1 मैं तिना चीजा रे बारे दे सोचेया, ओर मैं देखेया कि परमेशर आपणे कब्जे दे राखोआ कि हर एकी साथे क्या ऊणा, चाए से माणूं अक्लमंद ए या तर्मी। कोई नि जाणदा कि दूजे तिना साथे प्यार करोए या नफरत।

2 सबी रा आल एक जेड़ा ई ओआ, तर्मी ओ या दुष्ट, खरे-बुरे, शुद्ध या अशुद्ध, यज्ञ करने वाल़े या ना करने वाल़े, सबी री दशा एक जेड़ी ओई। जेड़ी खरे माणूंए री दशा, तेड़ी ई पापिए री दशा ओई, जेड़ी कसम खाणे वाल़े री दशा, तेड़ी ई तेसरी जो कसम खाणे ते डरोआ ओई।

3 जो कुछ तरतिया पाँदे कित्तेया जाओआ तिदे एक ये दोष ए कि सबी लोका री एक ई दशा ओई ओर माणूंआ रे मनो रे बुराई परी री ए, ओर जदुओ तक सेयो जिऊँदे रओए, सेयो मूर्खता रे काम करोए, फेर सेयो अचाणक मरी जाओए।

4 पर जो जिऊँदा माणूं ए तेसखे एक उम्मीद ए, कऊँकि जिऊँदा कुत्ता मरे रे शेरो ते बढ़ी की ए।

5 कऊँकि जिऊँदे माणूं इतणा तो जाणोए कि सेयो मरने, पर मरे रे माणूं कदी बी ना तो कुछ जाणदे ओर ना तिना खे कोई ओर ईनाम मिलणा, ओर कोई बी तिना खे याद नि करदा।

6 तिना रा प्यार ओर जल़न ओर तिना री जीद नाश ऊई चूकी री ओर एबे जो कुछ तरतिया पाँदे कित्तेया जाओआ, तिदे सदा खे तिना रा ओर कोई इस्सा नि ऊणा।

7 आपणियां बाटा रिये चली जा, आपणी रोटी खुशिया रे खाया कर ओर मनो रे सुख मानी की आपणा अंगूरा रा रस पिया कर, कऊँकि परमेशर ए ई चाओआ।

8 तेरे टाल्ले सदा चमकदार ओर साफ ओ ओर तेरे सिरो रे हमेशा तेल लगेया दा रओ।

9 एते तरतिया पाँदे तुसा रा जीवन थोड़ा जा ई रणा ओर ये कठण बी ऊणा। पर तुसे आपणियां लाड़िया ते प्यार करोए, ईंयाँ मिली की तुसे आपणे जीवनो दे मजे करो। एई तरतिया पाँदे रणे रा तरीका ए। 10 इजी री खातर जो कुछ तुसे करी सकोए से पूरिया शक्तिया ते करो, कऊँकि मरने ते बाद तुसे कुछ पनि करी सकदे जेड़ा कि सोचोए, केसी चीजा खे टोल़ना या समजदार ऊणा।

11 तेबे मैं तरतिया पाँदे देखेया कि ना तो दौड़ा रे तेज दौड़ने वाल़े ओर ना युद्धो रे शूरवीर जीतदे, ना अक्लमंद लोका खे रोटी मिलदी, ना समजदारा खे तअन ओर ना ज्ञानिया पाँदे दया ऊँदी, सेयो सब संयोग ओर बखतो रे वशो रे ए। 12 माणूं नि जाणी सकदा कि बुरा बखत कदी आऊणा,* जिंयाँ मछलिया दु:ख देणे वाल़े जाल़ो रे फसोईया ओर चिड़िया फन्दे रे फसोईया, तिंयाँ ई माणूं बी दु:खो रे बखतो रे जो तिना पाँदे अचाणक आओआ, फसी जाओए।

13 मैं तरतिया पाँदे अक्लमंद माणूंए खे कुछ करदे देखेया, जिना गल्ला ते मां पाँदे बऊत असर पड़ेया।

14 एक छोटा जा शईर था, जिदे बऊत ई कम लोक थे, तेबे किनी बड़े राजे तेते शईरो पाँदे चढ़ाई करी की से केरी ता ओर तिजी रे चऊँ कनारे सैनिक खड़े करीते।

15 पर तिदे एक गरीब अक्लमंद माणूं था ओर तिने से शईर आपणियां बुद्धिया रे जरिए बचाया, तेबे बी लोक तेस गरीब माणूंए खे पूली गे।

16 तेबे माखे ये पता लगेया कि अक्लमंद ऊणा तागतबर ऊणे ते खरा ए, फेर बी जे तुसे गरीब ए, तो केसी बी तुसा री तारीफ नि करनी, ओर लोक जल्दी ई पूली जाणे जो तुसे बोलेया था।

17 मूर्खा रिया सबा दे राजे रे जोरे की बोलणे ते जादा अच्छा ए केसी अक्लमंद माणूंए रिया शांत गल्ला खे सुणना।

18 लड़ाईया रे अथियारा ते बुद्धि खरी ए, पर एक पापी बऊत पलाईया खे नाश करी देओआ।