1 एक दिन यरूब्बालो रा पाऊ अबीमेलेक शकेम शईरो खे आपणे मामेया गे जाई की तिना ते ओर आपणे नाने रे सारे करानेया खे ईंयाँ बोलणे लगेया, 2 "शकेमो रे सारे परदान माणूंआ ते ईंयाँ पूछो, ‘तुसा खे क्या पला ए?’ क्या ये कि यरूब्बालो रे सत्तर पाऊ तुसा पाँदे राज करो? या कि एक ई माणूं तुसा पाँदे राज करो? ओर ये बी याद राखो कि आऊँ तुसा रा ई रिश्तेदार ए।" 3 तेबे तेसरे मामेया शकेमो रे सारे परदाना ते एड़ी ई गल्ला बोलिया ओर तिने ये सोची की कि अबीमेलेक तो म्हारा रिश्तेदार ए आपणा मन तेसरिया तरफा खे करिता। 4 तेबे शकेमो रे लोके बाल-बरीत देवते रे मन्दरो ते चाँदिए रे सत्तर टुकड़े* अबीमेलेको खे दित्ते; ओर तिने तिना टुकड़ेया की कुछ नीच ओर कटीया माणूं आपू साथे राखे, जो तेस साथे ऊईगे। 5 तेबे तिने ओप्रा शईरो दे आपणे बाओ रे कअरे जाई की आपणे पाई जो यरुब्बालो रे सत्तर पाऊ थे एक ई पात्थरो पाँदे काईते; पर यरूब्बालो रा योताम नाओं रा सबी ते छोटा जा पाऊ लूकी की बचीगा। 6 तेबे शकेमो रे सारे परदान माणूंए ओर बेतमिल्लो शईरो रे सारे लोक कट्ठे ऊई की शकेमो रे खम्बे गे बड़े डाल़ो रे नेड़े अबीमेलेक राजा बणाईता।

7 जेबे ये सन्देश योतामो खे मिलेया तेबे से गिरिज्जीमो रे पाह्ड़ो री चूँडिया पाँदे जाई की खड़ा ऊआ ओर जोरे की आका पाई की बोलणे लगेया, "ओ शकेमो रे परदानो, मेरी सुणो, ताकि परमेशर बी तुसा री सुणो।" 8 एक बार डाल़ आपणिया तँईं राजा चुणने खे निकल़े तेबे तिने जैतूनो रे डाल़ो खे बोलेया, "तूँ आसा पाँदे राज कर।" 9 तेबे जैतूनो रे डाल़े बोलेया, "क्या आऊँ आपणे तेलो खे बनाणा छाडी देऊँ, जेते की लोक ईश्वर ओर माणूं दुँईं रा आदर-मान करोए, डाल़ा रा राजा ऊई की ओरे-पोरे रिंडणे खे चलूँ?"

10 तेबे डाल़े दाऊगल़े रे डाल़ो खे बोलेया, "तूँ आई की आसा पाँदे राज कर।" 11 दाऊगल़े रे डाल़े तिना खे ज्वाब दित्तेया, "क्या आऊँ आपणी मीठास ओर आपणे बडिया-बडिया फल़ो खे छाडी की डाल़ा रा राजा ऊई की रिंडणे खे चलूँ?" 12 तेबे डाल़े अंगूरा री बेला खे बोलेया, "तूँ आयी की आसा पाँदे राज कर।" 13 अंगूरा री बेले तिना खे बोलेया, "क्या आऊँ आपणे नवें रसो खे छाडी की, जेते की ईश्वर ओर माणूं दुँईं खे मजा आओआ, डाल़ा रा राजा ऊई की ओरे-पोरे रिंडणे खे चलूँ?"

14 तेबे सबी डाल़े कांडेवाल़ी चाड़िया खे बोलेया, "तूँ आयी की आसा पाँदे राज कर।" 15 कांडेवाल़ी चाड़िये तिना खे बोलेया, "जे तुसे आपू पाँदे राजा ऊणे खे मेरा अभिषेक सच्चाईया साथे करोए, तो आई की मेरिया छांयी दे शरण लओ नई तो कांडेवाल़ी चाड़िया ते आग निकल़नी जेते की लबानोन जगा रे देवदारा रे डाल़ बी जल़ी की स्वा ऊई जाणे।"

16 पर एबे तुसे इना गल्ला रे बारे दे सोचो कि क्या तुसे सच्चाई ओर खराईया ते अबीमेलेको खे राजा बणाया? क्या यरूब्बाल ओर तेसरे कराने साथे तुसे पलाई करी राखी? क्या तुसे यरूब्बालो रे कामा रा तेसरे परिवारो साथे ठीक बर्ताव करी राखेया? 17 मेरा बाओ तो तुसा रिया तँईं लड़ेया ओर आपणे प्राणो पाँदे खेली की तुसे मिधानिया रे वशो ते छुड़ाए। 18 फेर तिने तिना परदान लोका खे बोलेया, पर तुसे आज मेरे बाओ रे कराने रे खलाफ उठी की बऊत बुरा कित्तेया ओर तेसरे सत्तर पाऊ एक ई पात्थरो पाँदे काये ओर तेसरी रखैला रा पाऊ अबीमेलेक इजी खे शकेमो रे लोका पाँदे राजा बणाया कि से तुसा रा रिश्तेदार ए। 19 इजी री खातर तुसे लोके आजके दिने यरूब्बाल ओर तेसरे कराने साथे सच्चाई ओर खराईया साथे बर्ताव करी राखेया ओ, तो अबीमेलेको रिया बजअ ते मजे करो ओर से बी तुसा रिया बजअ ते मजे करो; 20 ओर नई, तो अबीमेलेको एड़ी आग पेजणी जेते की शकेमो रे परदान लोक ओर बेतमिल्लो स्वा ऊई जाओ ओर शकेमो रे माणूं ओर बेतमिल्लो रे लोका अबीमेलेक आगी दे पाई की स्वा करी देणा। 21 तेबे योताम नठी गा ओर आपणे पाई अबीमेलेको रे डरो रे मारे बेर शईरो खे जाई की तेथी रणे लगेया। 22 अबीमेलेक इस्राएलो पाँदे तीन साल तक परदान रया। 23 तेबे परमेशरे अबीमेलेक ओर शकेमो रे परदान लोका बीचे एक बुरी आत्मा पेजी ती; तेबे शकेमो रे माणूं अबीमेलेको साथे विश्वासघात करने लगे; 24 ये इजी खे ऊआ कि यरूब्बालो रे सत्तर पाऊआ खे काणे री सजा अबीमेलेक ओर शकेम शईरो रे परदाना खे मिलो कऊँकि तिने एस पापो खे करने दे अबीमेलेको री मताद कित्ती थी। 25 तेबे शकेमो रे परदाने पाह्ड़ा री चूँडिया पाँदे अबीमेलेको रा बिरोद करने खे कुछ माणूं बठयाल़े, जो तेसा बाटा रे सबी आऊणे-जाणे वाल़ेया खे लूटो थे ओर एतेरा सन्देश अबीमेलेको खे मिलेया।

26 तेबे एबेदो रा पाऊ गाल आपणे पाईया समेत शकेमो रे आया; ओर शकेमो रे परदाने तेसरा परोसा कित्तेया। 27 फसला रे कट्ठे करने रे बखते तिने जायी की आपणे-आपणे अंगूरा रे बगीचे रे फल तोड़े ओर तिना रा रस निकाल़ेया। तेबे सेयो त्यार मनाणे खे कट्ठे ऊए तेती तिने स्तुतिया रा बलिदान करी की आपणे देवतेया रे मन्दरो रे जाई की खाणे पीणे ओर अबीमेलेको खे कोसणे लगे। 28 तेबे एबेदो रे पाऊ गाले बोलेया, "अबीमेलेक कुण ए जो आसा पाँदे राज करो? आसे शकेम शईरो रे लोक तेसरी सेवा कऊँ करिए? क्या से यरूब्बालो रा पाऊ नि ए? क्या जबूल तेसरा सेना रा परदान नि ए? शकेम शईरो रा मूल तो हमोर ई ए। तो आसा पाँदे सेई राजा अच्छा लगोआ जो म्हारे कुलो रा ओ। 29 जे आऊँ इना रा परदान ऊँदा तो मां अबीमेलेक आपणे लोका ते दूर करना था।" तेबे मां अबीमेलेको खे ईंयाँ बोलणा था, "आपणी सेना री गिणती बढ़ाई की निकल़ी की मां साथे लड़ने खे आओ।"

30 एबेदो रे पाऊ गालो रिया इना गल्ला खे सुणी की शकेम शईरो रे परदान जबूलो रा रोष पड़केया। 31 ओर तिने अबीमेलेको गे अरूमा शईरो दे चोरिए जे दूता गे सन्देसा पेजेया, "एबेदो रा पाऊ गाल ओर तेसरे पाई शकेमो दे आयी की शकेम शईरो वाल़ेया खे तेरे खलाफ करने खे सकेल़ने लगी रा। 32 इजी खे तूँ राती रे बखते सेना साथे आओ ओर डोरूआ दे लूकी जाओ। 33 ओर प्यागा सूरजो रे निकल़दे ई उठी की एते शईरो पाँदे अमला कर ओर जेबे गाल आपणे साथिया समेत तां साथे लड़ने खे आओ तो तूँ तिना पाँदे अमला करना।" 34 तेबे अबीमेलेक ओर तेस साथले सारे सिपाई राती रे बखते गये ओर चार चूण्ड बणाई की शकेम शईरो दे तिना रे खलाफ ताका दे बैठीगे। 35 दूजे दिने प्यागा एबेदो रा पाऊ गाल बारे जाई की शईरो रे बड़े द्वारो गे खड़ा ऊई गा; तेबे अबीमेलेक ओर तेसरे लोके ताक लगाणा छाडी की उठी की खड़े ऊईगे। 36 तिना लोका खे देखी की गाल जबूलो खे बोलणे लगेया, "देख, पाह्ड़ो रिया चूँडिया ते लोक उतरी की आऊणे लगी रे!" जबूले तेसखे बोलेया, "ये तो पाह्ड़ो री छांए ए जो ताखे माणूंआ जेड़े दिखोए।" 37 गाले फेर बोलेया, "देख, लोक देशो रे बिछिए ऊई की उतरी की आऊणे लगी रे ओर एक चूण्ड मोननीम* नाओं रे बड़े डाल़ो रिया बाटा दे चली की आऊणे लगी रा।" 38 जबूले तेसखे बोलेया, "तेरिया सेयो बड़िया-बड़िया गल्ला केई रईया जो तैं बोलिया थिया, कि अबीमेलेक कुण ए कि से आसा पाँदे राज करो? यो तो सेयो लोक ए जो तैं नकम्मे जाणे थे; इजी री खातर एबे निकल़ी की तिना साथे लड़।" 39 तेबे गाल शकेमो रे मर्दा रा अगुवा ऊई की बारे निकल़ी की अबीमेलेको साथे लड़ेया। 40 ओर अबीमेलेक गाल ओर तेसरे लोका खे काँदे ऊए तिना रा पीछा करने लगेया। गाल ओर तेस साथे जो लोक थे सेयो डरी की पीछे नठीगे। ओर तिना बीचा ते बऊत सारे लोक शईरो रे बड़े द्वारो तक पऊँछदे-पऊँछदे कायल ऊई की मरी गे। 41 तेबे अबीमेलेक अरूमा शईरो दे वापस आई की रणे लगेया; ओर जबूले गाल ओर तेसरे पाई शकेमो ते बारे निकयाल़ी ते। 42 दूजे दिने लोक डोरूआ दे काम करने खे निकल़ी गे ओर ये अबीमेलेको खे बताया। 43 ओर तेबे तिने आपणी सेना रे तीन दल बणाई की डोरूआ दे ताक लगाई की बैठीगे ओर जेबे देखेया कि लोक शईरो ते निकल़ी की आऊणे लगी रे, तेबे तिना पाँदे अमला कित्तेया। 44 अबीमेलेक आपणे साथले दलो साथे आगे दौड़ी की शईरो रे बड़े द्वारो पाँदे खड़ा ऊई गा ओर बाकी दुँईं दले तिना सारे लोका पाँदे अमला करी की जो डोरूआ दे थे सेयो काई ते। 45 तेबे अबीमेलेके शईरो रे लोका साथे पूरा दिन लड़ी की से लयी ला ओर तेथो रे लोका खे काई की शईर टाल़ी ता ओर तेते शईरो दे लूण छड़काईता।

46 ये सुणी की शकेमो रे गुम्मटो रे नेड़े रणे वाल़े सारे परदान लोक एलबरीतो रे मन्दरो रे गढ़ो दे जाई की लूकी गे। 47 जेबे अबीमेलेको खे ये सन्देश मिलेया कि शकेमो रे सारे परदान लोक शकेमो रे गुम्मटो दे कट्ठे ऊई रे, 48 तेबे से आपणे सारे साथिया समेत सलमोन नाओं रे पाह्ड़ो पाँदे चढ़ीगा ओर अबीमेलेके आथो दे क्वाड़ी लयी की डाल़ो री एक पाँगटी बाडी ओर से चकी की आपणी कान्दा पाँदे राखी ती ओर आपणे साथो रेया लोका खे बोलेया, "जेड़ा तुसे आऊँ करदे ऊए देखेया तेड़ा ई तुसे बी फटाफट करो।" 49 तेबे तिने सबी लोके बी एक-एक पाँगटी बाडी ली ओर अबीमेलेको पीछे शकेमो खे चली की गढ़ो दे सेटी की तिदे आग लगाईती, तेबे शकेम शईरो रे मन्दरो रे गुम्मटो रे सारे जवाणसा मर्द जो तकरीबन 1,000 थे मरी गे।

50 तेबे अबीमेलेक ओर तेसरे साथी लोक तेबेस शईरो खे जाई की से चऊँ कनारा ते केरी ता ओर से आपणे कब्जे दे करिता। 51 पर तेस शईरो बीचे एक मजबूत गुम्मट था, तेबे सब जवाणसा, मर्द ओर परदान लोक नठी की तिदे कूसी गे ओर तिजी रे द्वार बन्द करी की गुम्मटो रे छतो पाँदे चढ़ीगे। 52 तेबे अबीमेलेक गुम्मटो रे नेड़े जायी की तिना ते लड़ने खे गुम्मटो रे द्वारो तक गया, ताकि तिदे आग लगाओ। 53 तेबे केसी जवाणसे चाक्किया पाँदला पूड़ अबीमेलेको रे सिरो पाँदे सेटिता ओर तेसरी खोपड़ी फटी गी। 54 तेबे तिने फटाफट आपणे अथियार टोणे वाल़ा जवान बुलाया ओर तेसखे बोलेया, "आपणी तलवार खींजी की माखे काईदे, एड़ा नि ओ कि लोक मेरे बारे दे बोलणे लगो कि से एकी जवाणसे काया।" तेबे तेसरे जवाने तलवार तेसरे पेटो दे कूसायी ती ओर से मरी गा। 55 ये देखी की कि अबीमेलेक मरी गा रा तेस साथे जो इस्राएली लोक थे सेयो आपणी-आपणी जगा खे चली गे। 56 ईंयाँ जो दुष्ट काम अबीमेलेके आपणे सत्तर पाईया खे काई की आपणे बाओ साथे कित्तेया था, तेतेरा बदला परमेशरे तेसते लया; 57 ओर शकेमो रे लोका खे बी तिना रे सारे दुष्ट कामा रा बदला परमेशरे तिना ते लया ओर यरूब्बालो रे पाऊ योतामो रा स्राप तिना पाँदे पूरा ऊआ।