1 एक दिन शिमशोन गाजा शईरो खे गया ओर तेती एक वेश्या खे देखी की तेसा गे गया। 2 जेबे गाजा रे रणे वाल़ेया लोका खे इजी रा पता चलेया कि शिमशोन एती आयी रा। तेबे तिने से शईर केरी ला ओर पूरी रात शईरो रे बड़े द्वारो गे चुपचाप बैठी की तेसरा बारे आऊणे रा इन्तजार करने लगे। कऊँकि सेयो तेसखे प्याग ऊणे पाँदे काणा चाओ थे। 3 पर शिमशोन आदिया राती उठी की शईरो रे बड़े द्वारो गे गया। तिने शईरो रे बड़े द्वारो रे दोनो फल़े ओर दोनो साखा पकड़ी की चौखटा समेत पट्टी ते ओर आपणी कान्दा पाँदे राखी की तिना खे तेस पाह्ड़ो री चूँडिया पाँदे लयी गा, जो हेब्रोन शईरो रे सामणे ए।

4 एते कटणा ते बाद शिमशोन दलीला नाओं री एकी जवाणसा ते प्यार करने लगेया, जो सोरेक नाओं रे नाल़े गे रणे वाल़ी थी। 5 जेबे पलिश्तिया रे सरदारा खे ये पता लगेया तेबे तिने तेसा जवाणसा गे जायी की बोलेया, "तूँ तेसखे सकेल़ी की पूछ कि तेसरी एसा बड़ी तागती रा पेत क्या ए। ओर आसे एड़ा क्या करिए कि से मारे कब्जे दे आई सको ओर आसे तेसखे बानी की राखी सकिए? जे तुँ एतेरे बारे दे पता लगाई ले तो आसा सबी ताखे लगभग तेरा-तेरा किलो* चाँदी देणा।" 6 तेबे दलीले शिमशोनो खे बोलेया, "मांगे बताई दे कि तेरी बड़ी तागती रा पेत क्या ए ओर किंयाँ कोई ताखे बानी की राखी सकोआ?" 7 शिमशोने तेसा खे बोलेया, "जे आऊँ साता एड़िया नवीं ताँती* साथे बानेया जाऊँ जो सुकाई नि राखिया ओ, तो मेरी तागत कम ऊई जाणी ओर आऊँ आम माणूंए जेड़ा ऊई जाणा।" 8 तेबे पलिश्तिया रे सरदार दलीला गे सात एड़िया नवींया ताँता लयी गे जो सुकाई नि राखिया थिया ओर तिना साथे तेसे से बानेया। 9 तेथी कुछ माणूं कमरे दे ताक लगाई की बैठी रे थे। तेबे तेसे शिमशोनो खे बोलेया, "ओ शिमशोन, पलिश्ती तेरी ताका रे ए!" तेबे तिने ताँता एड़िया तोड़िया जेड़ा सणी रा सूत आगी रे छूँदे ई टूटी जाओआ ओर तेसरी तागती रा पेत नि खुलेया।

10 तेबे दलीले शिमशोनो खे बोलेया, "तैं मेरा बेवकुफ बणाया ओर मांते चूठ बोलेया, पर एबे मांगे सच-सच बोल कि तूँ कुणजी चीजा साथे बंदी सकेया।" 11 तिने तेसा खे बोलेया, "जे माखे एड़िया नवींया रस्सिया साथे जो केसी कामो रे नि आई रिया ओ कसी की बानो, तो मेरी तागत कम ऊई जाणी ओर आऊँ आम माणूंए जेड़ा ऊई जाणा।" 12 तेबे दलीले नवीं-नवीं रस्सिया लयी की ओर तेसखे बानी की बोलेया, "ओ शिमशोन, पलिश्ती लोक तेरी ताका रे ए!" कऊँकि तेती कई माणूं तो तेस कमरे रे ताक लगाई की बैठी रे थे। तेबे शिमशोने आपणियां बांई पाँदे बानिया रिया सेयो रस्सिया एड़िया तोड़िया जेड़े कोई तागा तोड़ोआ। 13 तेबे दलीले शिमशोनो खे बोलेया, "एबुए तक तूँ मेरा बेवकुफ बणांदा ओर चूठ बोलदा आयी रा, एबे मांगे बताई दे की ताखे किजी साथे बानी सकोए?" तिने बोलेया, "जे तूँ मेरे सिरो रिया सातो लटा ताणे दे बूणे तो बंदी सकणा।" 14 जेबे शिमशोन सई रा था तेबे तेसे तेसरिया सात लटा ताणे साथे खूँडिया दे बानियां, तेबे तेसखे बोलेया, "ओ शिमशोन, पलिश्ती तेरी ताका रे ए!" तेबे से नींजा दे कबराई की उठेया ओर खूँडी थाला ते पट्टी की से ताणे समेत लईगा। 15 तेबे दलीले तेसते बोलेया, "तूँ तो मां पाँदे परोसा नि करदा, तेबे तूँ कऊँ बोलेया कि आऊँ तांते प्यार करूँआ? तैं तीनो बार मेरा बेवकुफ बणाई राखेया ओर मांगे नि बताया कि तेरी बड़ी तागती रा पेत क्या ए।" 16 ईंयाँ जेबे तेसे हर दिन एड़िया गल्ला करी-करी की से तंग करी ता ओर एथो तक हठ कित्तेया कि से बऊत दु:खी ऊईगा, 17 तेबे तिने आपणे मनो रा सारा पेत खोली की तेसा खे बोलेया, "मेरे सिरो दे उस्तरा कदी नि फिरेया, कऊँकि आऊँ माया रे पेटो ते ई परमेशरो रा नाज़ीर ए, जे मेरा मुंडन करेया जाओ, तो मेरी तागत इतणी कटी जाणी कि आऊँ आम माणूंए जेड़ा कमजोर ऊई जाणा।"

18 जेबे दलीले देखेया की शिमशोने आपणे मनो रा सारा पेत मांगे बताईता रा, दलीले पलिश्तिया रे सरदारा गे सन्देसा पेजेया, "एबकी बारी फेर आओ, कऊँकि तिने आपणे मनो रा सारा पेत मांगे बताईता रा।" तेबे पलिश्तिया रे सरदार आथो दे चाँदिए रे सिक्के लयी की वादे रे मुताबिक तेसा गे आये। 19 तेबे दलीले शिमशोन आपणे जानूआ पाँदे सूल़ाई ता ओर एक माणूं बुलाई की तेसरी सातो लटा मुंडवाई तिया। ओर तेसरी सारी तागत खत्म ऊईगी, तेबे से कमजोर ऊईगा। 20 तेबे दलीले बोलेया, "ओ शिमशोन, पलिश्ती तेरी ताका रे ए!" तेबे से नींजा ते उठेया ओर सोचणे लगेया, "मां पईलके जेड़े बारे जायी की छुट्टी जाणा।" से नि जाणो था कि यहोवे री तागत तेसगे ते चली गी ए। 21 तेबे पलिश्तिये शिमशोन पकड़ी ला ओर तेसरिया आखी फोड़ी तिया ओर से गाजा शईरो दे लयी जायी की पीतल़ी रे साँगल़े की बानी ता; ओर तिने से जेला दे चाक्की पीसणे रे कामो पाँदे लगाईता। 22 तेसरे सिरो रे बाल़ मुंडणे ते बाद फेर बढ़ने लगे।

23 तेबे पलिश्तिया रे सरदार आपणे दागोन नाओं रे देवते खे बड़ा बलिदान चढ़ाणे ओर खुशी मनाणे खे ये बोली की कट्ठे ऊए, "म्हारे देवते म्हारा दुश्मण शिमशोन म्हारे कब्जे दे करी ता रा ए।" 24 ओर जेबे पलिश्ती लोके से देखेया, तेबे ये बोली की आपणे देवते री स्तुति कित्ती, "म्हारे देवते म्हारा दुश्मण ओर म्हारे देशो रा नाश करने वाल़े खे, जिने आसा बीचा ते बऊत काई बी दित्ते, म्हारे कब्जे दे करी ता रा।" 25 जेबे पलिश्तिया रा मन खुश ऊईगा, तेबे तिने बोलेया, "शिमशोनो खे बारे बुलाई लो कि आसे तेसरा मजाक उडाई सकिए।" इजी री खातर शिमशोन जेला ते बारे बुलाया ओर तेसरा मजाक उडाया ओर तेसखे देखी की आसणे लगे, ओर तिने बादो ते से खम्बेया बीचे खड़ा कित्तेया। 26 तेबे शिमशोने तेस दासो खे जिने तेसरा आथ पकड़ी राखेया था बोलेया, "माखे तिना खम्बेया खे छूणे दे जिना साथे मन्दर सम्बल़ी रा ताकि आऊँ तिना रे सारे खड़ी सकुँ।" 27 से मन्दर तो जवाणस मर्दा साथे फरेया रा था; पलिश्तिया रे सारे सरदार बी तेती थे ओर छतो पाँदे कोई 3,000 जवाणसा मर्द थे, जो शिमशोनो रा मजाक उडाई की तेस पाँदे आसणे लगी रे थे। 28 तेबे शिमशोने ये बोली की यहोवे ते प्रार्थना कित्ती, "ओ प्रभु यहोवा, माखे याद कर, ओ परमेशर, एक बार फेर माखे तागत दे, ताकि आऊँ पलिश्तिया ते आपणी आखी फोड़ने रा बदला लऊँ।" 29 तेबे शिमशोने दोनो बीचले खम्बे जिना साथे मन्दर सम्बल़ी रा था पकड़ी की एकी पाँदे तो दाँणे आथो ते ओर दूजे पाँदे खूँजे आथो ते जोर लगाया। 30 तेबे शिमशोने बोलेया, "पलिश्तिया साथे मेरे प्राण बी जाओ।" तेबे से आपणी सारी तागत लगाई की चुकेया; तेबे से मन्दर सबी सरदारा ओर जो तिदे थे तिना सबी लोका पाँदे टल़ी गा। इतणे लोक तो तिने आपणे जिऊँदे जिऊए नि काये थे, जितणे तिने आपणी मौता रे बखते एती काये। 31 तेबे तेसरे पाई ओर तेसरे बाओ रे सारे कराने रे लोक आए ओर तेसरी लाश चकी की लयी गे, तेबे से सोरा ओर एशताओल शईरा बीचे तेसरे बाओ मानोह री कब्रा दे दबाईता। तिने इस्राएली लोका रा न्याय बीइ साला तक कित्तेया था।