बांके गाणे 6

सेलिया

1 ओ सारिया जवाणसा बीचे सबी ते बांकी,

तेरा प्रेमी केई गया?

तेरा प्रेमी केस कनारो खे चलीगा,

आसा गे बता कि आसे तां साथे तेसखे टोल़ने निकल़ूँ?

वधू

2 मेरा प्रेमी आपणे बगीचे रे चलीगा,

से बलसानो रिया क्यारिया रिया तरफा खे जाई रा,

ताकि बगीचे रे आपणियां पेडा-बाकरिया चराओ

ओर सोसणो रे फूल कट्ठे करो।

3 आऊँ आपणे प्रेमिये री ए ओर मेरा प्रेमी मेरा ए,

से सोसणो रे फूला रे मैदानो दे आपणी पेडा-बाकरिया चराओआ।

पाँजुआ गाणा

वर

4 ओ मेरी प्यारी, तूँ तिर्सा शईरो जेड़ी बांकी ए,

तूँ यरूशलेमो जेड़ी बऊत ई बांकी ए,

ओर चण्डा फरांदी ऊई सेना जेड़ी शानदार ए।

5 तूँ आपणियां आखी मेरिया तरफा ते फेरी लओ,

कऊँकि आऊँ तिना ते कबराऊँआ, कऊँकि तेरिया आखी माखे आपणे काबूए रे करने लगी रिया;

तेरे बाल़ गिलाद पाह्ड़ो रिया टलाना ते थाले उतर दिया बाकरिया रे चूण्डो जेड़े लगोए।

6 तेरे दाँद तिना ऊन कतरिया दिया पेडा रे चूण्डो जेड़े सफेद ए,

जो एबु नाई की पाणिए ते बारे आई रिया,

तिना बीचा ते एक बी राची री नि ए,

सेओ सब एक जेड़िया ए।

7 तेरिया खाखा तेरिया लटा निठे

अनारो रिया साटिया जेड़िया दिशोईया।

8 राजे गे साठ राणिया, अस्सी रखैला

ओर अणगिणत कुआँरिया बी ओ।

9 पर तेबे बी मेरी कबूतरी, मेरी सबी ते बांकी, तूँ मेरे एक ईए;

तूँ आपणियां माया री कल्ली ई लाडली ए।

सारी कुआँरिये से देखी ओर तेसा खे भाग्यशाली बोलेया,

राणिये ओर रखैलिये देखी की तेसा री सुन्दरता री तारीफ कित्ती।

10 ये प्यागा जेड़ी दिशणे वाल़ी कुण ए,

जो सुन्दरता रे चाँदो जेड़ी ए,

सूरजो जेड़ी चमकणे वाल़ी

ओर चण्डा फरांदी ऊई सेना जेड़ी

शानदार दिशोई?

11 आऊँ खोड़ो रे बगीचे रे उतरीगी,

ताकि तराईया रे फूल देखूँ

ओर देखूँ कि अंगूरा री बेला रे कलिया लगिया क्या

ओर अनारो रे फूल खिले कि नई।

12 माखे पता चलणे ते पईले ई मेरिये सोचे

आऊँ आपणे राजकुमारो रे रथो पाँदे तेसरे बडिया सेना साथे चढ़ाईती।

सेलिया

13 वापस आओ, वापस आओ, ओ शूलेम्मिन,*6:13 शुलेमो री रणे वाल़ी

वापस आओ, वापस आओ, ताकि आसे ताखे देखूँ।

वधू

तुसे शूलेम्मिनो खे कऊँ देखणा चाओईया?

क्या आऊँ दुँईं चूण्डा बीचे नाचणे वाल़ी बेटी ए?