स्याणेया रा ज्ञान 2

बेकारो रा सुख

1 तेबे मैं आपणे आपू ते बोलेया, "ठीक ए, मां से सब कुछ करने री कोशिश करनी, जेतेते माखे मजा आओआ। मां पता करना कि क्या आऊँ तिना कामा करने ते जिना ते माखे मजा आओआ माखे खुश करी सकोए।" पर माखे पता लगी गा कि एड़ा करना बी बेकार था।

2 मैं एड़ा देखेया कि आसी-मजाक करना मूर्खता ए ओर आनन्द करी कि कुछ बी पला नि ऊँदा।

3 मैं आपू बऊत जादा शराब पीणे री कोशिश कित्ती, जितणा जादा पी सकूँ था तीतणा पिया, ओर साथे ई समजदार बणे दे रणे री कोशिश कित्ती। मैं ये जाणने री कोशिश करने लगी रा था कि क्या ये काम माणूंए खे आपणे जीवनो दे करने फाईदेमंद ऊणे।

4 मैं बड़े-बड़े काम कित्ते, मैं आपू खे कअर बणवाए ओर आपू खे अंगूरा रे बगीचे लगवाए।

5 मैं आपू खे बाग-बगीचे लगवाई ते ओर तिना रे कई प्रकारा रे फल देणे वाल़े डाल़ लगवाए। 6 मैं आपू खे पाणिए खे कुएँ खणाई ले, ताकि से जगा सींजी जाओ जिदे डाल़ लगाओ थे। 7 मैं दास-दासिया खरीदे ओर मेरे कअरे दास बी पैदा ऊए ओर जितणे मांते पईले यरूशलेमो रे थे, तिना ते केथी जादा मांगे गाय-बल़द ओर पेडा-बाकरिया थिया। 8 मैं सूईना, चाँदी, राजा ओर राज्या रिया कीमती चीजा बी कट्ठिया कित्तिया। मैं आपू खे गाणे वाल़े ओर गाणे वाल़िया राखिया ओर बऊत सारिया रखैलिया बी, जिना ते माणूंआ खे सुख मिलोआ, आपणियां बणाई तिया।

9 ईंयाँ मांते पईले जितणे बी यरूशलेमो दे रओ थे, आऊँ तिना सबी ते महान ओर जादा बुद्धिमान ऊआ।

10 जो कुछ बी आऊँ करना चाऊँ था मैं कित्तेया। मैं आपू खे केसी बी खुशिया ते ना नि कित्ती। जो कुछ बी आऊँ करी सकेया तिजी ते आऊँ खुश था ओर जो आनन्द माखे तिजी ते मिलो था से माखे ईनाम था।

11 फेर मैं तेते मईणता रे बारे दे सोचेया जो मैं तिना चीजा खे पाणे रिया तँईं कित्ती थी ओर तिना बीचा ते केसी बी चीजा ते माखे बड़ा फाईदा नि ऊआ से सब अवा खे पकड़ने रे जेड़ा था। ये बी बेकार ए।

बुद्धिमान ओर मूर्खो रा अंत

12 आऊँ आपणे आपू ते पूछणे लगेया, "मांते बाद जो माणूं राजा बणना, से एड़ा क्या करोगा जो आऊँ नि करी सकेया?" फेर मैं फैंसला कित्तेया कि बुद्धि ओर मूर्खता खे इस्सालपनो साथे मलाऊँ।

13 तेबे मैं देखेया कि जितणा प्रयासा न्हेरे ते खरा ए, तिथणा ई बुद्धि बी मूर्खता ते खरी ए।

14 एक अक्लमंद माणूं देखोआ कि केत्ते कनारो खे जाणे लगी रा। पर जेबे एक मूर्ख माणूं चलोआ तेबे से आखी बंद करी लओआ। पर तिना रे जीवनो रा अन्त एक जेड़ा ई ओआ।

15 तेबे आऊँ आपू ई सोचणे लगेया, "मूर्खा साथे जो ऊणे वाल़ा ए सेई मां साथे बी ऊणे वाल़ा ए। तो मेरा इतणा समजदार ऊणे रा क्या फाईदा ए?" "कुछ पनि," तेबे मैं मनो रे सोचेया, "ये बी बेकार ईए।"

16 अक्लमंद माणूंए रे ओर मूर्ख माणूंए रे मरने ते बाद लोक सबी खे पूली जाओए। एथो तक कि अक्लमंद माणूं किंयाँ मूर्ख माणूंए जेड़ा मरोआ!

17 तेबे माखे आपणी जिन्दगिया ते नफरत ऊई गी, कऊँकि जो काम संसारो रे कित्तेया जाओआ से माखे बुरा लगेया; कऊँकि सब कुछ बेकार ओर अवा खे पकड़ना ईए।

18 आऊँ आपणे सारेया कामा ते नफरत करने लगेया जो मैं तरतिया पाँदे कित्ते थे, कऊँकि जो कुछ मैं कट्ठा कित्तेया था से सब कुछ तेस माणूंए खे मिलणा जो मांते बाद राजा ऊणा।

19 एड़ा कोई नि जाणदा कि आऊणे वाल़ा माणूं अक्लमंद ऊणा या मूर्ख? तेबे बी तरतिया पाँदे जितणी मईणत मैं कित्ती ओर तअन कमाणे खे बुद्धिया रा इस्तेमाल कित्तेया, तिजी सबी रा अक्कदार सेई ऊणा। ये बी बेकार ईए।

20 तेबे आऊँ मनो रे तेसा सारी मईणता रे बारे रे जो मैं तरतिया पाँदे कित्ती सोची की उदास ऊईगा।

21 आसे कमाणे रिया तँईं सारी अक्ल, ज्ञान ओर बऊत योजना खे बणाऊँए! अन्तो दे से कमाई आसा खे एड़े माणूंए खे छाडणी पड़ोई जिने तिजी खे कमाणे खे कुछ बी मईणत नि कित्ती ओ! ओर ये गल्ल बी बऊत ई बेकार ओर बुरी ए।

22 माणूं जो तरतिया पाँदे मन लगाई-लगाई की मईणत करदा रओआ, तेसखे तिजी ते कोई बी फाईदा नि ऊँदा।

23 तेसरे सारे दिन तो दु:खो साथे परे रओए ओर तेसरा काम बी दु:खो साथे ओआ, तेसरे मनो खे राती बी चैन नि मिलदा। ये बी बेकार ईए।

24 माणूंए खे खाणे-पीणे ओर मईणत करदे ऊए आपणे प्राणो खे सुखी राखणे ते सिवाए ओर कुछ बी ठीक नि ए। मैं जाणेया कि ये बी परमेशरो रिया तरफा ते ई मिलोआ।

25 परमेशरो रिया मतादा ते बिना, केसी गे बी खाणे-पीणे खे पूरा खाणा नि ऊई सकदा। ओर कोई बी खुश नि ऊई सकदा। 26 परमेशर जेस माणूंए ते खुश ओआ, तेसखे से समज, ज्ञान ओर खुशी देयोआ, पर पापिया माणूंआ खे से कमाणे, कट्ठा करने ओर पण्डारो दे परने रा काम कराओआ, ताकि से तिना लोका खे देई सको जिना ते खुश ए। ये बी बेकार ओर अवा खे पकड़ने जेड़ा ए।