1 तेबे परमेशरे ये सब वचन बोले, 2 "आऊँ तेरा परमेशर यहोवा ए, जो ताखे मिस्र प्रदेशो ते गुलामिया ते निकयाल़ी की ल्याया। 3 तैं माखे छाडी की कोई ओर परमेशर करी की नि मानणा। 4 तूँ आपू खे जो सर्गो रे ए या तरतिया रे ए या तरतिया रे पाणिए रे ए, केसी बी चीजा री मूर्ति खणी की नि बणाया। 5 तैं तिना गे माथा नि टेकणा ओर ना ई तिना री पूजा करनी; कऊँकि आऊँ तेरा परमेशर यहोवा जल़न राखणे वाल़ा परमेशर ए ओर जो मां साथे बैर राखोए आऊँ तिना रे माठेया, पोतेया ओर पड़पोतेया खे पितरा री सजा देऊँआ, 6 पर जो कोई मां साथे प्यार राखोआ ओर मेरी आज्ञा खे मानोआ तिना री ह्जारा पीढ़िया पाँदे आऊँ दया करेया करूँआ। 7 तैं आपणे परमेशरो रा नाओं बेकार नि लणा; कऊँकि जो यहोवे रा नाओं बेकार लओगा सेयो यहोवे निर्दोष नि ठराणे। 8 तूँ रामो रे दिनो खे पवित्र मानणे खे याद राखेया। 9 छे दिन तो तैं मईणत करी की आपणा सारा काम-काज करना; 10 पर सातुआ दिन तेरे परमेशर यहोवे खे रामो रा दिन ए। तिदे ना तो तैं कोई काम-काज करना, ना तेरे पाऊ, ना तेरी मुन्नी, ना तेरे दास, ना तेरी दासी, ना तेरे डांगर ओर ना कोई परदेशी जो तेरे समाजो रे ए, कोई बी केसी बी किस्मा रा काम नि करो।

11 "कऊँकि छे दिना रे यहोवे सर्ग बणाया, तरती, समुद्र ओर जो कुछ तिदे ए सब बणाए ओर सातुए दिने राम कित्तेया; इजी बजअ ते यहोवे रामो रे दिनो खे आशीष दित्ती ओर से पवित्र ठराया। 12 तैं आपणे माये बाओ री इज्जत करनी ताकि जो देश तेरा परमेशर यहोवा ताखे देओआ, तेते देशो रे तूँ बऊत दिनो तक जिऊँदा रई सके। 13 तैं अत्या नि करनी। 14 तैं व्याभिचार नि करना। 15 तैं चोरी नि करनी। 16 तैं केसी रे खलाफ चूठी गवाई नि देणी। 17 तैं केसी रे कअरो री चीजा रा लाल़च नि करना; ना तो केसी री जवाणसा रा लाल़च करना ओर ना केसी रे दास-दासिया रा ओर ना गह्दे, बल़दा रा, ना केसी री किजी बी चीजा रा लाल़च करना।"

18 जेबे लोके बादल़ा रा गरजणा, बिजल़िया रा चमकणा ओर रड़सिंगे री आवाज सुणी ओर पाह्ड़ो ते तुआँ उठदे ऊए देखेया तेबे सेयो ये देखी की डरो रे मारे थरथरांदे ऊए दूर खड़े ऊईगे। 19 ओर सेयो मूसे खे बोलणे लगे, "तूँई आसा साथे गल्ला कर, तेबे तो आसे सुणी सकूँए, पर परमेशर आसा साथे गल्ला नि करो, एड़ा नि ओ कि आसे मरी जाऊँ।"

20 मूसे लोका खे बोलेया, "डरो नि; कऊँकि परमेशर इजी खे आयी रा कि से तुसा री परीक्षा करो ओर तेसरा डर तुसा रे मनो रे बणेया रा रओ, ताकि तुसे पाप नि करो।" 21 ओर सेयो लोक दूर ई खड़े रे रये, पर मूसा तेस अन्दकूप न्हेरे रे नेड़े गया जेती परमेशर था।

22 तेबे यहोवे मूसे खे बोलेया, "तूँ इस्राएलिया खे मेरे ये वचन सुणा कि तुसे लोके आपू देखी राखेया कि मैं तुसा साथे सर्गो ते गल्ला करी राखिया। 23 तुसे सूईने या चाँदिए रे देवते नि बनाणे केथी एड़ा नि ओ कि तुसे माखे पूली की तिना मूर्तिया री पूजा शुरू करी देओ। 24 मेरिया तँईं माट्टिया री एक बेदी बनाणी की तिजी पाँदे आपणी पेडा-बाकरिया री ओर गाय-बल़दा री होमबलि ओर मेलबलि चढ़ाणी, जेती-जेती आऊँ आपणे नाओं री याद कराऊँ, तेती-तेती आयी की मां तुसा खे आशीष देणी। 25 ओर जे तुसे माखे पात्थरो री बेदी बणाओगे, तो कडे़ रे पात्थरो री नि बनाणा, कऊँकि जेती तुसे तेते पाँदे आपणा ज्वार लगाई की कोई कारीगरी कित्ती तेती तुसा से अशुद्ध करी देणी 26 ओर मेरी बेदिया पाँदे संगाओ साथे कदी नि चढ़ना, केथी एड़ा नि ओ कि तेरा तन तेते पाँदे नांगा दिशो।"