1 इस्राएलो रे पाऊआ रे नाओं, जो आपणे-आपणे कराने खे लई की याकूबो साथे मिस्र देशो रे आए, यो ए 2 मतलब रूबेन, शिमोन, लेवी, यहूदा, 3 इस्साकार, जबूलून, बिन्यामीन, 4 दान, नप्ताली, गाद ओर आशेर। 5 यूसुफ तो मिस्र देशो रे पईले ई आईगा था। याकूबो रे आपणे वंशो रे जो पैदा ऊए सेयो सारे 70 लोक थे।*

6 यूसुफ ओर तेसरे सब पाई ओर तेसा पीढ़िया रे सब माणूं मरीगे।* 7 पर इस्राएलो री ल्वाद बढ़ने लगी ओर सेयो बऊत सामर्थी ऊँदे गये ओर सेयो इतना बढ़ीगे कि तिना साथे सारा देश परी गा।

8 बऊत साला ते बाद मिस्रो रे दूजा राजा गद्दिया पाँदे राज करने खे बैठेया जो यूसुफो खे नि जाणो था।* 9 ओर राजे आपणी प्रजा रे लोका खे बोलेया, "देखो, इस्राएली लोक आसा ते गिणतिया रे बऊत जादा ओर सामर्था रे तागतबर ऊईगे रे। 10 इजी खे आओ, आसे चलाकिया साथे तिना साथे बर्ताव करिए केथी एड़ा नि ओ कि सेयो बऊत बढ़ी जाओ ओर युद्धो रे बखते आसा रे खलाफ आसा रेया दुश्मणा ते मिली की आसा ते लड़ो ओर एस देशो ते निकल़ी जाओ।" 11 इजी री खातर तिने तिना पाँदे मजदूरी कराणे वाल़े परदान ठराए, ताकि सेयो तिना पाँदे कामो रा बोज पाई-पाई की तिना खे दु:ख देया करो। तेबे तिने फिरौनो खे पितोम ओर रामसेस नाओं रे पण्डार वाल़े शईर बणाए। 12 पर जिंयाँ-जिंयाँ सेयो मिस्रो रे लोक इस्राएलिया खे दु:ख देंदे गये, तिंयाँ-तिंयाँ सेयो बढ़दे ओर फैलदे गये, इजी री खातर सेयो इस्राएलिया ते बऊत डरीगे। 13 तेबे बी मिस्रिए इस्राएलिया ते सख्तिया साथे काम करवाया 14 ओर तिना री जिन्दगी गारे, ईट ओर जिम्मीदारे रे कई प्रकारा रे कामो री कठण सेवा साथे दु:खी करवाई ती; जेस केसी कामो रे सेयो तिना ते सेवा करवाओ थे, सेयो तिना साथे सख्त बर्ताव करो थे।

15 शिप्रा ओर पूआ नाओं रिया दो इब्री दाईया खे मिस्रो रे राजे आज्ञा दित्ती, 16 "जेबे तुसे इब्री जवाणसा खे बच्चा पैदा करदे बखते जमाणे रे पात्थरो पाँदे बैठी रिया देखो, तेबे जे पाऊ ओ तो से कायी देणा ओर जे बेटी ओ तो जिऊँदी राखी देणी।" 17 पर सेयो दाईया परमेशरो रा डर मानो थिया ओर सेयो मिस्रो रे राजे री आज्ञा ना मानी की माठेया खे बी जिऊँदा राखी देओ थिया। 18 तेबे मिस्रो रे राजे तिना खे बुलाई की पूछेया, "तुसे जो तिना पाऊआ खे जिऊँदा छाडी देओईया, तो एड़ा कऊँ करोईया?"* 19 दाईये फिरौनो खे जबाब दित्तेया, "इब्रिया रिया जवाणसा मिस्रिया रिया जवाणसा जेड़िया निए, सेयो एड़िया फुर्तिलिया ए कि दाईया रे पऊँचणे ते पईले ई तिना रे बच्चा पैदा ऊई जाओआ।" 20 इजी री खातर परमेशरे दाईया साथे पलाई कित्ती ओर सेयो इस्राएली लोक गिणतिया रे बढ़ी की बऊत सामर्थी ऊईगे। 21 कऊँकि सेयो दाईया परमेशरो रा डर मानो थिया, इजी खे परमेशरे तिना खे ल्वाद दित्ती ओर तिना रे कअर बसाए*। 22 तेबे फिरौने आपणी सारी प्रजा रे लोका खे आज्ञा दित्ती, "इब्रिया रे जितणे पाऊ पैदा ओ, तिना सबी खे तुसे नील नदिया रे सेटी देओ पर सब बेटिया जिऊँदिया छाडी देणियां।"*