न्यायियो 19

लेवी पुरोईत ओर तेसरी रखैल

1 तिना दिना दे जेबे इस्राएली लोका रा कोई राजा नि था, तेबे एक लेवी मर्द एप्रैमो रे पाह्ड़ी प्रदेशो ते बऊत दूर वाल़िया जगा दे परदेशी ऊई की रओ था, जिने यहूदा रे बेतलेहमो री एक जवाणस आपणी रखैल*19:1 रखैल व्याभिचारिणी बणाई राखी थी। 2 एक दिन तेसरी रखैल व्याभिचार करी की यहूदा प्रदेशो रे बेतलेहम शईरो खे आपणे बाओ रे कअरे चली गी ओर चार मीन्ने तक तेथी रयी। 3 तेबे से मर्द आपू साथे एक नौकर ओर दो गह्दे लयी की बेतलेहम शईरो दे तेसा रे कअरे गया, ताकि तेसा खे समजयाई बुजाई की ली आओ। से तेसखे आपणे बाओ रे कअरे लयी गी ओर तेसा जवान जवाणसा रा पिता तेसखे देखी की बऊत खुश ऊआ। 4 तेबे तेसा जवाणसा रे बाओए तेसते तेती रूकणे खे बोलेया ओर से लेवी मर्द तीऊँ दिना तक तेथी रया; तिने तेती तेस मर्दो रा बऊत आदर सत्कार कित्तेया। 5 चौथे दिने जेबे से लेवी मर्द प्यागा तड़के उठी की जाणे लगेया, तेबे जवाणसा रे बाओए तेस लेवी मर्दो खे बोलेया, "तुसे जाणे ते पईले कुछ खाई लो तेबे चली जाएयो।" 6 तेबे तिने दुँईं साथे बैठी की खाया-पिया, तेबे जवाणसा रे बाओए तेस लेवी मर्दो खे बोलेया, "एक रात ओर रूकी जा ओर मजे कर।" 7 तेबे से लेवी मर्द जाणे खे उठेया, पर तेसा जवाणसा रे बाओए बिनती करी की से रोकेया, इजी री खातर तिने तेती रात बिताई। 8 लेवी मर्द पाँजुए दिने प्यागा जाणे खे तड़के उठेया; पर जवाणसा रे बाओए बोलेया, "पईले खाणा खाई लो ओर तुसे दोनो दिन ऊणे तक रूके दे रओ।" तेबे तिने दुँईं रोटी खाई। 9 जेबे लेवी मर्द आपणी रखैल ओर नौकरो समेत जाणे खे उठेया, तेबे तेसा जवाणसा रे बाओए बोलेया, "देख, दिन तो टल़ी गा रा ओर साँज ऊणे वाल़ी ए; इजी रिया तँईं तुसे राथियो खे रूके दे रओ। एथी मजे करदा ऊआ रात बिता ओर प्यागा उठी की आपणी बाटा दे चली की आपणे कअरो खे चली जाया।"

10 पर तिने लेवी मर्दे तेसा राती तेती रूकणा नि चाया, इजी री खातर से उठी की बिदा ऊआ ओर काठी बानी की दो गह्दे ओर आपणी रखैला साथे यबूस तक जेतेखे यरूशलेम बोलोए गये। 11 जेबे सेयो यबूस शईरो गे पऊँचे तेबे साँज ऊणे वाल़ी थी कि नौकरे आपणे मालको खे बोलेया, "आओ, आसे यबूस शईरो देई रूकी जाईए।" 12 पर तेसरे मालके तेसखे बोलेया, "आसे पराये शईरो दे जेती रणे वाल़े लोक इस्राएली नि ए, रूकणा नि; गिबा शईरो तक चलूँए।" 13 तेबे तिने आपणे नौकरो खे बोलेया, "आओ, आसे गिबा शईर या रामाह शईरो बिचा ते केसी एकी जगा दे रात बिताई लऊँए।" 14 तेबे सेयो आगो खे चले ओर तिना रे बिन्यामीन प्रदेशो रे गिबा शईरो रे नेड़े पऊँछदे-पऊँछदे न्हेरा ऊईगा, 15 इजी री खातर सेयो गिबा शईरो दे रूकणे खे तेथो खे चली गे। ओर सेयो पीतरे जायी की तेस शईरो रे चौको दे बैठीगे, कऊँकि सेयो किने बी आपणे कअरे रणे खे नि बुलाए।

16 तेबे एक बुजुर्ग माणूं आपणे डोरूआ ते काम खत्म करी की साँजा आया, से तो एप्रैमो रे पाह्ड़ी प्रदेशो रा था ओर गिबा शईरो दे परदेशी ऊई की रओ था; पर तेसा जगा रे लोक बिन्यामीनो रे गोत्रो रे थे। 17 जेबे तिने बुजुर्ग माणूंए सेयो शईरो रे चौको दे देखे; तिने बुजुर्ग माणूंए पूछेया, "तुसे केयी चली रे ओर केथा ते आयी रे?" 18 लेवी मर्दे तेसखे बोलेया, "आसे लोक तो यहूदा रे यहोवे रे बेतलेहम शईरो ते आई की एप्रैमो रे पाह्ड़ी प्रदेशो री तरफा खे चली रे, आऊँ तो एथो राए ओर यहूदा रे बेतलेहम शईरो तक गया था ओर एबे आपणे कअरो खे चली रा, पर किने बी माखे आपणे कअरे रणे खे नि बोलेया। 19 आसा गे तो गह्देया खे पराल़ ओर चारा बी ए, ओर मांगे ओर तेरी एसा दासिया गे ओर एस जवानो खे बी जो तेरे दासो साथे ए, रोटी ओर अंगूरा रा रस बीए; आसा गे केसी चीजा री कमी नि ए।" 20 बुजुर्ग माणूंए बोलेया, "मेरे कअरे तुसा रा स्वागत ए, तेरे मतलबो रिया सारिया चीजा मांगे अईया; पर रात चौको दे नि बिता।"

21 तेबे से लेवी मर्दो खे ओर जो तेस साथे थे तिना खे आपणे कअरे लयी गा ओर गह्देया खे चारा दित्तेया; तेबे तिने पैर तोए ओर फेर खाणे-पीणे लगे।

गिबा रे लोका रा पाप

22 जेबे सेयो लोक खाणे पीणे लगी रे थे, कि शईरो रे कुछ दुष्ट लोके कअर केरी ता ओर द्वारो खे खटखटायी की कअरो रे तेस मालक बुजुर्ग माणूंए खे बोलणे लगे, "जो मर्द तेरे कअरे आयी रा तेसखे बारे ल्यायो, ताकि आसे तेस साथे गल़त काम करी सकिए।" 23 कअरो रा मालक तिना गे बारे जायी की बोलणे लगेया, "ना, ना, ओ मेरे पाईयो, एड़ा बुरा काम नि करो; ये मर्द जो मेरे कअरे मईमान आयी रा, एस साथे एड़ा शर्मा वाल़ा काम नि करो। 24 देखो एती मेरी कुआँरी बेटी ए ओर तेस मर्दो री रखैल बीए; सेयो मां बारे ली आऊणियां। ओर तिना साथे जो चाओ से करो; पर एस मर्दो साथे एड़ा शर्मा रा काम नि करो।" 25 पर तिने माणूंए तेसरी नि मानी। तेबे लेवी मर्दे आपणी रखैल पकड़ी ओर तिना गे बारे पेजी ती ओर सेयो लोक पूरी रात प्यागा तक तेसा साथे कुकर्म करदे रये ओर प्याग ऊँदे ई से छाडी ती। 26 तेबे से जवाणस प्यागा तड़के ई जाई की तेस माणूंए रे कअरो रे द्वारो पाँदे जेती से लेवी मर्द था रूड़ी गी ओर प्रयासा ऊणे तक तेथी पड़ी दी रयी।

27 प्यागा जेबे से लेवी मर्द उठेया, तेबे कअरो रा द्वार खोली की आपणे कअरो खे जाणे लगेया, तो क्या देखेया, कि मेरी रखैल कअरो रे द्वारो गे देऊल़ी पाँदे आथ राखी की पड़ी री थी। 28 तिने लेवी मर्दे तेसा खे बोलेया, "उठ आसे चलूँए।" जेबे कोई ज्वाब नि मिलेया कऊँकि से मरी गी थी, तेबे से तेसा लाशा खे गह्दे पाँदे लादी की आपणे कअरो खे लईगा। 29 जेबे से आपणे कअरे पऊँचेया, तेबे तिने छुरी लयी ओर रखैला रे बारा टुकड़े करी की इस्राएलो रे बारा गोत्रा दे पेजी ते। 30 जितणेया से देखी सेयो आपू बीचे बोलणे लगे, "इस्राएली लोका रे मिस्र देशो ते आऊणे रे बखतो ते लयी की आजके दिनो तक एड़ा कुछ कदी नि ऊआ ओर ना कदी देखेया, तो ये सोची समजी की बचार करो ओर बोलो कि क्या करना चाईयो।"