रूत 3

रूत ओर बोअज

1 कुछ दिन बाद रूता री सासु नाओमीए तेसा खे बोलेया, "ओ मेरी बेटी, क्या आऊँ ताखे कअर ओर लाड़ा नि टोल़ू कि तेरा पला ओ? 2 एबे जेस माणूंए री दासिया साथे तूँ काम करे थी, से बोअज म्हारा रिश्तेदार ए। तेस आज राती खल्याणो दे जौ फटकणे। 3 तूँ नाह्यी की खुशबुदार तेल लगा, बड़िया टाल्ले पईनी की खल्याणो खे जा; पर जदुओ तक से खाई-पी नि चुको तदुओ तक तेस सामणे नि आऊणा। 4 जेबे से सई जाओ, तेबे तैं तेसरे सऊणे री जगा त्यानो साथे देखी लणी; तेबे पीतरे जाई की तेसरे पैरा पाँदे जो चादर ए तेसा खे टाई की तेथी तेसरे पैरा गे सई जाणा, तेबे तेस ई ताखे बताणा कि ताखे क्या करना चाईयो।" 5 रूते तेसा खे बोलेया, "जो कुछ तूँ बोलणे लगी री, से सब मां करना।"

6 तेबे से खल्याणो खे गयी ओर आपणी सासुआ रे बोलणे रे मुताबिक ई कित्तेया। 7 जेबे बोअज खाई-पी चुकेया ओर तेसरा मन खुश ऊआ, तेबे जाई की नज्जो रे टेरो रे एक सिरे पाँदे लेटीगा। तेबे रूत चुपचाप गयी ओर तेसरे पैरा पाँदा ते चादर टाई की तेथी लेटी गी। 8 आदी राती बोअज पसे बदली की जागी गा ओर ये देखी की हैरान ऊईगा कि तेसरे पैरा गे एक जवाणस लेटी री थी। 9 तिने पूछेया, "तूँ कुण ए?" तेबे तेसे बोलेया, "आऊँ तो तेरी दासी रूत ए, तूँ आपणी दासिया खे आपणी चाद्दर टखाई दे, कऊँकि तूँ म्हारा रिश्तेदार ए जेस पाँदे आसा री देखपाल़ करने री जिम्मेदारी ए।" 10 बोअजे रूता खे बोलेया, "ओ जवाणसे, यहोवे रिया तरफा ते तां पाँदे आशीष ओ; ये जो दया तैं एबु दखाई ए ये तेरे पईले नाओमिया पाँदे दखाई री दया ते बढ़ी की ए। कऊँकि तूँ, क्या अमीर, क्या गरीब, या केसी जवान मर्दो पीछे नि लगी। 11 इजी री खातर एबे, ओ जवाणसे, डर नि, जेसते तैं बिनती करी राखी ए, मां तेरिया तँईं करना; कऊँकि मेरे शईरो रे सारे लोक जाणोए कि तूँ पली जवाणस ए। 12 सच तो आए कि आऊँ छुड़ाणे वाल़ा तेरे परिवारो रा ए, पर मांते बी नेड़ो रा तुसा रा एक ओर रिश्तेदार ए, जेसखे मांते पईले ई छुड़ाणे रा अक्क ए। 13 प्यागा तक एथी लेटी दी रओ, ओर प्यागा आऊँ तेस रिश्तेदारो ते गल्ल करूँगा। जे से तेरी देखपाल़ करने खे त्यार ऊईगा, तो खरा ए। पर जे से नि चाओ, तो यहोवे री जिन्दगिया री कसम मां आपू ई तेरी देखपाल़ करनी ओर मां से काम करना, प्यागा तक एथी लेटी दी रओ।" 14 तेबे रूत प्यागा तक बोअजो रे पैरा गे लेटी री रई पर से प्रयासा ऊणे ते पईले ई उठी गी कि लोक एकी दूजे खे पछयाणी सको। कऊँकि बोअजे बोलेया था, "केसी खे पता नि लगणा चाईयो कि कोई जवाणस खल्याणो दे आयी थी।" 15 तेबे बोअजे ये बी बोलेया, "जो ये चाद्दर तैं टखी राखी तेसा खे फैलायी की पकड़" रूते एड़ा ई कित्तेया। तेसे चाद्दर पकड़ी दी राखी। बोअजे लगभग ती किलो जौ तेसारी चाद्दरी दे पाई की सिरो पाँदे राखी ते। तेबे रूत शईरो दे चली गी। 16 जेबे रूत आपणी सासुआ गे आयी तेबे तेसे पूछेया, "ओ बेटी, क्या ऊआ?" तेबे रूते से सब दशेया जो तिने माणूंए तेसा रिया तँईं कित्तेया। 17 तेबे रूते ये बी बोलेया, "ये लगभग ती किलो जौ तिने माखे ये बोली की देई राखे कि आपणी सासुआ गे खाली आथे नि जा।" 18 तेबे नाओमीए बोलेया, "ओ मेरी बेटी, आसा खे ये देखणे रिया तँईं इंतजार करना चाईयो कि क्या ऊणा। बोअजो खे ये काम कित्ते बगैर चैन नि मिलणा।"