निर्गमन 31

बसलेल ओर ओहोलीआब

1 तेबे यहोवे मूसे खे बोलेया, 2 "देख, मैं ऊरीए रा पाऊ बसलेल*31:2 बसलेल मतलब परमेशरो री छाया नाओं लई की चूणी राखेया, से यहूदा रे गोत्रो रा हूरो रा पोता ए। 3 मैं बसलेल आपणी आत्मा, बुद्धि, समज, परविणता, ज्ञान*31:3 बुद्धि, समज, परविणता, ज्ञान मतलब हर गल्ला रे सई परख ओर सब प्रकारा री कारीगरिया री समज देणे वाल़ी आत्मा ते परी राखेया। 4 जेते कि से एते बुद्धिया ते परी की सूईने, चाँदी ओर पीतल़ी रे कारीगरिया रे काम करी सको 5 ओर मणि कटणे रे ओर लकड़िया री कारीगरिया रे ओर सबी किस्मा रे काम करने रे ऊशियार ए।

6 "ओर देख, आऊँ दानो रे गोत्रो रे जम्मे रे अहीसामाको रे पाऊ ओहोलीआबो खे तेस साथे करी देऊँआ; बल्कि मैं ओरी अक्लमंद माणूंआ रे दिल बी बुद्धिया साथे परी ते रे कि सेयो तिना सबी चीजा खे बणाओ जितणी चीजा री आज्ञा मैं ताखे देई राखी, 7 मतलब मिलणे वाल़े तम्बू, वाचा रा सन्दूक, तेस पाँदला दया-आसण ओर तेस तम्बूए रा सारा समान, 8 मेज ओर तिजी पाँदले खाणे रे पांडे, शुद्ध सूईने री बणी री दिऊए राखणे री फट्टी ओर तिजी रा समान ओर तूप बाल़ने री बेदी, 9 ओर सारे समानो समेत होमबलिया री बेदी ओर पावे समेत अऊदी, 10 ओर कढ़ाई कित्ते रे टाल्ले ओर हारूण ओर तेसरे पाऊआ रे पुरोईतो रा काम करने रे पवित्र टाल्ले, 11 ओर पवित्र जगा खे अभिषेको रा तेल ओर खुशबूदार तूप, इना सबी खे सेयो तिना सबी आज्ञा रे मुताबिक बणाओ, जो मैं ताखे देई राखी।"

रामो रा दिन

12 तेबे यहोवे मूसे खे बोलेया, 13 "तैं इस्राएली लोका खे ये बी बोलणा कि तुसे जरूर मेरे रामो रे दिन मानणे, कऊँकि तुसा री पीढ़िया ते पीढ़िया तक मां ओर तुसा लोका बीचे ये एक चिह्न ठईरना, जेते कि तुसे ये गल्ल जाणी लो कि यहोवा म्हारा परमेशर पवित्र करने वाल़ा ए। 14 इजी बजअ ते तुसे रामो रा दिन मानणा, कऊँकि से तुसा खे पवित्र ठईरी रा; ओर जो तेस दिनो खे अपवित्र करोगा, से जरूर काया जाणा; जो कोई तेस दिने कोई काम काज करोगा, से प्राणी आपणे लोका बीचा ते निकाल़ेया जाणा। 15 छे दिना तक तो काम काज करेया करना, पर सातुआ दिन पवित्र रामो रा दिन ओर यहोवे खे पवित्र ए; इजी री खातर जो कोई रामो रे दिने कोई काम करो से पक्का काया जाणा। 16 इजी री खातर इस्राएली लोक रामो रा दिन मानेया करो, बल्कि पीढ़िया ते पीढ़िया तक से सदा खे वाचा रा विषय जाणी की मानेया करना। 17 से मां ओर इस्राएली लोका बीचे सदा रा एक चिह्न रणा, कऊँकि छे दिना रे यहोवे सर्ग ओर तरती बणाई ओर सातुए दिने राम करी की आपणा जिऊ ठण्डा कित्तेया।"

पात्थरो रिया दो तख़्तिया

18 जेबे परमेशर मूसे साथे सीनै रे पाह्ड़ो पाँदे एड़िया गल्ला करी चुकेया, तेबे परमेशरे तेसखे आपणी गूठिया साथे लिखी री गवाई देणे वाल़िया पात्थरो रिया दोनो तख़्तिया दित्तिया।