1 तेसा राती राजे खे नींज नि आई, इजी री खातर तेसरिया आज्ञा ते इतियासो री कताब ल्याई ओर पढ़ी की राजे गे सुणाई। 2 तिदे ये लिखेया रा मिलेया कि जेबे राजा क्षयर्षो रे परदान जो द्वारपाल बी थे, तिना बीचा ते बिगताना ओर तेरेश नाओं रे दो जणेया तेस पाँदे अमला करने री साजिश कित्ती थी, ये गल्ल मोर्दकैए सामणे ल्याई थी। 3 तेबे राजे पूछेया, "इजी रे बदले मोर्दकैए री क्या प्रतिष्ठा ओर तारीफ कित्ती?" राजे रे जो सेवक तेसरी सेवा करो थे, तिने तेसखे ज्वाब दित्तेया, "तेसखे कुछ पनि कित्तेया।"

4 तेबे राजे पूछेया, "आँगणो दे बारे कुण ए?" तेस बखते तो हामान राजे रे मईलो रे आँगणो दे एड़ी इच्छा ते आया था कि जो खम्बा तिने मोर्दकैए खे त्यार कराई राखेया था, तेते पाँदे तेसखे लटकाणे री चर्चा राजे साथे करो। 5 तेबे राजे रे सेवके तेसखे बोलेया, "आँगणो दे तो हामान खड़ी रा।" राजे बोलेया, "तेसखे पीतरे बुलाई की ली आओ।" 6 जेबे हामान पीतरे आया तेबे राजे तेसते पूछेया, "जेस माणूंए री प्रतिष्ठा राजा करना चाओ, तो तेसखे क्या करना ठीक ए?" हामाने ये सोची की कि मांते जादा राजा केसरी प्रतिष्ठा करना चाओगा? 7 तिने राजे खे ज्वाब दित्तेया, "जेस माणूंए री प्रतिष्ठा राजा करना चाओ, 8 तेसखे राजकीय टाल्ले ल्याये जाओ, जो राजा पईनोआ ओर एक कोड़ा बी, जेस पाँदे राजा बैठोआ ओर तेसरे सिरो पाँदे जो राजमुकुट राखेया जाओआ, से बी ल्याया जाओ। 9 तेबे सेयो टाल्ले ओर से कोड़ा राजे रे केसी बड़े परदानो गे सम्बाल़ेया जाओ ओर जेसरी प्रतिष्ठा राजा करना चाओ, तेसखे से टाल्ले पन्याओ ओर तेस माणूंए खे कोड़े पाँदे सवार करी की, शईरो रे चौको दे तेसखे कूमाया जाओ ओर तेसते आगे-आगे ये प्रचार कराया जाओ कि जेसरी प्रतिष्ठा राजा करना चाओआ तेस साथे एड़ा ई करेया जाणा।"

10 राजे हामानो खे बोलेया, "फटाफट करी की आपणे बोलो रे मुताबिक तिना टाल्लेया खे ओर तेस कोड़े खे लई की, तेस यहूदी मोर्दकैए साथे जो राजमईलो रे बड़े द्वारो दे बैठेया करोआ, तेड़ा ई कर, जेड़ा तैं बोलेया, तिदे कोई बी कमी नि ऊणी चाईयो।" 11 तेबे हामाने सेयो टाल्ले ओर तेस कोड़े खे लई की मोर्दकैए खे पन्याए ओर से कोड़े पाँदे चढ़ाई की, शईरो रे चौको दे ईंयाँ आका पाँदा ऊआ कूमाया, "जेसरी प्रतिष्ठा राजा करना चाओआ, तेस साथे एड़ा ई करेया जाणा।" 12 तेबे मोर्दकै तो राजमईलो रे बड़े द्वारो गे वापस ऊईगा, पर हामान दु:ख करदा ऊआ ओर आपणा मूँ लकोई की फटाफट आपणे कअरो खे चली गा।

13 तेबे हामाने आपणी लाड़ी जेरेश ओर आपणे सबी दोस्ता गे सब कुछ जो तेस पाँदे बीतेया था दशेया। तेबे तेसरे अक्लमंद दोस्ते ओर तेसरी लाड़िए तेसखे बोलेया, "मोर्दकै जेसखे तूँ अराणा चाए था, जे से यहूदिया रे कुलो राए, तो तूँ तेसखे कदी नि अराई सकदा तेसते पूरी तरअ ते अरी जाणा।" 14 सेयो तेस साथे गल्ला करने ई लगी रे थे कि राजे रे खुसरे आई की हामानो खे एस्तेरा री कित्ती री पाट्टिया दे फटाफट बुलाई की लईगे।