न्यायियो 18

दानिया रा मीके री मूर्तिपूजा खे मानणा

1 तिना दिना दे इस्राएली लोका रा कोई राजा नि था ओर तिना ई दिना दे दानिया रे गोत्रो रे लोक रणे खे कोई जगा टोल़ने लगी रे थे; कऊँकि इस्राएली गोत्रो बीचे तिना रा इस्सा तेस बखतो तक नि मिली रा था। 2 तेबे दान गोत्रो रे लोके आपणे सारे कुलो बीचा ते पाँज शूरवीर सोरा शईर ओर एशताओल शईरो ते जगा टोल़ने खे तेते प्रदेशो दे ये बोली की पेजे, "जाई की तेस प्रदेशो खे देखो।" तेबे सेयो एप्रैमो रे पाह्ड़ी प्रदेशो दे मीके रे कअरे जाईकी राती रूकी गे। 3 जेबे सेयो मीके रे कअरो थे, तेबे तिने तेस जवान लेविए रा बोल पछयाणी ला; तेबे तिने तेती तेसते पूछेया, "ताखे एती कुण ल्याया? ओर तूँ एती क्या करेया ओर एती तांगे क्या ए?" 4 लेवी जवाने तिना खे बोलेया, "मीके आऊँ एती आपणे कअरो रे मन्दरो रा पुरोईत बणाई राखेया जेतेरी से माखे मजदूरी देयोआ।" 5 तिने लेविये खे बोलेया, "परमेशरो ते पूछ, ताकि आसे जाणी लऊँ कि जो यात्रा आसे करने लगी रे से सफल ऊणी की नि।" 6 पुरोईते तिना खे बोलेया, "रामो दे चली जाओ। जो यात्रा तुसे करने लगी रे तेते पाँदे यहोवे रा अनुग्रह ए।" 7 तेबे सेयो पाँजो माणूं चली गे ओर लैश शईरो खे जायी की देखेया कि सेयो लोक सीदोनी जातिया रे लोका जेड़े बिना डरे, बेफिकर ओर शान्तिया दे रओए ओर एते देशो रा कोई अधिकारी नि ए, जो तिना खे केसी कामो ते रोको ओर यो सीदोन शईरो ते दूर रओए ओर दूजे माणूंआ साथे कोई मेल-जोल नि राखदे। 8 तेबे सेयो पाँजो लोक सोरा ओर एशताओल शईरो खे आपणे रिश्तेदारा गे आए ओर तिना रे रिश्तेदारे तिना ते पूछेया, "तुसे क्या सन्देश ल्याई राखे?" 9 तेबे तिने बोलेया, "आओ, आसे लैश शईरो पाँदे अमला करूँए, कऊँकि आसे से देश देखेया कि बऊत बड़िया ए। तुसा चुपचाप नि रणा चाईयो तेती चली की तेस देशो खे आपणे कब्जे दे करने खे देर नि करो। 10 तेती पऊँची की तुसा बिना डरे रणे वाल़े लोक ओर लाम्बा चौड़ा देश पाणा ओर परमेशरे से तुसा रे कब्जे दे करिता रा। से एड़ी जगा ए जिदे म्हारी जरूरती रिया सारिया चीजा ए।" 11 तेबे सोरा ओर एशताओल शईरो ते दानो रे कुलो रे 600 मर्द युद्धो रे अथियार लई की चले। 12 तिने जाई की यहूदा प्रदेशो रे किर्यत्यारीम शईरो दे डेरे खड़े कित्ते। इजी बजअ ते तेसा जगा रा नाओं "महनेदान"*18:12 "महनेदान" दानो रे डेरे आजो तक पड़ेया राए, से शईर तो किर्यत्यारीमो रे पच्छमा रिया तरफा खे ए। 13 सेयो तेथा ते एप्रैम प्रदेशो रे पाह्ड़ी इलाके दे मीके रे कअरो रे नेड़े आए। 14 तेबे जो पाँज माणूं लैश शईरो रे देशो रा पेत लणे गये थे, सेयो आपणे साथिया खे बोलणे लगे, "क्या तुसे जाणोए कि इना कअरा दे एक एपोद, कई देवता, एक कड़ी दी ओर चाँदिए की मढ़ी री मूर्ति ए? इजी री खातर एबे सोचो कि क्या करना चाईयो?" 15 सेयो तेस तरफा खे मुड़ी की तेस जवान लेविये रे कअरे गये, जो मीके रे कअरे रओ था ओर तेसरा सुखसाँद पूछेया। 16 ओर सेयो 600 दान गोत्रो रे मर्द बड़े द्वारो दे अथियार बानी की खड़े दे रये। 17 ओर जो पाँज माणूं देशो रा पेत लणे खे गये थे, तिने तेती कूसी की से खणी दी मूर्तिया, एपोद, देवतेया रिया मूर्तिया ओर मढ़ी री मूर्त लई ली ओर से जवान लेवी जो पुरोईत आ, बड़े द्वारो गे तिना अथियार बाने रे 600 मर्दा साथे खड़ी रा था। 18 जेबे सेयो पाँज माणूं मीके रे कअरे कूसी की खणी दी मूर्तिया, एपोद, देवते ओर मढ़ी री मूर्तिया खे ली आए थे, तेबे जवान लेवी पुरोईते तिना ते पूछेया, "ये तुसे क्या करने लगी रे?" 19 तिने तेसखे बोलेया, "चुप रओ, कुछ नि बोलणा ओर आसा लोका साथे चली की, आसा रिया तँईं बाओ जेड़े ओर पुरोईत बण। तेरिया तँईं क्या ठीक ए? ये कि एक ई माणूंए रे कराने रा पुरोईत ओ, या ये, कि इस्राएली लोका रे एक गोत्र ओर एकी कुलो रा पुरोईत ओ?" 20 तेबे जवान लेवी जो पुरोईत ए, खुश ऊआ, इजी री खातर से एपोद, देवता ओर खणी रिया मूर्तिया खे लयी की तिना लोका साथे चलीगा। 21 तेबे सेयो जेते बाटा रिये आए थे तीसिए ई मुड़े ओर बाल-बच्चे, डांगर ओर समानो खे आपू ते आगे करी की चले। 22 जेबे सेयो मीके रे कअरो ते दूर निकल़ी गे थे, तेबे मीका ओर जो माणूं मीके रे कअरो रे नेड़े रे कअरा दे रओ थे, सेयो कट्ठे कित्ते, ओर सेयो दानिया रे पीछे जाई कि तिना रे नेड़े पऊँची गे। 23 ओर दान गोत्रो रे लोका खे आका पाईया, तेबे तिने पीछे मुड़ी की मीके खे बोलेया, "ताखे क्या ऊआ ओर तूँ इतणा बड़ा दल लयी की आसा ते लड़ने खे कऊँ आया?" 24 मीके चींगी की बोलेया, "तुसे तो मेरे बणाए रे देवता ओर लेवी पुरोईतो खे लयी चली रे; तेबे मांगे क्या रयी गा? तो तुसे मांते कऊँ पूछणे लगी रे कि ताखे क्या ऊआ?" 25 दान गोत्रो रे लोके तेसखे बोलेया, "तेरा ग्लाणा आसा खे सुणना नि चाईयो, केथी एड़ा नि ओ कि आसा बीचे जो रोष करने वाल़े माणूं ए सेयो तां पाँदे अमला करो? ओर तूँ ओर तेरे कअरो रे लोक काये जाओ।" 26 तेबे दान गोत्रो रे लोक आपणी बाटा रे गये ओर मीका ये देखी की कि सेयो मांते जादा तागतबर ए, से मुड़ी की आपणे कअरे वापस ऊई गा। 27 तेबे दान गोत्रो रे लोक मीके रे बणाए रे देवता ओर तेसरे पुरोईतो खे साथे लयी की लैश शईरो दे आए, जेथो रे लोक शान्तिया दे ओर बेफिकर ऊई की रओ थे ओर तिने सेयो तलवारी साथे काई ते ओर तिना रा शईर आग लगाई की फूकी ता। 28 तेस शईरो खे बचाणे वाल़ा कोई नि था, कऊँकि से देश सिदोन शईरो ते दूर था ओर सेयो ओरी माणूंआ साथे कोई बर्ताओ नि राखो थे। ओर लैश शईर बेत्रहोबो रिया काट्टिया रे नेड़े था। तेबे दान गोत्रो रे लोके शईर दुबारा बणाया ओर तिदे रणे लगे। 29 ओर तिने तेते शईरो रा नाओं इस्राएलो रे एक पाऊ आपणे बुजुर्ग दानो रे नाओं पाँदे दान राखेया; पर पईले तेस शईरो रा नाओं लैश था। 30 तेबे दान गोत्रो रे लोके से कअड़ी री मूर्त खड़ी करी ती। योनातान गेर्शोमो रा पाऊ ओर मूसे रा पोता था। योनातान ओर तेसरे पाऊ तदुए तक तिना रे पुरोईत बणे दे रये जदुए तक इस्राएली लोक गुलामिया दे नि गये। 31 ओर जदुओ तक परमेशरो रा मन्दर शीलो शईर बणेया रा रया, तदुओ तक सेयो मीके री बणवाई री मूर्तिया री पूजा करदे रये।