँईं पाऊआ खे बी ली आया; इना बीचा ते एकी पाऊए रा नाओं मूसे ये बोली की गेर्शोम18:3 गेर्शोम मतलब परदेशी राखेया, "आऊँ दूजे देशो रे परदेशी ऊई रा।" 4 ओर दूजे पाऊए रा नाओं तिने ये बोली की एलीएजेर18:4 एलीएजेर मतलब मेरा परमेशर मेरा मददगार ए राखेया, "मेरे बाओ रे परमेशरे मेरा मतदगार ऊई की आऊँ फिरौनो री सेना ते काणे ते बचाया।"
5 जेती सुनसाण जगा रे परमेशरो रे पाह्ड़ो रे नेड़े मूसे ओर इस्राएली लोके डेरा पायी राखेया था तेती मूसे रा सऊरा यित्रो तेसरी लाड़ी ओर तेसरे दुँईं माठेया खे ली आया। 6 ओर तिने मूसे गे एक माणूं पेजी की सन्देशा पेजेया, "आऊँ तेरा सऊरा यित्रो ए ओर तेरे दुँईं माठेया ओर तेरी लाड़िया खे तांगे ली आई रा।"
7 मूसा ये खबर सुणी की आपणे सऊरे साथे मिलणे खे डेरे ते बारे निकल़ेया ओर तेसगे माथा टेकी की तेसरे गल़े लगेया ओर सेयो आपू बीचे सुख-साँद पूछदे ऊए डेरे गे आए। 8 तेती मूसे आपणे सऊरे गे कि यहोवे इस्राएलिया रिया तँईं फिरौन ओर मिस्रिया साथे क्या-क्या कित्तेया ओर इस्राएलिया खे बाटा रे क्या-क्या कष्ट ऊए, तेबे यहोवा तिना खे किंयाँ-किंयाँ छुड़ांदा आई रा, यो सब गल्ला बताईया।
9 यहोवे री तेसा पलाईया री गल्ल सुणी की कि तिने इस्राएली मिस्रिया रे वशो ते छुड़ाए, यित्रो खुश ऊईगा ओर बोलेया, 10 "तन्य ए यहोवा, जिने तुसे मिस्रो रे राजा फिरौनो रे वशो ते छुड़ाए ओर जिने तुसे मिस्रिया री गुलामिया ते छुड़ाए। 11 एबे मैं जाणी ला रा कि यहोवा सबी देवतेया ते महान् ए; बल्कि तिजी रे बारे दे बी जिदे मिस्रिए इस्राएलिया ते कमण्ड करी की बर्ताओ कित्तेया था।" 12 तेबे मूसे रे सऊरे परमेशरो खे होमबलि ओर मेलबलि चढ़ाए, तेबे हारूण इस्राएलिया रे सबी स्याणेया समेत मूसे रे सऊरे यित्रो साथे परमेशरो रे आगे रोटी खाणे खे आया।
मूसे खे तेसरे सऊरे री सलाह्
13 दूजे दिने मूसा लोका रा न्याय करने खे बैठेया ओर प्यागा ते साँजा तक लोक मूसे रे नेड़े-तेड़े खड़े रे रये। 14 ये देखी की कि मूसा लोका खे क्या-क्या करोआ, तेसरे सऊरे बोलेया, "ये क्या काम ए जो तूँ लोका खे करेया? क्या बजअ ए कि तूँ कल्ला एक न्याय करने वाल़े जेड़ा बैठेया रा रएया ओर लोक प्यागा ते साँजा तक तेरे नेड़े-तेड़े खड़े रे रओए?"
15 तो मूसे आपणे सऊरे खे बोलेया, "लोक मांगे परमेशरो री इच्छा जाणने खे आओए। 16 ओर जेबे कदी तिना बीचे चगड़ा ओआ, तेबे सेयो मांगे आओए ओर आऊँ तिना बीचे न्याय करूँआ ओर परमेशरो रे बिदी-बिधान तिना खे समजयाऊँआ?"
17 तेबे मूसे रे सऊरे तेसखे बोलेया, "तूँ जो काम करने लगी रा, से अच्छा निया। 18 कऊँकि इजी ते तूँ ओर यो लोक बी जो तां साथे ए पक्का थकी जाणे ओर ईंयाँ बी ये काम ताखे बऊत पारी ए; तूँ इजी खे कल्ला नि करी सकदा। 19 इजी री खातर एबे मेरी सुणी लओ, आऊँ ताखे सलाह देऊँआ ओर परमेशर तां साथे रओ। तूँ तो इना लोका रिया तँईं परमेशरो सामणे जाया कर ओर इना रे मकद्दमेया खे परमेशरो गे पऊँचाया कर। 20 इना खे परमेशरो रे बिदी-बिधान बताई-बताई की, जेते बाटा रे इना खे चलणा ए ओर जो-जो काम इना करने ओ, तिना इना खे समजयाई देया कर। 21 पर पईले तूँ इना सबी इस्राएली मर्दा बीचे एड़े मर्दा खे छाँटी लो, जो कामयाब, परमेशरो रा डर मानणे वाल़े, सच्चे ओर अन्याय ते नफरत करने वाल़े ओ ओर इना खे ह्जार-ह्जार, 50-50 ओर 10-10 माणूंआ पाँदे परदान ठराई दे। 22 यो सब इना लोका रा न्याय करेया करोगे ओर सब मुश्किल गल्ला खे तो तांगे ल्याया करो ओर छोटिया-छोटिया गल्ला रा न्याय आपू ई करेया करो कऊँकि ये बोज तिना बी तां साथे चकणा, तेबे तेरा बोज अल्का ऊणा। 23 जे तूँ ये उपाय करे ओर परमेशर ताखे एड़ी आज्ञा देओ, तेबे तूँ एते दबाव ते बची सकेया ओर यो लोक शान्तिया रे आपणी जगा रे पऊँची सकणे।"
24 तेबे तिने आपणे सऊरे री ये सलाह मानी की तेसरी गल्ला रे मुताबिक कित्तेया। 25 ईंयाँ मूसे इस्राएली लोका बीचा ते कामयाब माणूं चूणे ओर सेयो लोका रे मुखिया बणाए। सेयो ह्जार-ह्जार, 100-100, 50-50 ओर 10-10 लोका पाँदे परदान ठराए।
26 तेबे सेयो सब लोका रा हर बखत न्याय करने लगे; ओर जो गल्ला कठण ओ थिया, तिजी खे सेयो मूसे गे ली आओ थे ओर सबी छोटी-छोटी गल्ला रा न्याय सेयो आपू ई करेया करो थे। 27 तेबे मूसे आपणा सऊरा बिदा कित्तेया ओर से आपणे देशो खे चलीगा।