1 तेबे तिने नीले, बैंगणी ओर लाल रंगो रे तागेया ते कढ़ाई कित्ते रे टाल्ले पवित्र जगा री सेवकाईया खे बणाए ओर ईंयाँ ई हारूणो खे बी पवित्र टाल्ले बणाए, जिंयाँ यहोवे मूसे खे आज्ञा दित्ती थी।

2 ओर तिने सूईने रा एपोद, नीले, बैंगणी ओर लाल रंगो रे तागेया रा ओर अच्छे ते बूणे रे लीलणो रे टाल्लेया रा बणाया। 3 ओर तिने सूईना कूटी-कूटी की तिजी रे पत्तर बणाए, तेबे पत्तरेया खे कटी-कटी की डोरी बणाई ओर तिना डोरिया रे जरीये नीले, बैंगणी ओर लाल रंगो रे तागेया ते ओर लीलणो रे टाल्लेया रे कढ़ाईया करी की मलाई ते।

4 एपोदो खे जोड़ने खे तिने तिजी रे कान्दा पाँदे बन्दन बणाए ताकि तिना दुँईं सिरेया खे जोड़ी सको 5 एपोदो पाँदे जो कढ़ाई कित्तेया रा पटका था तिजी री बुणाई तिजी जेड़ी बणाई ओर सेयो दोनो बिना जोड़ो रे बणाए ओर जो सूईने, नीले, बैंगणी ओर लाल रंगो रे तागेया ते बुणेया रा लीलणो रे टाल्लेया रा बणेया, जेड़ा यहोवे मूसे खे बोलेया तेड़ा तिने कित्तेया। 6 ओर तिदे तिने सुलैमानी पात्थरा री मणि कटी की तिना रे इस्राएलो रे पाऊआ रे नाओं जिंयाँ छापा खुदवाया जाओआ तिंयाँ ई खुदवाणे ओर सूईने रे खाँचेया रे जड़ी ते। 7 फेर तिने सेयो एपोदो री कान्दा रे बन्दना पाँदे लगाए, ताकि सेयो इस्राएलिया खे याद करने वाल़े मणि ठईरो, जेड़ी यहोवे मूसे खे आज्ञा दित्ती थी।

8 बसलेल ओर तेस साथे काम करने वाल़ेया छातिया पाँदे पईनणे वाल़ी झिलम बी एपोदो जेड़ी सूईने साथे नीले, बैंगणी ओर लाल रंगो रे तागेया ओर ठीक टंगो रे बूणे रे लीलणो रे टाल्लेया रे बेल-बूटे रा काम कित्ते री बणाई। 9 छातिया पाँदे पईनणे वाल़ी झिलम तो चौरस बणी ओर तिने से दोरी बणाई ओर से दोरी ऊई की से एक गिर्ठ लाम्बी ओर एक गिर्ठ चौड़ी बणाई।

10 ओर तिने चऊँ पाल़िया रे मणि लगाए। पईली पाल़िया रे माणिक्य, पुखराज ओर लालड़ी लगाए; 11 ओर दूजी पाल़िया रे मरकत, नीलमणि ओर ईरा लगाया; 12 ओर तीजी पाल़िया रे लशम, सूर्यकांत ओर नीलम लगाए; 13 ओर चौथी पाल़िया रे फिरोजा, सुलैमानी पात्थरा री मणि ओर यशब लगाए; यो सारे लग-लग सूईने रे खाँचेया रे लगाए।

14 ओर यो मणिया इस्राएलो रे पाऊआ रे नाओं री गिणतिया रे मुताबिक बारा थिया; बारा गोत्रा बीचा ते एकी-एकी रा नाओं तिना पाँदे खुदवाई राखेया था।

15 ओर तिने छातिया पाँदे पईनणे वाल़ी झिलमा पाँदे रस्सिया जेड़ी बाटी री शुद्ध सूईने री माल़ा बणाई की लगाई; 16 तेबे तिने सूईने रे दो खांचे ओर सूईने रे दो कड़े बणाई की दोनो कड़े छातिया पाँदे पईनणे वाल़ी झिलमा रे दुँईं सिरेया पाँदे लगाए। 17 फेर तिने तिना दुँईं कड़ेया रे रस्सिया जेड़ी गूँदी री सूईने री जंजीर छातिया पाँदे पईनणे वाल़ी झिलमा रे सिरेया पाँदे लगाई। 18 ओर दुँईं जंजीरा रे दोनो सिरे तिने एपोदो रे सामणे दुँईं कान्दा रे बन्दनो पाँदे लगाए। 19 ओर तिने सूईने रे दो ओर कड़े बणवाई की छातिया पाँदे पईनणे वाल़े झिलमो रे दुँईं सिरेया पाँदे एपोदो रे पीतरली तरफा खे लगाए। 20 ओर तिने सूईने रे ओर दो कड़े बणाए ओर एपोदो री दुँईं कान्दा रे बन्दनो पाँदे थाला ते एपोदो रे सामणे ओर जोड़ो गे, एपोदो रे कढ़ाई कित्ते रे पट्टके पाँदे लगाए। 21 तेबे तिने छातिया पाँदे पईनणे वाल़ी झिलम तिजी रे कड़ेया रे जरीये एपोदो रे कड़ेया रे नीली डोरिया साथे एड़ा बानेया कि से एपोदो रे पट्टके पाँदे रओ ओर छातिया पाँदे पईनणे वाल़ी झिलम एपोदो ते लग नि ऊई सको; जेड़ी यहोवे मूसे खे आज्ञा दित्ती थी।

22 तेबे एपोदो रा पूरा चोगा नीले रंगो रे तागेया साथे बूणे रे टाल्ले ते बणाया। 23 ओर से एड़ा बणेया कि तिजी रे गल़े रे एक छेद था ओर छेदो रे चऊँ कनारे बूणी री एक पट्टी थी जेते कि से फटी नि सको। 24 ओर तिने तिजी रे थालले केरे रे नीले, बैंगणी ओर लाल रंगो रे तागेया ते लीलणो रे टाल्ले रे अनार बणाए। 25 ओर तिने शुद्ध सूईने रिया कंटिया बी बणाई की चोगे रे थालले केरे रे चऊँ कनारे अनारा रे बीचो-बिछिए लगाईया। 26 मतलब तेते चोगे रे थालले केरे रे चऊँ कनारे एक सूईने री कंटी ओर अनार लगाया, फेर एक सूईने री कंटी ओर अनार लगाया ताकि तिना खे पईनी की सेवा-टईल करो, जेड़ी यहोवे मूसे खे आज्ञा दित्ती थी।

27 तेबे तिने हारूण ओर तेसरे पाऊआ खे ठीक टंगो रे बूणी की लीलणो रे टाल्ले बणाए, 28 ओर ठीक टंगो रे बूणे रे लीलणो रे टाल्ले री पगड़ी, टोपिया ओर निकरा 29 जेड़ी यहोवे मूसे खे आज्ञा दित्ती थी तेड़ा ई पटका बी ठीक टंगो ते बुणेया रा लीलणो रे टाल्ले रे नीले, बैंगणी ओर लाल रंगो रे तागेया ते बूटेदार कढ़ाई कित्ते रा बणाया।

30 तेबे तिने पवित्र मुकुटो री पट्टी शुद्ध सूईने री पत्तिया री बणाई ओर तिदे यो अक्षर खुदवाई की छापे यहोवे खे पवित्र। 31 ओर तिने तिदे नीली डोरी लगाई, जेते कि से ऊबे पगड़िया पाँदे रओ, जेड़ी यहोवे मूसे खे आज्ञा दित्ती थी।

32 ईंयाँ मिलणे वाल़े तम्बूए रा सारा काम खत्म ऊआ ओर जेस-जेस कामो री आज्ञा यहोवे मूसे खे दित्ती थी, इस्राएलिये तिजी रे मुताबिक ई कित्तेया। 33 तेबे सेयो मिलणे वाल़े तम्बूए खे ओर तिजी रे सारे समानो खे मूसे गे ली आए, मतलब तिजी री खूँडी, तख़्ते, डण्डे, खम्बे, पावे बगैरा सारे समानो समेत तम्बू; 34 ओर लाल रंगो रे रंगी री खाडूआ री खाला रा टकणा, बाकरेया री खाला रा टकणा ओर बीचला पर्दा, 35 डण्डेया समेत गवाईया रा सन्दूक ओर दया रा आसण; 36 सारे समानो समेत मेज ओर पेंटा री रोटिया, 37 शुद्ध सूईने री दिऊए राखणे री फट्टी, तिजी रे दिऊए ओर प्रयासा देणे खे तेल; 38 सूईने री बेदी, अभिषेको रा तेल, खुशबूदार तूप ओर मिलणे वाल़े तम्बूए रे द्धारो रा पड़दा; 39 पीतल़ी री छानणी ओर तिजी रे डण्डे ओर सारे समानो समेत पीतल़ी री बेदी ओर पावे समेत अऊदी। 40 आँगणो रे पड़दे, खम्बे ओर पावेया समेत ओर आँगणो रे द्धारो रा पड़दा, रस्सिया, खूँडे ओर मिलणे वाल़े तम्बूए री सेवकाईया रा समान; 41 पवित्र जगा रे सेवा-टईल करने खे बूणे रे बेल-बूटे री कढ़ाई कित्ते रे टाल्ले, जो हारूण पुरोईतो रे पवित्र टाल्ले ओर तेसरे पाऊआ रे टाल्ले जिना खे पईनी की तिना पुरोईतो रा काम करना था। 42 यहोवे जो आज्ञा मूसे खे दित्ती थी तिजी रेई मुताबिक इस्राएलिये सारे काम कित्ते। 43 तेबे मूसे सारे कामो री जाँच करी की देखेया कि तिने यहोवे री आज्ञा रे मुताबिक सब कुछ करी राखेया। तेबे मूसे तिना खे आशीर्वाद दित्तेया।