1 मिस्रो रे लोका रा समुद्रो रे डूबणे ते बाद मूसे ओर इस्राएली लोके यहोवे खे ये गीत गाया। तिने बोलेया,

"मां यहोवे रिया तँईं गीत गाणा,

कऊँकि तिने नऊखे तरीके ते जीत पाई राखी;

तिने कोड़ेया समेत सवार समुद्रो रे पाईते रे।

2 यहोवा मेरी तागत ओर सामर्थ ए,

सेई माखे बचाणे वाल़ा ए,

मेरा परमेशर सेईए,

मां तेसरी तारीफ करनी,

मेरे बुजुर्गो रा परमेशर सेईए,

मां तेसरी सराईणा करनी।

3 यहोवा सेई योद्धा ए जिने आँऊ

मिस्रिया ते बचाया;

तेसरा नाओं यहोवा ए।

4 फिरौनो रे रथ ओर तेसरी सेना यहोवे समुद्रो रे डबोई ती;

ओर तेसरे खरे ते खरे रथी लाल समुद्रो रे डूबी गे।

5 डूगे पाणिए सेयो टखी ते;

सेयो पात्थरो जेड़े डूगे पाणिए रे डूबदे ऊए चलीगे।

6 ओ यहोवा, तेरा दाँणा आथ तागता रे महान ए,

ओ यहोवा, तेरा दाँणा आथ दुश्मणा खे चकनाचूर करी देओआ।

7 तूँ आपणे बरोदिया खे, आपणी महानता री सामर्था ते रूड़ाई देया,

तैं आपणा कोप पड़काया ओर सेयो पूओ जेड़े स्वा ऊई जाओए।

8 तेरे गुस्से रे परे नासा रे साओ ते पाणी कट्ठा ऊईगा,

ओर पाणिए री ताअरा दवाला जेड़िया एखी जगा खड़ी गिया,

ओर समुद्रो बीचे डूगा पाणी जम्मी गा।

9 दुश्मणे बोलेया था कि

मां पीछा करना, मां जाई की पकड़ने,

मां तिना रा माल लूटी की बांडी लणा,

तिना साथे मेरा जिऊ परी जाणा,

मां आपणी तलवार खींजी की सेयो नाश करी देणे।

10 पर तैं आपणे साओ री अवा चलाई, तेबे समुद्रे सेयो डबोई ते,

सेयो समुद्रो रे शीशे जेड़े डूबी गे।

11 ओ यहोवा, कोई बी देवता तेरे बराबर निए;

तूँ तो पवित्रता रिया बजअ ते महिमा ते परेया रा

ओर आपणी स्तुति करने वाल़ेया खे डरो जोगा;

ओर अचम्बे रे काम करने वाल़ा ए।

12 तैं आपणा दाँणा आथ बढ़ाया,

ओर तरतिये आसा रे दुश्मण निगल़ी ले।

13 आपणी करूणा साथे तैं आपणी छुड़ाई री प्रजा री अगुवाई करी राखी,

आपणियां तागती ते तूँ तेसा खे आपणे पवित्र रणे री जगा रे लई चली रा।

14 देशो-देशो री जातिया रे लोक ये गल्ल सुणी की थरथराईगे;

पलिश्ती देशो रे रणे वाल़े लोका खे जमणे री जी पीड़ा ऊणे लगिया।

15 एदोमो रे परदान बेचैन ऊणे,

मोआब देशो रे पईलवाण* थरथराणे,

सब कनान देशो रे लोका रे दिल डरो रे मारे टूटी जाणे।

16 ओ यहोवा, जदुओ तक तेरी प्रजा रे लोक जो तैं मोले लई राखे,

कनान देशो तक पार नि निकल़ी गे,

तदुओ तक तिना रे पीतरे डर बणेया रा रया;

तेरे आथो रिया सामर्था ते सेयो पात्थरो जेड़े गूँगे बणे रे रये।

17 ओ यहोवा, तां सेयो आपणे तेस पाह्ड़ो पाँदे, आपणी तेसा जगा पाँदे,

जो तैं आपणे रणे खे बणाई राखी पऊँचाई देणे।

ओ यहोवा, ये सेई पवित्र जगा ए,

जो तैं आपणे आथे की बणाई राखी।

18 यहोवा सदा सर्वदा राज करदे रणा।"

19 जेबे फिरौनो रे कोड़े, रथ ओर सवारा समेत समुद्रो बीचे चलीगे तेबे यहोवे तिना पाँदे समुद्रो रा पाणी वापस ल्याई ता; पर इस्राएली लोक समुद्रो बीचे सुकी जमीना पाँदे ऊई की चलीगे। इजी खे तिने ये गीत गायी राखेया।

20 तेबे हारूणो री बईण मरियम नाओं री नबिया*, तेसे आथो रे खंजरी लई ओर सब जवाणसा आथो रे खंजरी लई की नाचदिया ऊईया तेसा पीछे चली पड़िया।

21 ओर मरियम तिना साथे ये गांदी गई,

"यहोवे रिया तँईं गीत गाओ, कऊँकि से सामर्थी ए;

कोड़ेया समेत तिने सवार समुद्रो रे डबोई ते।"

22 तेबे मूसा इस्राएलिया खे लाल समुद्रो ते आगे शूर नाओं री सुनसाण जगा रे लईगा ओर तिंऊँ दिना तक सुनसाण जगा रे चलदे ऊए तिना खे पाणिए री सूबल़ नि मिली।

23 जेबे सेयो मारा नाओं री एकी जगा रे पऊँचे, तेबे सेयो तेथो रा पाणी पी नि सके कऊँकि से पाणी कड़ुआ था, इजी बजअ ते तेथो रा नाओं "मारा" पड़ेया। 24 तेबे इस्राएली लोक ये बोली की मूसे रे खलाफ बकबक करने लगे, "आसे क्या पियूँ?"

25 तेबे मूसे यहोवा पुकारेया ओर यहोवे तेसखे एक लकड़िया रा टुकड़ा बताया। जेबे तिने से पाणिए दे पाया तेबे से पाणी मीठा ऊईगा। तेथी यहोवे तिना खे एक बिदी-बिधान बणाया ओर तेथी तिने ये बोली की तिना री परीक्षा लई कि, 26 "जे तूँ आपणे परमेशर यहोवे रा वचन तन मनो ते सुणे ओर जो तेसरी नजरा रे ठीक ए, सेई करे, तेसरी आज्ञा पाँदे त्यान देओ ओर तेसरी सब बिदिया खे माने, तो जितणे रोग मैं मिस्रिया पाँदे पेजे, तिना बीचा ते एक बी तां पाँदे नि पेजणा, कऊँकि आऊँ तुसा खे चंगा करने वाल़ा यहोवा ए।" 27 तेबे सेयो एलीम नाओं री जगा रे आए, जेती पाणिए रिया बारा सूबल़ा ओर सत्तर खजूरा रे डाल़ थे ओर तेती तिने पाणिए रे नेड़े डेरे खड़े कित्ते।