Ester 3

हामानो री यहूदिया खे काणे री योजना

1 कुछ साल बाद क्षयर्ष राजे अगागी हम्मदातो रे पाऊ हामानो खे सबी ते बड़े परदानो रा पद दित्तेया ओर तेसखे जादा इज्जत देई की तेसखे तेसरे साथी परदाना रे सिंहासना ते ऊच्चा सिंहासन ठराया। 2 तेबे राजे रे सब कर्मचारी जो राजमईलो रे बड़े द्वारो दे रओ थे, सेयो हामानो सामणे चूकी की माथा टेकेया करो थे, कऊँकि राजे तेसरे बारे दे एड़ी ई आज्ञा देई राखी थी, पर मोर्दकै ना तो चुको था ओर ना तेसगे माथा टेको था। 3 तेबे राजे रे कर्मचारी जो राजमईलो रे बड़े द्वारो गे रया करो थे, तिने मोर्दकै ते पूछेया, "तूँ राजे री आज्ञा खे कऊँ नि मानदा?" 4 जेबे सेयो हर रोज तेसखे एड़ा ई बोलदे रये ओर तिने तिना री एक नि मानी, तेबे तिने ये देखणे री इच्छा ते कि मोर्दकै री ये गल्ल चलणी कि नई, हामानो गे बताईता; तिने तो तिना गे बताईता था कि आऊँ यहूदी ए। 5 जेबे हामाने देखेया कि मोर्दकै नपदा नि ओर ना मांगे माथा टेकदा, तेबे हामान बऊत गुस्से ऊआ। 6 तिने बस मोर्दकै पाँदे आथ चलाणा आपणी मर्यादा रे खलाफ समजेया। कऊँकि तिने हामानो खे ये बताईता था कि मोर्दकै केसा जातिया राए, तेबे हामाने क्षयर्ष राजे रे साम्राज दे रणे वाल़े सारे यहूदिया खे बी मोर्दकै री जाति जाणी की नाश करने री साजिश कित्ती। 7 राजा क्षयर्षो रे बारूए सालो रे नीसान नाओं रे पईले मीन्ने दे, हामाने अदार नाओं रे बारूए मीन्ने तक रे एक-एक दिन ओर एक-एक मीन्ने खे चिट्ठी आपू सामणे पाई। 8 तेबे हामाने राजा क्षयर्षो खे बोलेया, "तेरे राज्य रे सब जगा दे रणे वाल़े देशो-देशो रे लोका बीचे तित्तर-बित्तर ऊई की रणे वाल़ी एक जाति ए, जेसा रे नियम ओरी सबी लोका रे नियमो ते लग ए ओर सेयो राजे रे कानूनो पाँदे नि चलदे, इजी री खातर सेयो राखणे राजे खे फायदेमंद नि ए। 9 जे राजे खे ठीक लगो तो तिना खे नाश करने री आज्ञा लिखी जाओ ओर आऊँ राजे रे पण्डारिया रे आथो रे राजपण्डारो दे पऊँचाणे खे, लगभग 340,000 किलो चाँदी देऊँगा।"

10 तेबे राजे आपणी छाप आपणे आथो ते निकयाल़ी की अगागी हम्मदातो रे पाऊ हामानो खे, जो यहूदिया रा बैरी था देईती। 11 ओर राजे हामानो खे बोलेया, "से चाँदी ताखे देईती री ओर सेयो लोक बी, ताकि तूँ तिना साथे जेड़ा तूँ चाए, तेड़ा ई बर्ताओ कर।" 12 ईंयाँ तेस पईले मीन्ने रे तेरूए दिने राजे रे लेखक बुलाए ओर हामानो री आज्ञा रे मुताबिक राजे रे सब परदान, ओर सब राज्य रे परदान ओर देशो-देशो रे राज्यपाला खे पर्चिया, एक-एक राज्य रे अक्षरा दे ओर एक-एक देशो रे लोका री पाषा दे क्षयर्ष राजे रे नाओं ते लिखिया ओर तिना दे राजे री छापा री मोहर लगाई। 13 तेबे राज्य रे सबी जगा दे ये लिखी की पर्चिया हर डाकिये रे जरीये पेजिया कि एक ई दिनो दे, मतलब अदार नाओं रे बारूए मीन्ने रे तेरूए दिने, क्या, जवान, क्या स्याणे, क्या जवाणस, क्या बाल़क, सारे यहूदी काई देयो ओर तिना री तअन-सम्पत्ति लूटी लणी। 14 तेसा आज्ञा रे लेखो री नकल सबी जगा दे खुली दी पेजी ताकि सब देशो रे लोक तेस दिनो खे त्यार ऊई जाओ। 15 ये आज्ञा शूशन गढ़ो दे दित्ती ओर डाकिये राजे री आज्ञा ते फटाफट निकल़ी गे। तेबे राजा ओर हामान शराब पीणे बैठीगे, पर शूशन शईरो दे डर फैलीगा।