बांके गाणे 5

वर

1 ओ मेरी प्यारी, ओ मेरी मंगेतर,

आऊँ आपणे बगीचे रे आई रा,

मैं आपणा गन्धरस ओर लोबान चूणी ला रा;

मैं छते ते निकल़दे ऊए सईतो खे खाई ला,

मैं दूद ओर अंगूरा रा रस पी ला।

सेलिया,

ओ दोस्तो, तुसे बी खाओ,

ओ प्यारेओ, पियो, जितणा जिऊ बोलोआ, तिथणा पियो!

चौथा गाणा

वधू

2 आऊँ सुती री थी, पर मेरा मन जागेया रा था।

सुण, मेरा प्रेमी दरवाजा खटखटाओआ ओर बोलोआ,

वर

"ओ मेरी लाड़ी, ओ मेरी प्यारी, ओ मेरी कबूतरी,

ओ मेरी निष्कलंक सुन्दरी, माखे दरवाजा खोल,

कऊँकि मेरा सिर पाल़े साथे सीजी रा

ओर मेरिया लटा राती पड़े रे पाल़े रे टीपे साथे सीजी रिया।"*5:2 प्रकाशित 3:20

वधू

3 आऊँ आपणे टाल्ले खोली चूकी थी, आऊँ तिजी खे फेर किंयाँ पईनूँ?

आऊँ तो आपणे पैर तोई चूकी थी, एबे तिना खे जमीना दे राखी की मईला किंयाँ करुँ?

4 मेरे प्रेमिये आपणा आथ दरवाजे रे छेदो ते पीतरे पाया,

तेबे मेरा मन तेसरे प्यारो ते परी गा,

5 आऊँ आपणे प्रेमिये खे दरवाजा खोलणे खे उठी,

ओर मेरे आथो ते गन्धरस टपकेया,

ओर मेरी गूठिया ते टपकदा ऊआ गन्धरस दरवाजे रिया आथिया पाँदे पड़ेया।

6 आऊँ आपणे प्रेमिये खे दरवाजा खोलणे ई लगी री थी,

पर मेरा प्रेमी मुड़ी की चलीगा था।

जेबे से बोलणे लगी रा था, तेबे आऊँ डरी गी थी,

मैं से टोल़ेया, पर मिलेया नि;

मैं तेसखे आका पाईया, पर से नि सुणेया।

7 पईरा देणे वाल़े जो शईरो दे कूमणे लगी रे थे,

तिने आऊँ टीसी ओर कायल कित्ती,

पईरेदारे मेरी चाद्दर मांते छुड़ाई ती।

8 ओ यरूशलेमो री जवाणसो, आऊँ तुसा खे कसम देई की बोलूँई कि जे मेरा प्रेमी तुसा खे मिली जाओ,

तो तेसखे बोली देणा कि आऊँ तेरे प्यारो रिया तँईं तड़फणे लगी री।

सेलिया

9 ओ जवाणसा बीचे सबी ते बांकी,

तेरा प्रेमी ओरी प्रेमिया ते किजी गल्ला रे खरा ए?

तूँ आसा खे एड़ी कसम कऊँ देणे लगी री?

वधू

10 मेरा प्रेमी गोरा ओर लाल जा ए,

से ह्जारा बीचे एक ए।

11 तेसरा सिर शुद्ध सूईने जेड़ा ए,

तेसरी लटकदी ऊईया बाल़ा रिया लटा कावा जेड़िया काल़िया ए।

12 तेसरिया आखी तिना कबूतरा जेड़िया बांकिया ए,

जो दूदो दे नाह्या रा जेड़ा नदिया रे कनारे

आपणे चूण्डो साथे एक पाल़िया रे बैठी रा ओ।

13 तेसरिया खाखा बलसानो रिया क्यारिया जेड़िया ए, जो खुशबू बखेरोईया,

तेसरे ओठ मानो सोसणो रे फूलो जेड़े ए जिना ते गन्धरस टपकदा रओआ।

14 तेसरे आथ सूईने री छड़िया जेड़े ए जेते पाँदे किमती पात्थर फिरोजे साथे कारीगरी करी राखी।

तेसरा शरीर मानो आथिये रे दाँदो रा बणेया राए ओर तिदे नीलमणिया जड़ी राखिया।

15 तेसरे पैर संगमरमरो रे खम्बे जेड़े ए जो शुद्ध सूईने पाँदे बठयाई राखे।

से देखणे रे लबानोनो रे पाह्ड़ो जेड़े ओर सुन्दरता दे देवदारो रे डाल़ा जेड़ा ए।

16 तेसरी बाणी बऊत मीठी ए, आ, से बऊत बांका ए।

ओ यरूशलेमो री जवाणसो, येई मेरा प्रेमी ए, ओर येई मेरा दोस्त ए।