निर्गमन 28

पुरोईता रे टाल्ले

1 तेबे परमेशर यहोवा मूसे खे एड़ी आज्ञा दित्ती कि तूँ आपणे पाई हारूण ओर तेसरे पाऊ नादाब, अबीहू, एलीआजार ओर ईतामारो खे इस्राएलिया बीचा ते आपू गे बुलाई लओ, ताकि सेयो मेरिया तँईं पुरोईतो रा काम करो। 2 ओर तैं आपणे पाई हारूणो खे बांके ओर मान-सम्मानो जोगे पवित्र टाल्ले बनवाणे। 3 ओर जितणे मैं एड़ा काम करने खे बुद्धि देणे वाल़ी आत्मा साथे परी राखे, तिना खे तूँ हारूणो रे टाल्ले बनवाणे री आज्ञा दे ताकि से मेरिया तँईं पुरोईतो रा काम करने खे पवित्र बणो। 4 ओर जो टाल्ले तिना बनवाणे सेयो यो ए, मतलब छातिया पाँदली पट्टी, एपोद ओर बागा, चऊँ खानेया वाल़ा बुणेया रा चोगा, पुरोईतो री पगड़ी ओर कमरबंद, यो ई पवित्र टाल्ले तेरे पाई हारूणो खे ओर तेसरे पाऊआ खे बणवाए जाओ, ताकि सेयो मेरिया तँईं पुरोईतो रा काम करी सको। 5 ओर सेयो सूईने, नीले, बैंगणी ओर लाल रंगो रे लीलणो रे टाल्ले लओ।

एपोद ओर पटका

6 सेयो एपोद सूईने रा ओर नीले, बैंगणी ओर लाल रंगो रे तागेया ते लीलण नाओं रे टाल्लेया रा बणाओ। जेते पाँदे बूटेदार कढ़ाईया रा काम कित्ते रा ओ। 7 ओर से ईंयाँ जोड़ेया जाओ कि तिजी रे दोनो फरकुआ रे सिरे आपू बीचे आगे-पीछे ते मिले रे ओ। 8 ओर एपोदो पाँदे जो कढ़ाई कित्तेया रा पटका ऊणा तिजी री बुणाई तिजी जेड़ी ओ ओर सेयो दोनो बिना जोड़ो रे ओ ओर जो सूईने, नीले, बैंगणी ओर लाल रंगो रे तागेया ते बुणेया रा लीलणो रे टाल्लेया रा ओ।

9 फेर दो सुलैमानी पात्थरा री मणिया लई की तिना पाँदे इस्राएलो रे पाऊआ रे नाओं छापणे, 10 तिना इस्राएलो रे पाऊआ रे नाओं जन्मो रे मुताबिक बड़े ते लई की छोटे तक छे तो एकी मणिया पाँदे ओर बाकि छे नाओं दूजी मणिया पाँदे खुदवाणे।

11 जिंयाँ एक सन्यार मणिया पाँदे छापा खोदोआ, तिंयाँ ई तिना दोनो मणिया पाँदे इस्राएलो रे पाऊआ रे नाओं कारीगरा ते खुदवाणे ओर सेयो सूईने रे खाँचेया रे जड़वाणे। 12 ओर दोनो मणिया एपोदो रे फरकुआ पाँदे लगवाणिया, सेयो इस्राएलिया खे याद दलाणे वाल़िया मणिया ठईरनियां; मतलब हारूण तिना रे नाओं यहोवे रे आगे आपणे दुँईं फरकुआ पाँदे याद करने खे लगाई की राखो।

13 तेबे सूईने रे खांचे बनवाणे।

14 ओर तैं रस्सिया जेड़ी बाटी री शुद्ध सूईने रिया दो माल़ा बनवाणियां ओर सेयो रस्सिया जेड़ी बाटी री सूईने रिया माल़ा तिना खाँचेया रे जड़वाई देणियां।

छातिया पाँदे पईनणे वाल़ा झिलम

15 एक सई फैंसला लणे वाल़ा छातिया पाँदे पईनणे वाल़ी झिलम बी कारीगरो रे आथो ते कढ़ाई करी की बनवाणा; ये एपोदो जेड़ा सूईने, नीले, बैंगणी ओर लाल रंगो रे तागेया रा ठीक टंगो ते बुणेया रा लीलणो रे टाल्लेया रा बनवाणा।

16 से चकोर ओर दोरी ऊणी चाईयो तिजी री लम्बाई ओर चौड़ाई नौ-नौ गिर्ठ ऊणी चाईयो।

17 ओर तिदे चार पाल़िया मणिया री लगाणियां। पईली पाल़िया रे तो माणिक्य, पुखराज ओर लालड़ी ऊणी चाईयो।

18 दूजी पाल़िया रे मरकत, नीलमणि ओर ईरा;

19 तीजी पाल़िया रे लशम, सूर्यकांत ओर नीलम;

20 ओर चौथी पाल़िया रे फिरोजा, सुलैमानी पात्थरा री मणि ओर यशब ऊणे चाईयो; यो सब सूईने रे खाँचेया रे लगाए जाओ।

21 ओर इस्राएलो रे पाऊआ रे बारा गोत्रा रे नाओं री गिणतिया रे मुताबिक बारा मणिया पाँदे एकी-एकी रे नाओं एकी-एकी छापा दे खुदवाणे।

22 तेबे छातिया पाँदे पईनणे वाल़ी झिलमा पाँदे रस्सिया जेड़ी बाटी री शुद्ध सूईने री माल़ा लगवाणी। 23 ओर छातिया पाँदे पईनणे वाल़े झिलमो रे सूईने रे दो कड़े लगवाणे ओर दोनो कड़े छातिया पाँदे पईनणे वाल़ी झिलमा रे दुँईं सिरेया पाँदे लगवाणे। 24 फेर सूईने री दोनो रस्सिया जेड़ी बाटी रिया माल़ा छातिया पाँदे पईनणे वाल़े झिलमो वाल़ी झिलमा रे तिना दुँईं कड़ेया रे लगवाणिया; 25 ओर सूईने री दुँईं जंजीरा रे दोनो सिरे एपोदो रे सामणे दुँईं कान्दा रे बन्दनो पाँदे लगवाणे। 26 फेर सूईने रे दो ओर कड़े बणवाई की छातिया पाँदे पईनणे वाल़े झिलमो रे दुँईं सिरे पाँदे एपोदो रे पीतरली तरफा खे लगवाए। 27 फेर सूईने रे ओर दो कड़े बणाए ओर एपोदो री दुँईं कान्दा रे बन्दनो पाँदे थाला ते एपोदो रे सामणे ओर जोड़ो गे, एपोदो रे कढ़ाई कित्ते रे पट्टके पाँदे लगवाणे।

28 ओर छातिया पाँदे पईनणे वाल़ी झिलम तिजी रे कड़ेया रे जरीये एपोदो रे कड़ेया रे नीली डोरिया साथे एड़ा बानेया कि से एपोदो रे पट्टके पाँदे रओ ओर छातिया पाँदे पईनणे वाल़ी झिलम एपोदो ते लग नि ऊई सको।

29 जेबे-जेबे हारूण पवित्र जगा रे जाओ, तेबे-तेबे से यहोवे रे सामणे आपणे दिलो पाँदे इस्राएलो रे पाऊआ रे नाओं खे सई फैंसला लणे वाल़ा छातिया पाँदे पईनणे वाल़ा झिलम लगाई की राखो, जेते की यहोवे रे सामणे तिना री याद हमेशा रओ। 30 तिजी साथे तैं ऊरीम ओर तुम्मीम*28:30 ऊरीम ओर तुम्मीम ये मिस्र देशो ते ल्याये रे कीमती पात्थर थे ओर तिना रे जरीये परमेशरो री इच्छा प्रकट ओ थी सई फैंसला लणे वाल़ा छातिया पाँदे पईनणे वाल़े झिलमो पाँदे लगाई की राखणे ताकि जेबे-जेबे हारूण यहोवे रे सामणे आओ, तेबे-तेबे सेयो तेसरे दिलो पाँदे ओ; ईंयाँ हारूण इस्राएलिया रिया तँईं आपणे दिलो पाँदे यहोवे रे सामणे सई फैंसला लंदा रणा।

ओर पुरोईतो रे टाल्ले

31 फेर एपोदो रा चोगा पूरे नीले रंगो रे तागेया रा बनाणा। 32 तिजी बीचे सिर पाणे खे छेद ओ ओर तेते छेदो रे चऊँ कनारे बख्तरो रे छेदो जेड़ा एक गोटा लगाओ ताकि ये फटी नि सको। 33 ओर तेते टाल्ले रे थालले केरे रे चऊँ कनारे नीले, बैंगणी ओर लाल रंगो रे तागेया ते अनार बनवाणे ओर तिना बीचे चऊँ कनारे सूईने रिया कंटिया लगवाणिया, 34 मतलब एक सूईने री कंटी ओर एक अनार, फेर एक सूईने री कंटी ओर एक अनार, ईंयाँ ई चोगे रे थालले केरे रे चऊँ कनारे एड़ा ई करना।

35 ओर हारूण तेस चोगे खे सेवा-टईल करदे बखते पईनेया करो, ताकि जेबे-जेबे से पवित्र जगा रे पीतरे यहोवे रे सामणे जाओ या बारे निकल़ो, तेबे-तेबे तेते कंटिया री आवाज सुणो, नई तो से मरी जाणा।

36 तेबे शुद्ध सूईने री दो आऊँगल़ चौड़ी पट्टी बनवाणी; जेते पाँदे छापे रे ये अक्षर खुदवाणे, कि यहोवे खे पवित्र। 37 तिजी खे नीली डोरिया साथे पगड़िया दे बानणा ओर से पगड़िया रे सामणे वाल़े इस्से दे रओ। 38 से हारूणो रे माथे पाँदे रओ, ताकि इस्राएली जो कुछ पवित्र ठराओ, मतलब जितणिया पवित्र चीजा पेंटा रे चढ़ाओ तेबे तिना पवित्र चीजा रा दोष हारूणो आपू पाँदे लणा ओर से हमेशा तेसरे माथे पाँदे रओ ताकि यहोवा तिना ते खुश रओ।

39 चोगा लीलणो रे टाल्ले रा चार खाने वाल़ा बुणवाणा ओर एक पगड़ी बी लीलणो रे टाल्ले री बनवाणी ओर पटका तो ठीक टंगो रे कढ़ाई करी की बेल-बूटे वाल़ा बनवाणा।

40 तेबे हारूणो रे पाऊआ खे बी लीलणो रे चोगे, पटके ओर टोपिया बनवाणियां ताकि तिना रे टाल्लेया रे तिना रा वैभव ओर आदर बणेया दा रओ। 41 आपणे पाई हारूण ओर तेसरे पाऊआ खे यो ई टाल्ले पन्याई की तिना रा अभिषेक करना। फेर सेयो मेरिया तँईं पुरोईतो रा काम करने खे पवित्र करने।

42 तिंयाँ ई तिना खे लीलणो रे टाल्लेया रिया निकरा बनवाणियां जेते कि तिना रा लको ते जानूआ तक तन टखेया रा रओ। 43 जेबे-जेबे हारूण ओर तेसरे पाऊ मिलणे वाल़े तम्बूए रे जाई की पवित्र जगा रे सेवा-टईल करने री बेदिया गे जाओ, तेबे-तेबे सेयो तिना निकरा खे पईनी की राखो, नई तो सेयो दोषी ठईरने ओर मरी जाणे। ये हारूणो खे ओर तेसते बाद तेसरे वंशो खे बी सदा री रवाज ठईरो।