1 पर कुछ दिन बाद कणका री बडाईया रे बखते, शिमशोने बाकरिया रा बच्चा लया ओर आपणी लाड़िया ते मिलणे खे तेसा रे कअरे गया। पर तेसरे सऊरे से पीतरे जाणे नि दित्तेया। 2 ओर तेसरे सऊरे बोलेया, "माखे एड़ा लगेया था कि तूँ तेसा ते नफरत ई करेया, इजी री खातर मैं तेसा रा ब्या तेरे साथिये साथे करी ता। देख तेसा री छोटी बईण तेसा ते बी बांकी ए! तेसा रे बदले तेसा री बईणी साथे ब्या करी लो।" 3 इजी ते बाद शिमशोने बोलेया, "एबे चाए आऊँ पलिश्तिया रा नुकशाण बी करुँ, तेबे बी तिना रे बारे दे निर्दोष ई ठईरना।" 4 तेबे शिमशोने बारे जायी की 300 गीदड़िया पकड़िया ओर दो-दो गीदड़िया री पूँछ एकी साथे बानी की तिना बीचे एक-एक मशाल बानी। 5 तेबे मशाला दे आग लगाई की तिने गिदड़िया पलिश्तिया रे खड़ी फसला रे डोरूआ दे छाडी तिया। ईंयाँ तिना रे पूल़िया रे टेर, बल्कि खड़िया फसला रे डोरू ओर जैतूनो रे बगीचे बी फूकी गे। 6 तेबे पलिश्ती लोक पूछणे लगे, "ये काम किने करी राखेया?" तेबे लोके बोलेया, "तेस तिम्नाह रे जवांईए शिमशोने ये एड़ा इजी खे कित्तेया कि तेसरे सऊरे से जवाणस तेसरे साथिये खे ब्यायी ती।" तेबे पलिश्तिये जायी की से जवाणस ओर तेसा रा बाओ दोनो आगी दे फूकी की काईते। 7 जेबे एते कामो री जानकारी शिमशोनो खे मिली तेबे तिने तिना लोका खे बोलेया, "तुसे जो एड़ा काम कित्तेया, इजी री खातर मां तुसा ते बदला लयी की राखणा।" 8 तेबे तिने तिना पाँदे अमला कित्तेया ओर सेयो बड़ी ई बेरईमिया साथे काई ते; तेबे से आपू जायी की एताम नाओं री चट्टानी री एकी गुफा दे रणे लगेया।

9 तेबे पलिश्तिये यहूदा प्रदेशो रे लही शईरो दे फैली की तेती आपणे डेरे खड़े कित्ते। 10 तेबे यहूदा रे लोके तिना ते पूछेया, "तुसे आसा पाँदे अमला कऊँ लगी रे करने?" तिने ज्वाब दित्तेया, "शिमशोनो खे पकड़ने खे आई रे कि जेड़ा तिने आसा साथे करी राखेया तेड़ा ई आसे बी तेस साथे करुँ।" 11 तेबे 3,000 यहूदी मर्द एताम नाओं री चट्टानी री गुफा गे जायी की शिमशोनो खे बोलणे लगे, "तूँ तो जाणेया कि पलिश्ती लोक आसा पाँदे राज करोए! तेबे तैं आसा साथे एड़ा कऊँ करी राखेया?" शिमशोने तिना खे बोलेया, "जेड़ा तिने मां साथे करी राखेया था, तेड़ा ई मैं बी तिना साथे कित्तेया।" 12 यहूदा प्रदेशो रे मर्दे शिमशोनो ते बोलेया, "आसे ताखे बानी की पलिश्तिया रे आथो दे करने खे आयी रे।" शिमशोने तिना खे बोलेया, "मां साथे कसम खाओ कि तुसा आऊँ नि काणा।" 13 तिने बोलेया, "एड़ा नि ऊणा, आसा तूँ बानी की तिना रे आथो दे करी देणा; पर तूँ किंयाँ बी काणा नि।" तेबे सेयो तेसखे दो नवीं रस्सिया साथे बानी की तेसा चट्टानी ते लयी गे।

14 जेबे सेयो शिमशोनो खे लही शईरो तक लई की ल्याये थे कि पलिश्ती तेसखे देखी की ललकारने लगे; तेबे से यहोवे रिया तागती ते एड़ा परीगा कि तेसरिया बांई री रस्सिया आगी रे फूके रे सणी रे टाल्लेया जेड़ी ऊईगिया ओर तेसरे आथो रे बान मानो जल़ी की टूटी गे। 15 तेबे तेसखे एबु मरे दे गह्दे रे जबड़े री आड्डी मिली ओर तिने आथ बढ़ाई की से लयी ओर तेते साथे 1,000 पलिश्ती मर्द काई ते। 16 तेबे शिमशोने बोलेया, "गह्दे री आड्डिया ते टेरो रे टेर लगी गे, गह्दे रे जबड़े री आड्डिया ते ई मैं 1,000 मर्द काई ते।" 17 जेबे से एड़ा बोली चुकेया, तेबे तिने जबड़े री आड्डी सेटी ती ओर तेसा जगा रा नाओं "रामत-लही" राखेया। 18 तेबे शिमशोनो खे बऊत त्याय लगी ओर तिने यहोवे खे आका पायी की बोलेया, "तैं आपणे दासो ते ये बड़ा छुटकारा करवाई राखेया; तेबे क्या आऊँ त्याया मरी की तिना बिना खतना कित्ते रे लोका रे आथो दे पड़ूँ?" 19 तेबे परमेशरे लही शईरो दे ऊखल़िया जेड़ा गड्डा करी ता ओर तिजी बीचा ते पाणी निकल़ने लगेया ओर जेबे शिमशोने पिया, तेबे तेसरे जियूए दे जियू आईगा ओर तेबे से फेर ताजा दम ऊई गा। इजी बजअ ते तेसा सूबल़ा रा नाओं "एनहक्कोरे" राखेया, से आजो तक लही शईरो दे ए। 20 शिमशोन तो बीइ साला तक इस्राएली लोका रा न्याय करदा रया जेबे पलिश्ती लोक तिना पाँदे राज करो थे।