1 आऊँ देखूँआ कि तरतिया पाँदे एक घोर अन्याय करने लगी रे। 2 केसी माणूंए खे परमेशर तअन-सम्पत्ति ओर मान-सम्मान इतणा देयोआ कि जो कुछ तेसरा मन चाओआ, तिना चीजा री तेसखे कोई कमी नि ऊँदी, पर तेबे बी परमेशर तेसखे तिना बीचा ते कुछ बी खाणे नि देंदा, बल्कि कोई दूजा ई तेसखे खाओआ, ये बेकार ओर डराऊणा दु:ख ए।

3 जे केसी माणूंए रे सौ पाऊ ओ ओर से बऊत साला तक जिऊँदा बी रओ ओर तेसरी उम्र बढ़ी जाओ, पर ना से खुश ओ ओर ना तेसरी अन्तिम क्रिया करो, तो आऊँ बोलूँआ कि एड़े माणूंए ते आदे बखतो दे जम्मणे ते बाद मरने वाल़ा बच्चा ठीक ए। 4 एड़े बाल़को रे जमणे रा कोई फाईदा नि ए; ना ई तेसरा कोई नाओं ए। से सीदा ई तेते जगा खे जाओआ जेती अन्दकूप न्हेरा ए। 5 से सूरजो खे देखणे या कुछ बी पता करने रिया तँईं जिऊँदा नि रई सकेया। पर ये जिऊँदेया अमीर लोका ते जादा सुखी रओआ। 6 चाए माणूं दो ह्जार साला तक जिऊँदा रओ जे से सारी उम्र सुखी नि था तो तेसखे कोई फाईदा नि ओर सब लोक मरने ते बाद एक ई जगा दे जाणे।

7 आसे सारी मईणत इजी रिया तँईं करूँए कि कुछ खाणे खे मिली जाओ, पर आसे लोक कदी बी रजदे नि, 8 अक्लमंद माणूं मूर्ख माणूंए ते केसा गल्ला रे बढ़ी की ए? ओर गरीब माणूं जो ये जाणोआ कि एते दुनिया दे किंयाँ जिऊँदे रणा चाईयो, से बी केसा गल्ला दे तेसते बढ़ी की ए? 9 तिना चीजा रा मजा लणा खरा ए जो आसा गे पईले ते ई ए, इजी रे बदले कि लगातार जादा चीजा खे चाँदे रणा; एड़ी इच्छा करना मूर्खता ए, जेड़ा अवा रा पीछा करना।

10 जो कुछ पैदा करी राखेया तिजी रा नाओं दुनिया री शुरूआता ते राखी राखेया, ओर आसे जाणूंए कि माणूं केड़ा ओआ, इजी री खातर आसे आपू ते जादा तागतबर माणूंए साथे लड़ी नि सकदे। 11 जितणा जादा आसे लोक गल्ला करूँगे तिथणा ई जादा आसा बेकार गल्ला बोलणिया, इजी री खातर आसा खे जादा गल्ला करने ते कोई फाईदा नि ए। 12 कऊँकि माणूंए री थोड़ी जी जिन्दगी जो से परछाईया जेड़ा बिताओआ कुण जाणोआ कि तेसखे क्या अच्छा ए? कऊँकि माणूंए खे कुण बताई सकोआ कि तेसरे मरने ते बाद एते तरतिया दे क्या ऊणा?