1 खरा ऊँदा कि तूँ मेरा पाई ऊँदा,

जिने मेरिया माया रा दूद पिया!

तेबे आऊँ ताखे कअरो ते बारे मिली की तेरे गल़े लगदी,

तो केसी मेरी बेजती नि करनी थी।

2 आऊँ ताखे आपणी माया रे कअरे लई चलदी

ओर तेसा माखे सिखाणा था

ओर मां ताखे मसाला मिलेया रा अंगूरा रा रस ओर आपणे अनारा रा रस पल़्याणा था।

3 काश, तेसरा खूँजा आथ मेरे सिरो निठे ऊँदा

ओर से आपणे दाँणे आथो साथे माखे आपणे गल़े लगांदा।

4 मांते वादा करो, ओ यरूशलेमो री जवाणसो, कि तुसे म्हारे प्यारो दे बाधा नि डाल़ोगिया।

सेलिया

5 ये कुण ए जो आपणे प्रेमिये री कांदा पाँदे आपणा सिर राखी की

सुनसाण जगा ते चली की आऊणे लगी री?

वधू

मैं तूँ सेऊआ रे डाल़ो निठे जगाया।

जेती तेरिए माये तेरिया तँईं जम्मणे रिया पीड़ा लईया।

जेती तेरिए माये ताखे जन्म दित्तेया था।

6 ओ मेरे प्रेमी! माखे नगिने जेड़ा आपणे दिलो दे लगाई की राख

ओर जन्त्रो जेड़ा आपणियां बांई पाँदे बानी लओ,

प्यार मौता जेड़ा तागतबर ए;

तेतेरा जुनून मौता रे रूपो दे तागतबर ए। ओर जल़न कब्रा जेड़ी बिना दया री ए,

ओर तिजी रिया लूपिया आगी री लूपिया जेड़िया ओईया,

ओर बऊत बड़िया ओईया।*

7 बऊत सारा पाणी बी प्यारो रिया आगी खे बजयाई नि सकदा

ओर ना कोई बाढ़ा रा पाणी तिजी खे डबोई सकोआ।

जे कोई आपणे कअरो री सारी तअन-दौलत प्यारो रे बदले बी देई देओगा,

तेबे बी तेसरी तअन-दौलत प्यारो रे पालड़े रे अल़की पड़नी।

वधूआ रा पाई

8 म्हारी एक छोटी बईण ए,

जेसा रिया छातिया एबु नि उभरिया।

जेस दिने म्हारी बईणा री ब्याओ री गल्ल लगोगी,

तेस दिने आसे तेसा रिया तँईं क्या करुँ?

9 जे से छोटी बईण दवाला जेड़ी ऊँदी

तो आसे तिजी पाँदे चाँदिए रा कंगूरा बणांदे

ओर जे से दरवाजे रे फल़े जेड़ी ऊँदी

तो आसे तिजी पाँदे देवदारो रे तख़्ते लगांदे।

वधू

10 मेरी छाती पईले दवाला जेड़ी सवीं थी, पर एबे मेरी छातिया शरपनाह पाँदे गुम्मटो जेड़िया ए;

जेबे मेरे प्रेमिये आऊँ देखी, तेबे तेसखे बड़ी शान्ति मिली। *

वर

11 बाल्हामोन नाओं रिया जगा पाँदे राजा सुलैमानो रा एक अंगूरा रा बगीचा था,

तिने से दाखा रा बगीचा रखवाल़ेया गे ठेके पाँदे सम्बाल़ी ता;

हर एक रखवाल़े खे तिजी रे फला रिया तँईं

चाँदिए रे ह्जार-ह्जार टुकड़े देणे थे।*

12 मेरा आपणा अंगूरा रा बगीचा जो मेरा ई इस्सा ए, से मेरे सामणे ए,

ओ राजा सुलैमान, ये चाँदिए रे ह्जार ताखे

ओर फल़ो रे रखवाल़ेया खे दो सौ चाँदिए रे सिक्के मिलो।

13 तूँ जो बगीचेया रे रएई,

मेरे दोस्त तेरी आवाज सुणना चाओए;

माखे बी आपणी आवाज सुणने दे।

वधू

14 ओ मेरे प्रेमी, फटाफट आओ

ओर खुशबूदार पाह्ड़ो पाँदे

बारासींगे या जवान ईरणो जेड़े बणी जा।