1 ये वचन राजा दाऊदो रे पाऊ सुलैमानो रे ए, जिने यरूशलेमो ते राज कित्तेया ओर उपदेशक ए:

2 तिने बोलेया, "बेकार ई बेकार, बेकार ई बेकार! जिन्दगी ई बेकार ए।"

3 सेयो सब मईणत करने वाल़े लोक जो तरतिया पाँदे काम करोए, तिजी ते तिना खे कोई फायदा नि ऊँदा।

4 एक पीढ़ी जाओई ओर दूजी पीढ़ी आओई,* पर तरती सदा तेड़ी ई बणी री रओई।

5 सूरज निकल़ी की डूबी बी जाओआ ओर आपणे निकल़ने री दिशा खे चट चली जाओआ।

6 अवा दखणा रिया तरफा खे बह्ओई ओर उत्तरा रिया तरफा खे कूमदी जाओई, से कूमदी ओर बह्यींदी रओई ओर आपणे चक्करो रे गोल़-गोल़ कूमदी रओई।

7 सारिया नदिया समुद्रो रे जाई की मिली जाओईया, तेबे बी समुद्र परदा नि, जेते जगा ते नदिया निकल़ोईया, तेथो खे सेयो फेर फिरी जाओईया।

8 जिन्दगी आसा खे थकाई देओई जेतेरे बारे दे कोई माणूं पनि बताई सकदा, ना तो आखी देखी की रज्जदिया ओर ना कान सुणी की परोए।

9 जो कुछ ऊआ था, सेई फेर ऊणा ओर जो कुछ बणी चूकी रा, सेई फेर बणाया जाणा ओर तरतिया पाँदे सब गल्ला पुराणिया ई अईया।

10 बऊत माणूं एड़ा बोली सकोए, "एती नवीं गल्ल ऊई री!" पर नई, से गल्ल बी पईले बखतो दे ऊई गी थी जेबे आसे जमीं पनि रये थे।

11 लोका खे पुराणिया गल्ला री कोई याद नि ए, ओर आऊणे वाल़े बखतो दे लोका खे याद पनि रणा कि एबे आसे क्या करने लगी रे।

12 मैं उपदेश देणे वाल़े यो गल्ला तेबे बोलिया थिया, जेबे आऊँ यरूशलेमो दे रऊँ था ओर आऊँ तेबे इस्राएल देशो रा राजा था।

13 मैं आपणी सारिया अक्ला ते इना गल्ला खे समजणे री कोशिश कित्ती कि तरतिया दे क्या-क्या ओआ। तेबे माखे पता लगेया कि परमेशरे माणूंआ खे बऊत ई दु:ख देणे वाल़ा काम करने खे देई राखेया।

14 मैं सेयो सारे काम देखे, जो तरतिया पाँदे कित्ते जाओए; ओर देखो, सेयो बेकार ओर मानो अवा खे पकड़ने* जेड़े ए।

15 जो टेडा ए, से सीदा नि ऊई सकदा ओर जितणिया चीजा अईया ई नि, सेयो गिणिया नि जाई सकदिया।

16 फेर आऊँ आपणे आपू ते एड़ा बोलणे लगेया, "आऊँ बऊत जाणा-मानेया दा माणूंआ, जितणे राजेया मांते पईले यरूशलेमो ते राज कित्तेया, आऊँ तिना सबी ते जादा बुद्धिमान ऊआ, माखे पता ए कि बुद्धि ओर ज्ञान असली दे क्या ए।"

17 मैं ज्ञान ओर मूर्खता, बुद्धि ओर इस्सालपनो बीचला अंतर सिखणे री ठाणी ली थी। पर माखे पता लगेया कि ये बी अवा रे पीछे दौड़ने जेड़ा ए। 18 आऊँ जितणा जादा बुद्धिमान बणेया, तिथणा ई जादा आऊँ परेशान बी ऊआ। जितणिया जादा चीजा री जानकारी मैं लई, तिथणा ई जादा आऊँ दु:खी ऊआ।