न्यायियो 17

मीका रा मूर्तिपूजा करना

1 एप्रैमो रे पाह्ड़ी इलाके दे मीका नाओं रा एक मर्द था। 2 तिने आपणिया माया खे बोलेया, "जो तेरे कोई तेरा किलो चाँदिए रे सिक्के तांगा गे ते चोरी ऊईगे थे, जिना रे बारे दे मैं तुँ स्राप देंदे ऊए सुणी थी, सेयो मांगे ए, मैं ई सेयो चोरे थे।" तेसरिये माये बोलेया, "मेरे पाऊए खे यहोवा आशीष देयो।" 3 जेबे तिने सेयो तेरा किलो चाँदिए रे सिक्के आपणी माया खे वापस करी ते; तेबे तेसरी माये बोलेया, "आऊँ आपणी तरफा ते आपणे पाऊए रिया तँईं ये चाँदिए रे सिक्के यहोवे खे पक्का अर्पण करूँई, ताकि तिजी साथे एक मूर्त कअड़ी की ओर चाँदिए की मढ़ी की बणाई जाओ, इजी री खातर से सिक्के एबे आऊँ फेर ताखे वापस करी देऊँई।" 4 जेबे मीके चाँदिए रे सिक्के आपणी माया खे वापस करीते, तेबे तेसरिये माये कोई दो किलो ते जादा सिक्के सन्यारो खे दित्ते सन्यारे तिना ते मूर्ति कअड़ी की ओर से चाँदिए की मढ़ी की बणाई ओर ये मूर्ति मीके रे कअरे रई। 5 मीके गे देवते खे राखणे खे एक मन्दर था, तेबे तिने एक एपोद ओर कई देवते बणवाए ओर आपणे एक पाऊ आपणा पुरोईत बणाई ला। 6 तिना दिना दे इस्राएली लोका रा कोई राजा नि था; इजी खे तिना खे जो कुछ ठीक लगो था, से सेई करो थे।

7 यहूदा प्रदेशो रे बेतलेहम शईरो दे एक जवान लेवी गोत्रो रा परदेशी ऊई की रओ था। 8 से यहूदा रे बेतलेहम शईरो ते इजी खे निकल़ेया, ताकि जेती केथी जगा मिलो तेती जायी की रओ। चलदे-चलदे से एप्रैमो रे पाह्ड़ी इलाके दे मीके रे कअरे आई की पऊँचेया। 9 मीके तेसते पूछेया, "तूँ केथा ते आई रा?" तिने बोलेया, "आऊँ यहूदा रे बेतलेहमो ते आई रा ओर लेवी गोत्रो रा ए ओर इजी खे आई रा कि जेती केथी माखे ठकाणा मिलो, तेती जाई की रऊँ।" 10 मीके तेसखे बोलेया, "मां साथे रई की मेरिया तँईं बाओ जेड़ा ओर पुरोईत बण ओर मां ताखे हर साल कोई 100 ग्राम चाँदिए रे सिक्के, एक जोड़ा कपड़ा ओर खाणे खे खाणा देया करना।" तेबे से लेवी तेसरे कअरे गया। 11 ओर से लेवी मीके साथे रणे खे खुश ऊआ ओर से जवान तेस साथे पाऊए जेड़ा बणेया दा रया। 12 तेबे मीके से लेवी आपणे कअरो रा पुरोईत बणाया ओर से जवान तेसरे कअरे रणे लगेया। 13 तेबे मीका बोलणे लगेया कि एबे आऊँ जाणूंआ कि यहोवे मेरा पला करना, कऊँकि मैं एक लेवी आपणा पुरोईत बणाई राखेया।