वर

1 ओ मेरी प्यारी तूँ बांकी ए, तूँ बऊत बांकी ए!

तेरिया आखी तेरिया लटा बीचे कबूतरा

जेड़िया दिशोईया।

तेरे बाल़ तिना बाकरिया रे चूण्डो जेड़े ए

जो गिलाद प्रदेशो रे पाह्ड़ो ते उतरने लगी रिया ए।*

2 तेरे दाँद तिना सऊँल़ी रिया पेडा रे चूण्डो जेड़े सफेद ए,

जो एबु नाह्यी की ऊबे आई रिया ओ,

ओर तिना बीचा ते एक बी राची री नि ए। सेओ सब एक जेड़िया ई आ।

3 तेरे ओठ लाल रंगो री तागेया री डोरिया जेड़े ए

ओर तेरा मूँ प्यारा ए,

तेरिया खाखा तेरिया लटा निठे

अनारो रिया साटिया जेड़िया दिशोईया।

4 तेरी क्याड़ी दाऊदो रे गुम्मटो जेड़ी लाम्बी ओर बांकी ए,

जो अस्त्र-शस्त्रा खे बणी रा ओर जेते पाँदे ह्जार ढाला टाँगी राखिया ओ,

सेयो सब ढाला शूरवीरा रिया ए।

5 तेरिया दोनो छातिया मानो ईरणियां रे दो जुड़ूंआ बच्चेया जेड़िया ए,

जो सोसणो रे फूला बीचे चरोए।

6 जदुए तक दिन ठण्डा नि ओ ओर छांए लाम्बी ऊँदे-ऊँदे खत्म नि ऊई जाओ,

तदुए तक मां फटाफट गन्धरसो रे पाह्ड़ ओर लोबानो रिया पाह्ड़िया पाँदे रऊँगा।

7 ओ मेरी प्यारी, तूँ पुरिया तरअ ते बऊत बांकी ए,

तांदे कोई बी दोष नि ए।*

8 ओ मेरी लाड़ी, तूँ मां साथे लबानोनो रे पाह्ड़ो ते,

मां साथे लबानोनो रे पाह्ड़ो ते चली आओ।

तूँ आमाना री चूँडिया पाँदा ते,

सनीर पाह्ड़ ओर हेर्मोनो री चूँडिया* पाँदा ते,

शेरो री गुफा ते, चीतेया रे पाह्ड़ा पाँदा ते चली आओ।

9 ओ मेरी प्यारी, ओ मेरी मंगेतर, तैं मेरा मन मोहित करिता रा,

तैं आपणियां एक ई नजरा ते

ओर आपणे गल़े रे एक ई ईरे ते मेरा मन मोहित करिता रा।

10 ओ मेरी प्यारी, ओ मेरी मंगेतर, तेरा प्यार कितणा अच्छा ए!

तेरा मन अंगूरा रे रसो ते कितणा खरा ए

ओर तेरे इत्रो री खुशबू सबी किस्मा रे मसालेया री खुशबूआ ते तेज ए!*

11 ओ मेरी मंगेतर, तेरे ओठा ते सईत टपकोआ,

तेरी जीबा निठे सईत ओर दूदो जेड़ी मठास ए,

तेरे टाल्लेया री खुशबू लबानोनो री जी खुशबू ए।

12 मेरी प्यारी, मेरी लाड़ी, तूँ तेस बगीचे जड़ी ए,

जेतेरा किने माणूंए प्रवेश द्वार बन्द करी राखेया ओर तिदे कोई बिना आज्ञा ते पीतरे नि आई सकदा। तूँ एक बन्द कित्ते रे झरने जेड़ी ए, जिदे कोई दूजा बिना आज्ञा ते नि पी सकदा।

13 तुँ स्वाद फल़ो ते परे अनारा रे डाल़ा रे एक बगीचे जेड़ी ए,

ओर बऊत फल़णे वाल़े खुशबुदार डाल़िया जेड़ी ए, जिदे मईंदी ओर जटामासी बी ए, केसर,

14 लोबान, मुश्क, दाल़चीनी,

गन्धरस, अगर ओर सबी तरआ रे खास-खास खुशबूआ वाल़िया डाल़िया बी।

15 तूँ एक बगीचे दे एक फव्वारे जेड़ी ए,

साफ पाणिए रिया तारा जेड़ी ए,

जो लबानोनो रे पाह्ड़ो ते थालो खे बह्योई।

वधू

16 ओ उत्तरी अवा जाग ओर ओ दक्खणी अवा चली की आओ!

मेरे बगीचे रे बह्यी जा, जेते की तिजी री खुशबू दूरो-दूरो तक फैलो।

मेरा प्रेमी आपणे बगीचे रे आओ,

ओर तिजी रे उत्तम-उत्तम फल खाओ।