1 जिंयाँ ई लड़ाई खत्म ऊई तेस ई दिने दबोरा ओर अबीनोअमो रे पाऊ बाराके ये गाणा गाया:

2 इस्राएलो रे परदाने जो लड़ाईया दे अगुवाई कित्ती

ओर प्रजा रे लोक जो आपणी मर्जिया ते लड़ाईया दे गये,

इजी रिया खातर यहोवे री महिमा करो!

3 ओ राजेयो, सुणो; ओ परदानो, त्यानो दे सुणो,

मां आपू यहोवे खे गीत गाणा;

इस्राएलो रे परमेशर यहोवे रा मां पजन करना।

4 ओ यहोवा, जेबे तूँ सेईर पाह्ड़ो ते निकल़ी की चलेया,

ओर जेबे तूँ एदोम प्रदेशो ते बारे निकल़ेया,

तेबे तरती ईलणे लगी ओर सर्गो दे बादल़ गरजणे लगे,

बादल़ा ते बऊत पाणी बरसणे लगेया।*

5 सीनै रे पाह्ड़ो दे यहोवे रे सामणे,

इस्राएलो रे परमेशर यहोवे रे सामणे पाह्ड़ कांबणे लगेया।

6 अनातो रे पाऊ शमगरो रे बखतो दे,

ओर याएलो रे बखतो दे सड़का सूनिया पड़ी रिया थिया,

ओर सब लोक बाटा रिये चलो थे।

7 जदुओ तक आऊँ दबोरा न्याय करने खे नि आई,

ओर जदुए तक आऊँ इस्राएली लोका खे माया जेड़ी बणी की नि उठी,

तदुओ तक तेथो रे गाँवो री रक्षा करने वाल़ा कोई नि था।*

8 इस्राएली लोक नवें-नवें देवतेया खे मानो थे,

ओर तेस बखते शईरा दे लड़ाई ओ थी।

40,000 इस्राएली लोका बीचे केसी गे बी ढाल

या बर्छी केथी देखणे दे नि आओ थी।

9 यहोवे खे तन्य बोलो।

मेरा मन इस्राएलो रे अगुवे रिया तँईं खुश आ,

कऊँकि सेयो प्रजा बीचा ते लड़ने खे आपणी ई इच्छा ते आई रे।

10 ओ सफेद गह्दिया पाँदे चढ़णे वाल़ेयो,

ओ नरम किमती गद्दिया पाँदे बैठणे वाल़ेयो,

ओ बाटा दे पैदल चलणे वाल़ेयो! त्यान राखो।

11 बाँई गे जवाणसा जोरे की गाणे लगी रिया,

तेती तिना यहोवे रे तर्मो रे कामो रा,

इस्राएलो रिया तँईं तेसरे तर्मो रे कामो रा बखान करना।

तेस बखते यहोवे री प्रजा रे लोक बड़े द्वारो गे गये।

12 जाग, जाग, ओ दबोरा!

जाग, जाग, गीत सुणा! ओ बाराक, उठ,

ओ अबीनोअमो रे पाऊ,

आपणे गुलामा खे आगे लयी चल।

13 ताबोरो ते थाले थोड़े जे अमीरा रे खलाफ चढ़ाई कित्ती

यहोवे रे लोके शूरवीरा पाँदे चढ़ाई कित्ती।*

14 एप्रैमो बीचा ते सेयो आए जेसरी जड़ अमालेको दे ए;

ओ बिन्यामीन, तां पीछे तेरे दलो दे,

माकीरो बीचा ते परदान ओर जबूलूनो बीचा ते सेनापति आए, कुछ सरदार राजदण्ड लयी की उतरे;*

15 ओर इस्साकारो रे परदान दबोरा साथे ऊए,

जेड़ा इस्साकार तेड़ा ई बाराक बी था;

सेयो तेस पीछे तराईया दे उतरी गे।

पर रूबेन गोत्रो रे लोक दो पाग ऊईगे, सेयो आऊणे रे बारे दे नि सोची सके।

16 तूँ कऊँ ग्वाल़ेया रा सीट्टी बजाणा सुणने खे पेडा रिया गवाईणी दे बैठेया रा रया?

रूबेनो री नदिया रे नेड़े बड़े-बड़े काम सोचे।

17 गिलाद यरदन नदिया ते पार रयी गा; ओर दान कऊँ जाह्जो रे रयी गा?

आशेर समुद्रो रे कनारे बिना डरे बैठेया रा रया

ओर समुद्रो रे कनारे रयी गा।

18 जबूलून आपणे प्राणो पाँदे खेलणे वाल़े लोक ठईरे;

नप्ताली लोक बी देशो री ऊच्ची-ऊच्ची जगा दे तेड़े ई ठईरे।

19 राजे आई की लड़े,

तेस बखते कनानो रे राजा

मगिद्दो री सूबल़ा रे नेड़े तानाको दे लड़े;

पर सेयो चाँदिए खे नि लूटी सके।*

20 सर्गो रिया तरफा ते बी लड़ाई ऊई;

बल्कि तारेया आपणे-आपणे मण्डल़ो ते सीसरा साथे लड़ाई कित्ती।

21 कीशोन नदिये सेयो हड़ाई ते,

मतलब से ई पुराणी नदी जो कीशोन नदी ए।

ओ मन, याओ बानी की आगे बढ़।

22 तेस बखते कोड़ेया रे खुरा ते चलणे री आवाज ऊणे लगी,

तिना रे तगड़े कोड़ेया रे उटकणे ते एड़ा ऊआ।

23 यहोवे रा दूत बोलोआ,

कि मेरोज शईरो खे स्राप देयो, तेती रणे वाल़ेया खे पारी स्राप देयो,

कऊँकि सेयो यहोवे री मताद करने खे,

शूरवीरा रे खलाफ यहोवे री मताद करने खे नि आए।

24 सबी जवाणसा बीचे केनी हेबेरो री लाड़ी याएल तन्य ठईरनी;

डेरे दे रणे वाल़िया सबी जवाणसा बीचे से तन्य ठईरनी।*

25 सीसरे पाणी मांगेया, तेसे दूद दित्तेया,

अमीरा जोगा पांडेया दे से नऊणीं लई आयी।

26 तेसे आपणा आथ खूँडिया रिया तरफा खे,

ओर आपणा दाँणा आथ बढ़ईये रे थौड़े रिया तरफा खे बढ़ाया;

ओर थौड़े ते सीसरा काया, तेसरा सिर फाड़ेया ओर तेसरी कनपटी वार-पार कोरी ती।

27 तेसा जवाणसा रे पैरा पाँदे से नपी गा, से रूड़ेया, से पड़ेया रा रया;

तेसा जवाणसा रे पैरा पाँदे से नपेया, से रूड़ेया;

जेती नपेया, तेथी मरेया रा पड़ेया रा रया।

28 द्वारिया बीचा ते सीसरा री माये लमखी की चींगी,

सीसरा रिये माये झिलमिलो रे पीछा ते आक पायी,

तेसरे रथो खे आऊणे दे इतणी देर कऊँ लगी?

तेसरे रथो रे टईरा खे देर कऊँ लगी री?

29 तेसरी अक्लमंद जवाणसे तेसा खे ज्वाब दित्तेया,

बल्कि तेसे आपणे आपू खे ईंयाँ ज्वाब दित्तेया,

30 क्या तिने लूट पाई की बांडी नि लयी?

क्या एकी-एकी मर्दो खे एक-एक, बल्कि दो-दो कुआँरिया;

ओर सीसरा खे रंगे रे टाल्लेया री लूट,

बल्कि बूटे कढ़ाई कित्ते रे टाल्लेया री लूट,

ओर लूटे रे गल़ेया रे दुँईं तरफा खे कढ़ाई कित्ते रे टाल्ले नि मिले?

31 ओ यहोवा, "तेरे सारे दुश्मण ईंयाँ ई नाश ऊई जाओ!

पर तेस साथे प्यार राखणे वाल़े लोक प्रतापो साथे उदय ऊँदे ऊए सूरजो जेड़े तेजोमय ओ।" तेसते बाद तेबे देशो दे चाल़िया साला तक शान्ति रयी।*