न्यायियो 8

मिद्यानिया री पूरी आर

1 तेबे एप्रैमी गोत्रो रे लोके गिदोनो खे बोलेया, "तैं आसा साथे एड़ा बर्ताव कऊँ करी राखेया कि जेबे तूँ मिधानी लोका साथे लड़ने खे चलेया तेबे तैं आसे कऊँ नि बुलाए?" ये बोली की तिने गिदोनो साथे बऊत चगड़ा कित्तेया। 2 गिदोने तिना खे बोलेया, "मैं लड़ाईया दे तुसा रे बराबर कुछ पनि करी राखेया। जो थोड़ी जी फसल तुसे कट्ठी करी राखी से अबीएजेरो री सारिया फसला ते बी जादा ए। 3 परमेशरे ओरेब ओर जेब नाओं रे मिधानो रे परदाना खे काणे दे तुसा री मताद कित्ती। पर आऊँ तुसा जेड़ा बड़ा काम नि करी सकेया, तेबे तेसरी ये गल्ल सुणी की तिना रा गुस्सा शान्त ऊआ।"

मिधानी राजेया खे काणा

4 इजी ते पईले*8:4 इजी ते पईले एप्रैमी लोका रा गिदोनो ते मिलणे ते पईले गिदोन ओर तेस साथले 300 मर्द यरदन नदिया रे कनारे आयी की पार ऊईगे। जो थके रे ओर पूखे थे। पर फेर बी सेयो मिधानिया खे खदेड़दे ई रये। 5 गिदोने सुक्कोत शईरो रे लोका खे बोलेया, "मां पीछे आऊणे वाल़े मेरे लोका खे कुछ रोटिया देयो, कऊँकि यो थके दे ए ओर आसे मिधानो रे राजा जेबह ओर सल्मुन्ना रा पीछा करने लगी रे।" 6 सुक्कोतो रे परदाने ज्वाब दित्तेया, "तैं जेबह ओर सल्मुन्ना तो पकड़ी नि राखे, तो आसे तेरे लोका खे रोटी कऊँ देईए?" 7 गिदोने बोलेया, "जेबे यहोवा जेबह ओर सल्मुन्ना खे मेरे आथो दे करी देओगा, तेबे मां एसा गल्ला रिया बजअ ते जो तुसे एबु बोलोए मां जंगल़ो रे कांडे ओर चींयाँ री डाल़िया ते तुसा रा चामड़ा तेड़ी देणा।" 8 तेथा ते सेयो लोक पनूएल शईरो खे गये ओर तेथो रे लोका खे बी एड़ी ई गल्ल बोली ओर पनूएल शइरो रे लोके बी सुक्कोतो रे लोका जेड़ा ई ज्वाब दित्तेया। 9 गिदोने पनूएलो रे लोका खे बोलेया, "जेबे मां जीती की सई-सलामत वापस आऊणा, तेबे मां ये गुम्मट टाल़ी देणा।"

10 मिधानिया रे राजा जेबह ओर सल्मुन्ना तो कर्कोर जगा दे थे ओर तिना साथे कोई 15,000 सिपाई थे, कऊँकि पूर्विया री सारी सेना बीचा ते यो ई जिऊँदे बची रे थे ओर जो गिदोनो रे लोके काये थे सेयो 120,000 सिपाई थे। 11 तेबे गिदोन ओर तेसरे लोक नोबह ओर योगबहा शईरो रे पूर्वो रिया तरफा रिया बाटा रिये गये ओर तेती तिने मिधानिया रे सिपाईया पाँदे अचाणक अमला कित्तेया जो तेती बेफिकर ऊई की रणे लगी रे थे। 12 ओर जेबे जेबह ओर सल्मुन्ना राजा नठीगे, तेबे गिदोने तिना रा पीछा करी की सेयो दोनो मिधानी राजा पकड़ी ते ओर सारे सिपाई डरो रे मारे ओरे-पोरे नठीगे। 13 तीजी ते बाद योआशो रा पाऊँ गिदोन हेरेस नाओं री पाह्ड़िया रिये लड़ाई लड़ी की वापस आऊणे लगी रा था। 14 तेती तेसखे सुक्कोतो रा एक जवान माणूं मिलेया तिने से पकड़ी की तेसते सुक्कोतो रे सतत्तर परदान ओर स्याणे लोका रे नाओं लिखवाए।

15 तेबे से सुक्कोतो रे लोका गे जाई की बोलणे लगेया, "जेबह ओर सल्मुन्ना खे देखो, जिना रे बारे दे तुसे ये बोली की मेरा मजाक उड़ाया था कि क्या तैं जेबह ओर सल्मुन्ना पकड़ी ते रे ए कि आसे तेरे थके रे माणूंआ खे रोटी देऊँ?" 16 तेबे तिने तेस शईरो रे स्याणे लोक पकड़े ओर जंगल़ो रे कांडेवाल़े डाल़ लयी की सुक्कोतो रे माणूंआ खे सबक सिखाया। 17 ओर तिने पनूएलो रा गुम्मट टाल़ी ता ओर तेते शईरो रे माणूं काई ते।

18 तेबे गिदोने जेबह ओर सल्मुन्ना ते पूछेया, "जो माणूं तुसे लोके ताबोर पाह्ड़ो पाँदे काये थे सेयो केड़े दिशो थे?" तिने ज्वाब दित्तेया, "जेड़ा तूँ तेड़े ई सेयो बी थे, मतलब सेयो बी राजकुमारा जेड़े ई दिशो थे।" 19 तिने बोलेया, "सेयो तो मेरे सके पाई थे; यहोवे री जिन्दगिया री कसम, जे तुसे सेयो जिऊँदे छाडे ऊँदे, तो मां तुसे काणे नि थे।" 20 तेबे तिने आपणे जेठे पाऊ यतेरो खे बोलेया, "उठी की इना खे काईदे।" पर तिने सेयो नि काये, कऊँकि से एबुए तक कम उम्रा रा ई था, ओर से डरीगा था। 21 तेबे जेबह ओर सल्मुन्ने गिदोनो खे बोलेया, "तूँ उठी की आसा खे काईदे" तेबे गिदोने उठी की जेबह ओर सल्मुन्ना काईते ओर तिना रे ऊँटा रे गल़ेया ते आर निकाल़ी की लयी ले। 22 तेबे इस्राएलो रे लोके गिदोनो खे बोलेया, "तूँ आसा पाँदे राज कर, तू ओर तेरा पाऊ ओर तेरा पोता बी आसा पाँदे राज करो; कऊँकि तैं आसे मिधानो रे लोका रे कब्जे ते छुड़ाई राखे।" 23 गिदोने तिना खे बोलेया, "ना तो मां ओर ना ई मेरे पाऊए तुसा पाँदे राज करना; बस यहोवे ई तुसा पाँदे राज करना।" 24 तेबे गिदोने तिना खे बोलेया, "आऊँ तुसा ते कुछ माँगुआ, तुसे माखे तिना बाल़िया देयो जो तुसे आपणे मिधानी दुश्मणा ते लूटी राखिया। (मिधानी लोक तो इश्माएलो रे कुलो रे थे, ओर सेयो सूईने रिया बाल़िया पईनो थे।)" 25 इस्राएली लोके बोलेया, "आसा यो बाल़िया ताखे खुश ऊई की देणियां।" तेबे तिने चादर बछाई की आपणी-आपणी लूटा बीचा ते बाल़िया निकयाल़ी की तेते दे राखी तिया। 26 जो सूईने रिया बाल़िया तिने मांगिया तिना रा बजन लगभग बी किलो*8:26 बी किलो 1,700 शेकेल ऊआ। ओर तिना खे छाडी की चन्द्रआर, झुमके ओर बैंगणी रंगो रे टाल्ले जो मिधानिया रे राजा पईनो थे ओर तिना रे ऊँटा रे गल़ेया रे आर। 27 तिना रा गिदोने सूईने रा एक एपोद बणाई की आपणे ओप्रा नाओं रे शईरो दे राखेया ओर सारे इस्राएली तेथा ते व्याभिचारणिया जेड़े*8:27 व्याभिचारणिया जेड़े यहोवे खे छाडी की एपोदो खे पूजणे लगे तेस पीछे चली पड़े ओर से गिदोन ओर तेसरे कराने खे फन्दा ठईरेया। 28 ईंयाँ मिधानी लोक इस्राएली लोका रे वशो दे ऊईगे ओर फेर तिना रा सामणा नि करी सके। ओर गिदोन जदुए तक जिऊँदा रया मतलब चाल़िया साला तक देशो दे शान्ति बणी दी रई।

गिदोनो रा मरना

29 योआशो रा पाऊ यरूब्बाल तो जाई की आपणे कअरे रणे लगेया। 30 ओर गिदोनो रे सत्तर पाऊ थे, कऊँकि तेसरे बऊत लाड़िया थिया। 31 ओर तेसरी जो एक रखैल शकेम शईरो दे रओ थी तेसा रे एक पाऊ पैदा ऊआ ओर गिदोने तेसरा नाओं अबीमेलेक राखेया। 32 योआशो रा पाऊ गिदोन पूरे स्याणदे बखते मरी गा ओर अबीएजेर कुलो रे ओप्रा शईरो दे तेसरे बाओ योआशो री कब्रा दे से दबाईता।

33 गिदोनो रे मरने ते बाद इस्राएली यहोवे ते फिरी गे ओर व्याभिचारणिया जेड़े बाल देवतेया पीछे चली पड़े ओर बाल-बरीत*8:33 बाल-बरीत वादे रा देवता नाओं रे देवते खे आपणा देवता बणाई ला। 34 ओर इस्राएलिये आपणे परमेशर यहोवे खे, जिने सेयो चऊँ कनारले दुश्मणा ते छुड़ाए थे, याद नि राखेया; 35 ओर ना ई तिने यरूब्बाल मतलब गिदोनो री से सारी पलाईया रे मुताबिक जो तिने इस्राएली लोका साथे कित्ती थी तेसरे कराने खे प्यार दखाया।