1 फेर बेदी बबूलो री लकड़िया री पाँज आथ लाम्बी ओर पाँज आथ चौड़ी बनवाणी; बेदी चौरस ऊणी चाईयो ओर से तीन आथ ऊच्ची ऊणी चाईयो। 2 ओर तिजी रे चारो कूणेया पाँदे चार सींग बनवाणे; ताकि सेयो सींग ओर बेदी एक ई लकड़िया रे टुकड़े रे बणो ओर से पीतल़ी साथे मढ़वाणे।

3 ओर तेतेरी स्वा चकणे खे पांडे फरूए, छिड़कणे खे कटोरे, मास निकाल़ने खे कांडे ओर गीठिया बनवाणियां; तिजी रा सारा समान पीतल़ी रा बनवाणा।

4 ओर तिजी रे पीतल़ी री जाल़िया री एक छानणी बनवाणी ओर तिजी रे चऊँ सिरेया पाँदे पीतल़ी रे चार कड़े लगवाणे। 5 ओर से जाल़ी बेदिया रे चऊँ कनारली कंगणिया निठे एड़ी लगवाणी कि से बेदिया री ऊचाईया रे बीचे रओ।

6 बेदिया खे बबूलो री लकड़िया रे डण्डे बनवाणे ओर सेयो पीतल़ी साथे मढ़वाणे। 7 ओर डण्डे कड़ेया रे पाये जाओ ताकि जेबे बेदी चकी जाओ तेबे सेयो तिजी खे दुँईं कनारेया ते पकड़ी सको। 8 बेदी तख़्तेया साथे खोखली बनवाणी; जेड़ी से ताखे पाह्ड़ो पाँदे दखाई राखी।

9 फेर मिलणे वाल़े तम्बूए री जगा रे आँगणो खे बणाओ। आँगणो री दक्खणा री तरफा खे लीलणो रे टाल्लेया रे बणे रे पड़दे ऊणे चाईयो ओर तिना री लम्बाई एकी तरफा खे 100 आथो री ऊणी चाईयो।

10 तिना रे 20 खम्बे ओर इना खे पीतल़ी रे 20 पावे बणो। पर खम्बेया रे कुण्डे ओर तिना खे जोड़ने वाल़ी पट्टिया चाँदिए रिया ऊणिया चाईयो।

11 ओर तेड़े ई आँगणो रे उत्तरो रिया तरफा री लम्बाईया रे बी 100 आथ लाम्बे पड़दे ऊणे चाईयो ओर तिना रे बी 20 खम्बे ओर इना खे बी पीतल़ी रे बीई पावे ऊणे चाईयो ओर तिना खम्बेया रे कुण्डे ओर पट्टिया चाँदिए रिया ओ।

12 तेबे आँगणो री चौड़ाईया रे पश्चिमो रिया तरफा खे 50 आथो रे पड़दे ऊणे चाईयो, तिना रे खम्बे 10 ओर पावे बी 10 ऊणे चाईयो।

13 पूर्वो रिया तरफा खे बी आँगणो री चौड़ाई 50 आथो री ओ। 14 ओर आँगणो रे द्धारो रे एकी तरफा खे पंद्रा आथो रे पड़दे ऊणे चाईयो ओर तिजी रे तीन खम्बे ओर तीन पावे ऊणे चाईयो। 15 आँगणो रे द्धारो री दूजी तरफा खे बी पंद्रा आथो रे पड़दे बणे रे ओ ओर तिना खे तीन खम्बे ओर तीन पावे ऊणे चाईयो।

16 आँगणो रे द्धारो खे एक पर्दा बनवाणा, जो नीले, बैंगणी ओर लाल रंगो रे तागेया ते लीलणो रे टाल्ले पाँदे बेल-बूटे री कढ़ाई कित्ते रा 20 आथो रा ऊणा चाईयो। तिजी रे खम्बे चार ओर पावे बी चार ऊणे चाईयो। 17 आँगणो रे चऊँ कनारेया रे खम्बे चाँदिए री पट्टिया साथे जुड़े रे ऊणे चाईयो, तिना रे कुण्डे चाँदिए रे ओर पावे पीतल़ी रे ऊणे चाईयो। 18 आँगणो री लम्बाई 100 आथो री ओर चौड़ाई बराबर 50 आथो री ओर पड़दे पाँज आथ ऊच्चे लीलणो रे टाल्लेया रे बणे रे ओ ओर खम्बेया रे पावे पीतल़ी रे ऊणे चाईयो। 19 मिलणे वाल़े तम्बूए रे इस्तेमाल ऊणे वाल़े सबी प्रकारा रे पांडे, सारा समान, तम्बू गडणे रे सब खूँडे ओर आँगणो रे बी सारे खूँडे पीतल़ी रेई ऊणे चाईयो।

20 तेबे तैं इस्राएलिया खे आज्ञा देणी कि मांगे दिऊए खे बाल़ने खे कोलूए रे पड़यायी की निकयाल़े रा जैतूनो रा साफ तेल लई आऊणा, ताकि दिऊआ सदा बल़दा रओ।

21 मिलणे वाल़े तम्बूए रे, तेस बीचले पड़दे ते बारे जो गवाईया रे सन्दूको ते आगे ऊणा, हारूण ओर तेसरे पाऊ दिऊए खे साँजा ते प्यागा तक परमेशरो सामणे बाल़ी की राखो। ये रवाज इस्राएलिया री पीढ़िया खे सदा बणी री रणी।