न्यायियो 10

न्यायी तोला ओर याईर

1 अबीमेलेको रे मरने ते बाद इस्राएलो खे छुड़ाणे खे तोला नाओं रा एक मर्द उठेया जो इस्साकार गोत्रो रा था, से दोदो रा पोता ओर पूआ रा पाऊ था ओर से एप्रैमो रे पाह्ड़ी प्रदेशो रे शामीर शईरो दे रओ था। 2 से तेई साला तक इस्राएलो रा न्याय करदा रया। तेबे से मरी गा ओर से शामीरो रे दबाईता। 3 तोला रे मरने ते बाद गिलाद शईरो रा याईर उठेया, से बाई साला तक इस्राएलो रा न्याय करदा रया। 4 तेसरे तीई पाऊ थे जो तीई गह्देया पाँदे बैठेया करो थे ओर तिना रे तीई शईर बी थे जो गिलाद प्रदेशो रे ए ओर तिना खे आजो तक हब्बोत्याईर बोलेया जाओआ। 5 ओर याईर मरी गा ओर से कामोन शईरो दे दबाईता।

इस्राएली लोका रा फेर पाप करना

6 तेबे इस्राएली लोके फेर यहोवे री नजरा रे बुरा कित्तेया, बाल देवता ओर अश्तोरेत देविया, अराम, सिदोन, मोआब, अम्मोनिया ओर पलिश्तिया रे देवतेया री पूजा करने लगे ओर यहोवे खे छाडीता ओर तेसरी सेवा नि कित्ती। 7 तेबे यहोवे रा रोष इस्राएलो पाँदे पड़केया ओर तिने सेयो लोक पलिश्ती ओर अम्मोनी जातिया रे लोका रिया गुलामिया दे जाणे दित्ते। 8 ओर तेस बखतो ते सेयो इस्राएली लोका खे सतांदे ओर दुख देंदे रये। बल्कि यरदन पार एमोरिया रे प्रदेश गिलादो रे रणे वाल़े सबी इस्राएली लोका ते लड़ने खे जाया करो थे। अम्मोनी लोक तिना पाँदे ठारा साला तक जुल्म करदे रये। 9 अम्मोनी लोक यहूदा, बिन्यामीन ओर एप्रैमो रे कराने साथे लड़ने खे यरदनो ते पार जाया करो थे, एथो तक कि इस्राएली लोक बड़ी मुसीबता दे पड़ीगे। 10 तेबे इस्राएली लोके मतादा रिया तँईं ये बोली की यहोवे री दुहाई दित्ती, "आसे जो आपणे परमेशरो खे छाडी की बाल देवतेया री पूजा कित्ती, ये आसे तेरे खलाफ बऊत बड़ा पाप करी राखेया।" 11 यहोवे इस्राएली लोका खे बोलेया, "मैं तुसे मिस्री, एमोरी, अम्मोनी ओर पलिश्तिया रे लोका रे आथो ते छुड़ाए थे! 12 फेर जेबे सीदोनी, ओर अमालेकी ओर माओनी लोके तुसा पाँदे जुल्म कित्तेया; ओर तुसे मेरी दुहाई दित्ती, तेबे मैं तुसे तिना रे आथो ते छुड़ाए! 13 तेबे बी तुसे माखे छाडी की पराये देवतेया री पूजा कित्ती; इजी री खातर मां तुसे फेर नि छुड़ाणे। 14 जाओ, आपणे तिना देवतेया री दुहाई देयो जिना री तुसे पूजा करोए; तुसा री मुसीबता रे बखते सेयो ई तुसा खे छुड़ाओ।" 15 इस्राएली लोके यहोवे खे बोलेया, "आसे पाप करी राखेया; इजी री खातर जो कुछ तेरी नजरा दे खरा ओ से ई आसा साथे कर; पर एबु आसा खे छुड़ाई दे।" 16 तेबे तिने पराये देवतेया रिया मूर्तिया आपू बीचा ते टाई तिया। तिजी ते बाद सेयो यहोवे री सेवा करने लगे, ओर से इस्राएली लोका रा दु:ख सईन नि करी सकेया। 17 तेबे अम्मोनी लोके कट्ठे ऊई की गिलाद प्रदेशो दे आपणे डेरे लगाए ओर इस्राएली लोके बी कट्ठे ऊई की मिस्पा दे आपणे डेरे लगाए। 18 तेबे गिलाद प्रदेशो दे बसे रे इस्राएली लोका रे परदान एकी-दूजे साथे बोलणे लगे, "जो कोई अम्मोनिया साथे युद्ध करने खे आगे जाणा से ई गिलादो रे सब रणे वाल़ेया रा परदान ठईरना।"