1 ये बऊत बांके गाणे ए जो राजे सुलैमाने लिखी राखे।1:1 1 राजा 4:32
पईला गाणा
वधू
2 काश! तूँ माखे आपणे ओठा ते चूमदा,
कऊँकि तेरा प्यार अंगूरा रे रसो ते जादा उत्तम ए।
3 तैं कईया किस्मा रे इत्र लगाई राखे, इजी खे तिजी री खुशबू कितणी अच्छी ए,
तेरा नाओं मानो लटे रे इत्रो जेड़ा ए;
इजी री खातर जवाणसा तांते प्यार करोईया।
4 ओ मेरे राजा, छोड़ कर, छोड़ कर माखे आपणे मईलो खे लई चल।
आसे तांदे मगन ओर खुश ऊणे;
आसा तेरे अंगूरा रे रसो ते जादा तेरे न्याय री तारीफ करनी।
से तां साथे ठीक ई प्यार राखोई।1:4 होशे 11:4, फिलि. 3:1-12, पजन 45:14
5 ओ यरूशलेमो री जवाणसो,
आऊँ काल़ी तो अई, पर बांकी ए,1:5 ये रेगिस्तानी लोक आपणे तम्बूआ दे रओ थे जो काल़े थे
आऊँ केदारो रे तम्बूए जेड़ी काल़ी ए, पर आऊँ सुलैमानो रे बणाए रे कअरो रे बांके पर्देया जेड़ी ए।
6 तूँ माखे कूरी की नि देख कि आऊँ साऊँल़ी ए
जादातर तूपा रे रई की मेरा रंग साऊँल़ा ऊईरा।
ओर मेरे पाई मांते नराज थे,
तिने आऊँ अंगूरा रे बगीचेया दे रखवाल़ी करने वाल़ी बणाई,
इजी बजा ते आऊँ आपणे शरीरो रा त्यान नि राखी सकी।
7 ओ मेरे प्यारे माखे बता,
तूँ आपणियां पेडा-बाकरिया खे केई चराएया,
तूँ तिना खे दपैरे केई राम कराएया,
आऊँ तेरे साथिया री पेडा-बाकरिया गे
कूँडा पाई की कदुओ तक पटकदी रऊँ?
वर
8 ओ सबी ते बांकी, जे ताखे पता नि ए
तो मेरिया पेडा-बाकरिया रे खुरा रे नशाण देखी की तेते कनारो खे चलदे जाणा
आपणियां बाकरिया ओर तिना रे बच्चेया खे ओरी ग्वाल़ेया रे नेड़े-नेड़े चराया।
9 तूँ बांकी ए, मेरी प्यारी,
तेसा जवान कोड़िया जेड़ी ए जो मिस्रो रे राजे रा रथ खींजोई।1:9 1 राजा 10:26-29
10 तेरिया खाखा बाल़ा रिया लटा बीचे गईणेया ते लदी रिया कितणिया सुन्दर लगोईया,
ओर तेरा गल़ा ईरेया री लड़िया ते परेया रा बांका लगोआ।
11 आसा ताखे सूईने रिया बाल़िया बनाणियां जो चाँदिए साथे सजाईया रिया ऊणिया।
वधू
12 जेबे राजा आपणे सोफे पाँदे बैठी रा था,
तेबे मेरे जटामासी इत्रो री खुशबू कमरे रे चऊँ कनारे फैलणे लगी री थी।
13 मेरा प्रेमी माखे लोबानो री थैलिया जेड़ा ए,
जो मेरिया छातिया बीचे पड़ी दी रओई।
14 मेरा प्रेमी माखे मईंदिया रे फूला रे गुच्छेया जेड़ा ए,
जो एनगदिया रे अंगूरा रे बगीचे रे ओआ।
वर
15 तूँ बांकी ए, ओ मेरी प्यारी, तूँ सुन्दरी ए;
तेरिया आखी कबूतरिया जेड़िया ए।
वधू
16 ओ मेरी प्यारी तूँ सुन्दरी ओर मनो खे अच्छी लगणे वाल़ी ए
ओर म्हारा बछौणा बी अरा-फरा काआ ए;
17 आसा रे कअरो रे शह्तीर देवदारो रे ऊणे,
ओर म्हारे छतो रिया कड़िया केली रे डाल़ा रिया ऊणिया।