निर्गमन 30

तूप बाल़ने री बेदी

1 यहोवे मूसे ते गल्ला करदे ऊए बोलेया, "तैं बबूलो री लकड़िया री तूपबेदी बी बनाणी। 2 तिजी री लम्बाई ओर चौड़ाई एक-एक आथो री ओ ओर से चौरस ऊणी चाईयो, से दो आथ ऊच्ची ओ ओर तिजी रे सींग बी तिजी रे टुकड़े की बणाए जाओ। 3 ओर तूप बेदिया पाँदले पल्ले, चऊँ तरफा रे कुणे ओर सींगो समेत से बेदी शुद्ध सूईने साथे मढ़वाणे, इजी रे चारो कनारे सूईने री एक बाड़ बनाणा। 4 ओर एते बेदिया री बाड़ा ते थाले एतेरे आमणे-सामणे रे दुँईं पल्लेया रे सूईने रे दो-दो कड़े बणाई की लगाणे ताकि तिना कड़ेया रे डण्डे लगाई की बेदिया खे चकी सको।"

5 बबूलो री लकड़िया ते डण्डे बणाई की सेयो सूईने ते मढ़ने। 6 तैं से तूपबेदी पड़दे रे आगे राखणी जेती वाचा रे सन्दूक ओर दया रा आसण ए, मतलब प्राश्चित वाल़े टकणे रे आगे जो गवाईया रे सन्दूको पाँदे ए, मां ताखे तेथी मिलेया करना।

7 हारूण हर रोज प्यागा रे बखते जेबे से दिऊए खे ठीक करो तेबे खुशबूदार तूप बेदिया पाँदे बाल़ेया करो। 8 साँजा रे बखते जेबे हारूण दिऊए खे बाल़ो तेबे खुशबूदार तूप बाल़ेया करो ताकि तूप यहोवे रे सामणे तुसा री पीढ़िया-पीढ़िया तक हमेशा बाल़ेया जाओ। 9 तेते बेदिया पाँदे तुसे ओरी चीजा रा तूप नि बाल़ना ओर ना तेते पाँदे होमबलि ओर नज्जो री बलि पेंट चढ़ाणी; ओर ना ई तेते पाँदे अर्घ देणा। 10 सालो रे एक बार हारूण प्राश्चितो री पापबलिया रे खूने की बेदिया रे सींगो पाँदे खून लटी की लोका रिया तँईं प्राश्चित करो ओर तुसा री पीढ़िया-पीढ़िया रे सालो रे एक बार प्राश्चित करेया जाओ, ये यहोवे खे परम पवित्र ए।

प्राणो रे प्राश्चितो रा रपईया

11 ओर तेबे यहोवे मूसे खे बोलेया, 12 "जेबे तूँ इस्राएलिया री गिणती करने लगो, तेबे तेरे गिणने रे बखते जिना री गिणती ऊईगी ओ आपणे-आपणे प्राणो रिया तँईं यहोवे रे सामणे प्राश्चित देओ, जेते कि जेबे तूँ तिना री गिणती करने लगी रा, तेस बखते कोई मुसीबत तिना पाँदे नि आओ। 13 जितणे लोक गिणे जाओ सेयो पवित्र जगा रे शेकेलो रे मुताबिक आदा शेकेल देओ ये शेकेल बीई गेरा रा ओआ, यहोवे री पेंट साढे पाँज ग्राम ओ।"

14 बी साला रे या तिजी ते जादा उम्रा रे जितणे गिणे जाओ तिना बीचा ते एक-एक जणा यहोवे री पेंट देओ। 15 जेबे तुसा रे प्राणो रे प्राश्चिता रिया तँईं यहोवे री पेंट चढ़ाई जाओ, तेबे ना तो अमीर लोक साढे पाँज ग्रामो ते जादा देओ ओर ना गरीब लोक तिजी ते कम देओ। 16 तैं इस्राएलिया ते प्राश्चित करने रा पैसा लई की मिलणे वाल़े तम्बूए रे कामो रे लगाणा; जेते कि से यहोवे रे सामणे इस्राएलिया खे याद करने खे चिह्न ठईरो ओर प्राणो रा प्राश्चित बी ओ।

पीतल़ी री अऊदी

17 यहोवे मूसे खे बोलेया, 18 "तैं आथ-पैर तोणे खे पीतल़ी री अऊदी बनाणी ओर तिजी रा पावा बी पीतल़ी रा बनाणा ओर से मिलणे वाल़े तम्बू ओर बेदिया बीचे राखी की तिदे पाणी परी देणा। 19 ओर तिदे हारूण ओर तेसरे पाऊ आपणे-आपणे आथ पैर तोया करो। 20 जेबे सेयो मिलणे वाल़े तम्बूए रे आओ, तेबे सेयो आपणे आथ-पैर तेते पाणिए साथे तोया करो ताकि सेयो मरी नि जाओ ओर जेबे सेयो बेदिया गे सेवा-टईल करो, मतलब यहोवे खे आगी रे चढ़ाई री बलि बाल़ने खे आओ, तेबे बी सेयो आथ-पैर तोओ ताकि सेयो मरी नि जाओ। 21 हारूण ओर तेसरे वंशो खे आऊणे वाल़ी पीढ़िया-पीढ़िया तक ये सदा री बिदी ठईरो।"

अभिषेको रा तेल

22 फेर यहोवे मूसे खे बोलेया, 23 "तैं खरे ते खरे खुशबूदार मसाले लणे, मतलब पवित्र जगा दे शेकेलो रे मुताबिक पाँज सौ शेकेल आपणे आपू निकल़ेया रा जैतूनो रा तेल ओर तिजी रा आदा मतलब टाई सौ शेकेल खुशबूदार दाल़चीनी ओर टाई सौ शेकेल बलसान नाओं रा खुशबूदार अगर, 24 ओर पाँज सौ शेकेल खुशबूदार तेजपता ओर चार लीटर जैतूनो रा तेल लई की 25 तिना सबी खे मिलाई की अभिषेको रा पवित्र तेल बणाओ, जेतेरी गन्धो री रीतिया ते त्यार कित्तेया रा खुशबूदार तेल बणो, ये अभिषेको रा पवित्र तेल ठईरो। 26 फेर तेस खुशबूदार तेलो साथे मिलणे वाल़े तम्बूए रा ओर गवाईया रे सन्दूको रा, 27 ओर मेज ओर तिजी रे सारे समानो समेत ओर समानो साथे दिऊए रा ओर तूपो री बेदिया रा, 28 ओर सारे समानो समेत होमबलिया री बेदिया रा ओर तीजी रे सारे पांडेया रा ओर अऊदी ओर तिजी खे खड़ा करने वाल़े पावेया रा अभिषेक करना। 29 तैं सेयो पवित्र करनिया, जेते कि सेयो परम पवित्र ठईरो ताकि जो कुछ तिना साथे छवांओगा, से बी पवित्र ऊई जाणा।"

30 तैं हारूण ओर तेसरे पाऊआ रा अभिषेक करना ताकि सेयो मेरिया तँईं पवित्र ऊई की पुरोईतो रा काम करी सको।

31 ओर इस्राएलिया खे मेरी ये आज्ञा सुनाणी कि ये तेल तुसा री पीढ़िया ते पीढ़िया तक मेरिया तँईं पवित्र अभिषेको रा तेल ऊणा। 32 ये खुशबूदार तेल केसी ओरी माणूंआ रे शरीरो रे नि लगाणा; इजी खे तुसे बी ये पवित्र मानणा कऊँकि ये तेल पवित्र ठराई राखेया ओर मिलावटा खे तिजी जेड़ा ओर कुछ नि बनाणा। 33 जो कोई तेस जेड़ा ओर कुछ खुशबूदार तेल बणाओगा या पुरोईतो ते अलावा तिजी बीचा ते पराये कुलो रे आदमिए पाँदे लगाओ तो से माणूं आपणे लोका बीचा ते निकाल़ी देणा चाईयो।

पवित्र खुशबूदार मसाले

34 तेबे यहोवे मूसे खे बोलेया, "तैं गंधरस, नखी ओर कुन्दरू, ये खुशबूदार मसाले साफ लोबानो समेत ली आऊणे, यो सब एक बराबर ऊणे चाईयो, 35 ओर इना चीजा रा जिंयाँ एक गन्धी इत्र बणोआ तिंयाँ इदे लूण मलाई की खुशबूदार तूप बनाणा जो शुद्ध ओर पवित्र ओ। 36 तुसे तिजी बीचा ते कुछ पीसी की बरिक करी की मिलणे वाल़े तम्बूए रे, गवाईया रे सन्दूको ते आगे, जेती मां ताखे मिलेया करना तेती राखणा; ये तुसा खे बऊत पवित्र ऊणा। 37 ओर जो तूप तां बनवाणा, एते खुशबूदार तूपो रे मलाऊट करी की तिजी जेड़ा तुसे आपू खे कुछ नि बनाणा; तुसे ये यहोवे खे पवित्र राखणा। 38 जो कोई सिंगणे खे मजे रिया तँईं तिजी जेड़ा तूप बणाओगा, से आपणे लोका बीचा ते निकाल़ी देणा चाईयो।"