न्यायियो 20

इस्राएलो रा बिन्यामीनी लोका खे सजा देणा

1 तेबे उत्तरा दे दान गोत्रो रे इलाके ते लई की दक्खणा दे बेर्शेबा शईर ओर गिलादो रे इलाके रे सारे इस्राएली लोक मिली की यहोवे गे मिस्पा शईरो दे कट्ठे ऊए। तको रे सारे इस्राएली ओर गिलादो रे लोक बी निकल़े ओर तिना री मण्डल़ी एक मत ऊई की मिस्पा दे यहोवा गे कट्ठी ऊई। 2 ओर इस्राएलो रे सारे गोत्रा रे परदान लोक तेती परमेशरो रे लोका रिया सबा दे कट्ठे ऊए। तेती 400,000 तलवार चलाणे वाल़े पैदल सिपाई थे। 3 बिन्यामीनो रे गोत्रो रे लोके जेबे सुणेया कि इस्राएली मिस्पा दे आयी रे। ओर इस्राएली लोक पूछणे लगे, "आसा गे बताओ कि ये बुराई किंयाँ ऊई?" 4 तेसा काई री रखैला रे लेवी मर्दे ज्वाब दित्तेया, "आऊँ आपणी रखैला साथे बिन्यामीनो रे गिबा शईरो दे रात बिताणे खे गया था। 5 तेबे गिबा रे परदान लोके राथियो रे बखते कअर केरी की आऊँ काणा चाया ओर मेरी रखैला साथे इतणा कुकर्म कित्तेया कि से मरीगी। 6 तेबे मैं आपणी रखैल लयी ओर तेसा रे टुकड़े-टुकड़े करी ते ओर सेयो टुकड़े इस्राएलो रे इस्से रे सारे देशो दे पेजी ते। गिबा शईरो रे लोके तो इस्राएलो दे महापाप ओर मूर्खता रा काम करी राखेया। 7 सुणो, ओ इस्राएलियो, तुसे सब एबे एती आपणी सला देयो कि आसे क्या करिए।" 8 तेबे सारे लोक एक मन ऊई की उठी की बोलणे लगे, "ना तो आसा बीचे कोई आपणे डेरे दे जाणा ओर ना ई कोई आपणे कअरो रिया तरफा खे मुड़ना। 9 पर आसा एबे गिबा शईरो साथे पर्चिया पाई की ये फैंसला करना कि आसा बीचा ते केस तिना पाँदे अमला करना। 10 ओर आसा सबी इस्राएली गोत्रा बीचा ते 100 लोका बीचे दस, ओर 1,000 लोका बीचा ते 100 ओर 10,000 लोका बीचा ते 1,000 लोका खे ठराओ। ताकि सेयो लोक सेना खे खाणे-पीणे रिया चीजा आसा खे पऊँचाओ ओर इजी री खातर आसे बिन्यामीन प्रदेशो रे गिबा शईरो दे पऊँची की तिना खे तेसा मूर्खता री सजा देई सकिये जो तिने इस्राएलो दे करी राखी।" 11 तेबे सारे इस्राएली लोक गिबा शईरो रे खलाफ अमला करने खे एक मन ऊई की कट्ठे ऊए। 12 ओर इस्राएली लोके बिन्यामीनो रे सारे गोत्रो बीचे कई माणूं ये पूछणे खे पेजे, "ये क्या बुराई ए जो तुसा लोका बीचे करी राखी? 13 एबे तिना गिबा रे रणे वाल़े कटीया लोका खे म्हारे आथो दे करी देयो, ताकि आसे तिना खे जानी ते मारी की इस्राएलो बीचा ते बुराई नाश करुँ।" पर बिन्यामीनिये आपणे इस्राएली पाईया री मानणे ते ना कित्ती। 14 ओर बिन्यामीनी आपणे-आपणे शईरो ते आई की गिबा शईरो दे इजी खे कट्ठे ऊए, ताकि इस्राएली लोका साथे लड़ने खे निकल़ो। 15 ओर तेस ई दिने गिबा दे रणे वाल़े लोका खे छाडी की, जिना री गिणती 700 चूणे रे सिपाई थे ओर शईरो ते आए दे तलवार चलाणे वाल़े बिन्यामीनी सिपाईया री गिणती 26,000 ठईरी। 16 इना सबी सिपाईया बीचा ते 700 खूँजाठे चूणे दे सिपाई थे, जो सारे के सारे एड़े थे कि खरेबणो ते पात्थर बाणे दे बाल़ परी पनि चुके थे। 17 ओर बिन्यामीनिया खे छाडी की इस्राएली लोक 4,00000 तलवार चलाणे वाल़े अच्छे योद्धा थे। 18 सब इस्राएली उठी की बेतेल शईरो खे गये ओर ये बोली की परमेशरो ते सलाह् लई ओर इस्राएलिये पूछेया, "आसा बीचा ते पईले कुण गोत्र बिन्यामीनिया साथे लड़ने खे जाणा?" यहोवे बोलेया, "पईले यहूदा गोत्रो रे लोक अमला करो।" 19 दूजे दिने इस्राएलिये प्यागा उठी की गिबा शईरो सामणे डेरे लगाए। 20 ओर सारे इस्राएली सिपाई बिन्यामीनी लोका साथे लड़ने खे निकल़ी गे ओर इस्राएली सिपाई तिना साथे लड़ने खे गिबा शईरो रे खलाफ खड़े ऊईगे। 21 तेबे तेसी दिने बिन्यामीन गोत्रो रे सिपाईए गिबा शईरो ते निकल़ी की 22,000 इस्राएली सिपाई काई ते। 22 तेबे बी इस्राएली सिपाईए एकी दूजे खे ईम्मत देई की तेसा ई जगा दे जेती सेयो पईले दिने लड़ाई करने खे कट्ठे ऊए थे, फेर तेथी कट्ठे ऊए। 23 कऊँकि इस्राएली लोक साँजा तक यहोवे रे सामणे रोंदे रये ओर यहोवे ते पूछेया था कि क्या आसे बिन्यामीनिया साथे फेर लड़ने खे जाईए? यहोवे बोलेया था, "आ, तिना पाँदे अमला करो।"

24 ओर इस्राएली दूजे दिने फेर बिन्यामीनिया साथे लड़ने खे गये। 25 तेबे बिन्यामीनो रे सिपाई गिबा शईरो ते बारे निकल़ी की तिना ते लड़े ओर 18,000 इस्राएली सिपाई काई ते जो सब तलवार बाज थे। 26 तेबे सारे इस्राएली लोक, बल्कि सारी सेना बेतेल शईरो खे गई; ओर रोंदे ऊए यहोवे रे सामणे बैठे रे रये ओर तेस दिने साँजा तक कुछ नि खाया ओर यहोवे खे होमबलि ओर मेलबलि चढ़ाए। 27 ओर इस्राएलो रे लोके यहोवे ते सलाह् लई (तेस बखते यहोवे री वाचा रा सन्दूक तेथी था, 28 ओर पीनहास जो हारूणो रा पोता ओर एलीआजारो रा पाऊ था तिना दिना दे तेस सामणे आजीर रई की सेवा करो था) तिने पूछेया, "क्या आसे एक बार ओर आपणे पाई बिन्यामीनिया साथे लड़ने खे जाऊँ, या तिना खे छाडी देईए?" यहोवे बोलेया, "अमला कर, कऊँकि काल मां सेयो तुसा ते अराई देणे।" 29 फेर इस्राएली लोके गिबा शईरो रे चऊँ कनारे आपणे सिपाई ताका दे बठयाल़ी ते। 30 तीजे दिने फेर इस्राएली सिपाईए बिन्यामीनी लोका पाँदे अमला कित्तेया ओर पईले जड़े गिबा शईरो पाँदे अमला करने खे त्यार ऊईगे। 31 तेबे बिन्यामीनी सिपाई तिना लोका ते लड़ाई करने खे निकल़े पर इस्राएली सिपाई योजना रे मुताबिक शईरो ते दूर चली गे ताकि सेयो तिना रे पीछे-पीछे जाओ, सेयो इस्राएली लोका खे पईलके जेड़े बेतेल शईरो खे ओर गिबा शईरो खे जाणे वाल़िया बाटा दे काणे लगे। तिने कोई तीई इस्राएली लोक काई ते। 32 बिन्यामीनी सिपाई बोलणे लगे, "आसे सेयो पईलके जेड़े काईते।" पर इस्राएली सिपाईए बोलेया, "आसा नठदे ई रणा ताकि यो आसा पीछे शईरो ते बारे निकल़ी की सड़का दे आई जाओ।" 33 तेबे सब इस्राएली सिपाई आपणी जगा ते उठी की बालतामर शईरो दे लड़ाई करने खे आए। ओर जो दूजे लुखी की बैठे रे इस्राएली सिपाई आपणी जगा ते, मतलब गेबा शईरो रे पच्छमा ते अचाणक निकल़े। 34 तेबे सारे इस्राएली लोका बीचा ते खास चूने दे 10,000 सिपाई गिबा शईरो रे सामणे आए ओर बऊत लड़ाई ऊणे लगी; पर बिन्यामीनो रे सिपाई नि जाणो थे कि मुसीबत आसा पाँदे यबु ई पड़ने वाल़ी ए। 35 तेबे यहोवे बिन्यामीनी सिपाई इस्राएली सिपाईया ते अरवाई ते ओर तेस दिने इस्राएलिये 25,100 बिन्यामीनी सिपाई नाश करीते, जो सारे के सारे तलवार चलाणे वाल़े थे।

36 तेबे बिन्यामीनिये देखेया कि आसे अरीगे। ये तेबे ऊआ था जेबे इस्राएली सिपाई तिना लूकी की बैठे रे सिपाईया पाँदे परोसा करी की, जो तिने गिबा शईरो गे बठयाल़े थे, बिन्यामीनिया रे सामणे ते पीछे अटी गे थे। 37 पर लूकी की बैठे रे सिपाईए फटाफट गिबा शईरो पाँदे अमला कित्तेया ओर सारे शईरो रे सिपाई तलवारी साथे नाश करीते। 38 इस्राएली सिपाईया बीचे ओर लूके दे सिपाईया बीचे ये गल्ल ऊई थी कि तिना शईरो ते आग लगाई की तुआँ ड्वाणा। 39 जेबे इस्राएली सिपाईए तुआँ देखेया, तो सेयो पीछे मुड़ी की बिन्यामीनो रे सिपाईया पाँदे अमला करने लगे। तेस बखतो तक बिन्यामीनो रे सिपाई इस्राएली लोका रे तीई सिपाईया खे काई चुके थे, ओर सेयो चींगे, "आसे तिना खे तेड़े ई अराणे लगी रे जेड़े आसे सेयो पईलकिया लड़ाईया दे अराए थे।" 40 पर जेबे बिन्यामीनो रे सिपाईए पीछे मुड़ी की शईरो रे चऊँ कनारे ते तुआँ सर्गो रिया तरफा खे उठदा ऊआ देखेया, 41 तेबे इस्राएली सिपाई पीछे कूमे ओर बिन्यामीनी सिपाई ये देखी की कबराई गे कि आसे बड़िया मुसीबता दे पड़ी गे रे। 42 इजी री खातर बिन्यामीनी सिपाई उजाड़ जगा रिया बाटा रिये नठीगे, ओर इस्राएली सिपाई तिना रा पीछा करने लगे। पर सेयो इस्राएली लोका ते बची नि सके। इस्राएली सिपाई आपणे शईरा ते निकल़े ओर सेयो लड़ाईया दे कांदे रये। 43 तिने बिन्यामीनी सिपाईया पाँदे चऊँ कनारा ते अमला कित्तेया ओर तिना रा पीछा करदे रये। सेयो तिना खे गिबा शईरो रिया पूर्ब दिशा तक काणे लगी रे थे। 44 तिने बिन्यामीनो रे गोत्रो रे 18,000 तागतबर सिपाई काई ते। 45 तेबे बिन्यामीनो रे बाकी सिपाई उजाड़ जगा रिया तरफा खे, रिम्मोन नाओं री चट्टानी तक नठीगे। इस्राएली सिपाईए तिना बीचा ते 5,000 सिपाई काई ते जेबे सेयो नठणे लगी रे थे। तिने गिदोम शईरो तक तिना रा पीछा कित्तेया, ओर तेती तिने बिन्यामीनो रे 2,000 सिपाई काई ते। 46 तेस दिने जो बिन्यामीन गोत्रो रे 25,000 तलवार चलाणे वाल़े सिपाई काये थे यो सब तागतबर योद्धा थे। 47 पर 600 सिपाई कूमी की उजाड़ जगा रिया तरफा खे नठे ओर रिम्मोन नाओं री चट्टानी दे लूकी गे, ओर चार मीन्ने तक तेथी रये। 48 तेबे इस्राएली सिपाई वापस ऊईगे ओर बिन्यामीनिया रे सबी शईरा पाँदे अमला कित्तेया ओर माणूं, डांगर, ओर जो कुछ बी मिलेया, सारे तलवारी साथे नाश करी ते ओर तिना रे सबी शईरा दे जो तिना खे मिली रे थे आग लगाईती।