1 इजी ते पईले की मुसीबता रे दिन ओर सेयो साल आओ, जिना रे तूँ बोले कि मेरा मन इना गल्ला रे नि लगदा। आपणी जवानिया रे दिनो रे आपू खे बनाणे वाल़े खे याद राख,

2 जेबे तूँ स्याणा ऊई जाए तेबे ताखे सूरज ओर प्रयासा चाँद ओर तारे तुँदल़े दिखणे लगणे, ओर सर्गो दे काल़े बादल़ छाई जाणे!

3 तेस बखते कअरो खे बचाणे वाल़े पईरेदार थरथराणे, ओर तागतबरा री तागत कअटी जाणी ओर पीसणे वाल़िया थोड़िया जिया रणे रिया बजा ते काम करना छाडी देणा, ओर द्वारिया रिये चाँकणे वाल़िया अन्दिया ऊई जाणिया।

4 सड़का रिया तरफा रे द्वार बन्द ऊई जाणे ओर चाक्की पीसणे री आवाज आऊल़ी ऊई जाणी ओर तड़के चिड़िया रे बोलदे ई एक उठी जाणा ओर सब गाणे वाल़िया री आवाज आऊल़ी ऊई जाणी।

5 तेबे जो ऊच्चा ओ, तेसते डर ऊणा ओर बाटा रे डराऊणी चीजा मानणियां; बदामो रा डाल़ फूलणा, टिड्डी बी पारी लगणी ओर पूख बढ़ाणे वाल़े फल़ो फेर काम नि देणा, कऊँकि माणूं आपणे सदा रे कअरो खे जाणा ओर रोणे-पीटणे वाल़े सड़का रे फिरने।

6 तेस बखते चाँदिए रिया तारा रे दो टुकड़े ऊणे ओर सूईने रा कटोरा टुटणा ओर सूबल़ा गे कअड़ा फूटणा ओर कुण्डो गे चाक्का टूटी जाणा। तुसे आपणे बनाणे वाल़े परमेशरो खे याद राखणा,

7 तेबे म्हारी देह माट्टिया दे मिली जाणी, ओर आत्मा परमेशरो गे जिने से देई राखी वापस ऊई जाणी।

8 उपदेश देणे वाल़ा बोलोआ, "सब बेकार ई बेकार ए; सब कुछ बेकार ए।"

9 आऊँ एक अक्लमंद सखाणे वाल़ा था, ओर मैं बऊत चीजा देखिया, मैं सेयो सारे नसीअता रिया गल्ला लिखी ले जो मैं सिखे थे।

10 मैं सई शब्दा री खोजबीन कित्ती, ओर मैं जो गल्ला लिखिया सेयो परोसे जोगिया ओर सच्चिया ए।

11 अक्लमंदो रे वचन कांडेया जेड़े पैने ओए ओर सभा दे परदानो रे वचन लगाई दी कीला जेड़े ओए, कऊँकि यो एक ई परमेशरो रिया तरफा ते मिलोए।*

12 ओ मेरे पाऊ, इना गल्ला रेई चौकसी कर, बऊत सारिया कताबा री रचना रा अन्त नि ऊँदा ओर बऊत पढ़ना शरीरो खे थकाई देओआ।

13 जो बी मैं तुसा खे बताया, तिजी रा निचोड़ बस इतना ई आ कि तुसे परमेशरो रा डर मानो ओर तेसरी सुणो जेड़ा से बोलोआ, कऊँकि आसे माणूं इजी खे ई बणाई राखे ओर एड़ा करना म्हारा फर्ज ए।

14 कऊँकि परमेशर सबी कामा खे ओर सब गुप्त गल्ला खे, चाए सेयो खरिया ए, चाए सेयो बुरिया, न्याय करोआ।*