यहूदिया रे दुश्मणा रा बरोद करना
1 जेबे सम्बल्लते सुणेया कि यहूदी लोक यरूशलेम शईरो री दवाला खे बनाणे लगी रे, तेबे तेसखे बऊत बुरा लगेया ओर से बऊत रोषे ऊई की यहूदिया रा मजाक उडाणे लगेया। 2 से आपणे पाईया रे ओर सामरिया री सेना सामणे ईंयाँ बोलणे लगेया, "सेयो कमजोर यहूदी क्या करना चाओए? क्या इना ये काम आपणी तागती साथे करना? क्या इना आपणी जगा मजबूत करनी? क्या तिना यज्ञ करना? क्या इना आज ई सारा काम निपटाई देणा? क्या तिने माट्टिया रे टेरो बीचले फूखे रे पात्थर फेर नये सिरे ते बनवाणे?" 3 तेसगे तो अम्मोनी तोबियाह था ओर से बोलणे लगेया, "जो कुछ सेयो बनाणे लगी रे, जे कोई गीदड़ बी तिजी पाँदे चढ़ोगा, तो तेस तिना री बणाई री पात्थरा री दवाल तोड़ी देणी।"
4 तेबे नहेम्याहे परमेशरो ते प्रार्थना कित्ती ओर बोलेया, "ओ म्हारे परमेशर सुणी लो कि आसा री बेज्जती ऊणे लगी री ओर तिना री कित्ती री बेज्जती तिना रेई सिरो पाँदे वापस करी दे ओर इना खे गुलाम बणाई की दूजे देशो दे पेजी दे ताकि से देश इना रा सब कुछ लूटी लो। 5 ओर इना रा पाप तूँ नि टख ओर ना ई इना रा पाप तां सामणे ते मिटाया जाओ; कऊँकि इने ताखे दवाला बनाणे वाल़ेया सामणे रोष चढ़ाई राखेया।"
6 आसे लोके दवाल बणाई ओर सारी दवाल आदी ऊचाईया तक जुड़ी गी, कऊँकि लोका रा मन तेस कामो दे हमेशा लगेया रा रया।
7 जेबे सम्बल्लत ओर तोबियाह ओर अरबी लोके, अम्मोनी लोके ओर अशदोद शईरो रे लोके सुणेया कि यरूशलेम शईरो री दवाला री मरम्मत ऊणे लगी री ओर तेथो रे नाके बन्द ऊणे लगी रे, तेबे तिना खे बऊत बुरा लगेया; 8 ओर सबी एक मनो ते साजिश कित्ती, कि जाई की यरूशलेम शईरो रे लोका साथे लड़ाई करूँए ओर तिना दे गड़बड़ी पाऊँए। 9 पर आसे लोके आपणे परमेशरो ते प्रार्थना कित्ती ओर तिना रे डरो रे मारे रात-दिन पईरेदार ठराईते।
10 तेबे यहूदी लोक बोलणे लगे, "टोणे वाल़ेया री तागत कम ऊई गी ओर माट्टी बऊत पड़ी री, इजी री खातर दवाल आसा ते नि बणी सकदी।" 11 ओर म्हारे दुश्मण बोलणे लगे, "जदुओ तक आसे तिना बीचे नि पऊँचदे ओर तिना खे काई की तेस कामो खे बन्द नि करी देऊँगे, तदुओ तक तिना खे ना कुछ पता लगणा ओर ना कुछ दिखणा।" 12 तेबे जो यहूदी तिना रे नेड़े-तेड़े रओ थे, तिने सबी जगा ते कई बार आई-आई की आसा लोका खे बोलेया, "तुसा लोका खे आसा गे वापस आई जाणा चाईयो।" 13 इजी बजा ते मैं लोका खे तलवारी, बड़छे ओर धनुष देई की दवाला रे पीछे सबी ते थाले खुली जगा दे कराने-कराने रे मुताबिक बठयाल़ी ते। 14 तेबे आऊँ सारा काम देखी की उठेया ओर अमीर, ओर परदान ओर सबी लोका खे बोलेया, "तिना ते नि डरो; परमेशर जो महान ओर डरो जोगा ए, तेसखे ई याद करी की आपणे पाई, माठे-बेटिया, जवाणसा ओर कअरो रिया तँईं युद्ध करना।"
15 जेबे म्हारे दुश्मणे सुणेया कि आसा खे इजी गल्ला रा पता लगी गा रा कि तिना आसा पाँदे अमला करना ओर परमेशरे तिना री योजना निष्फल करी राखी, तेबे आसे सब के सब दवाला गे आपणे-आपणे कामो पाँदे वापस ऊईगे। 16 ओर तेस दिनो ते मेरे आदे सेवक तो तेस कामो खे करदे रये ओर आदे बड़छे, तलवारी, धनुष ओर झिलमा पईनी की पईरेदारिया रा काम करदे रओ थे; ओर यहूदा रे सारे कराने रे लोका पीछे जो काम करने लगी रे थे सेना रे परदान रया करो थे। 17 दवाला खे बनाणे वाल़े ओर बोजा टोणे वाल़े दोनो पार चको थे, मतलब एकी आथो साथे काम करो थे ओर दूजे आथो साथे अथियार पकड़ी की राखो थे। 18 राजमिस्त्री आपणी-आपणी खुटिया दे तलवार लटकाई की काम करो थे ओर नरसिंगा बजाणे वाल़ा मांगे रओ था। 19 इजी री खातर मैं मुखिये, परदाना ओर सबी लोका खे बोलेया, "काम तो बड़ा ओर फैलेया रा ए ओर आसे लोक दवाला पाँदे लग-लग एकी दूजे ते दूर रऊँए। 20 इजी री खातर जेथा ते तुसा खे नरसिंगा सुणो, तेथी आसा गे कट्ठे ऊई जाणा। म्हारा परमेशर म्हारी तरफा ते लड़ना।" 21 ईंयाँ आसे कामो दे लगे दे रये ओर तिना बीचा ते आदे, प्यागा तड़के ते तारे निकल़ने तक बड़छे लई की रओ थे। 22 तेबे तेस ई बखते मैं लोका खे ये बी बोलेया, "एक-एक माणूं आपणे दासा समेत यरूशलेम शईरो रे पीतरे रात बिताया करो, ताकि सेयो राती तो म्हारी रखवाल़ी करो ओर दिने कामो दे लगे दे रओ।" 23 इजी बजा ते आऊँ ना तो आपणे टाल्ले खोलूँ था ओर ना मेरे पाई, ना मेरे सेवक, ना सेओ पईरेदार जो मां पीछे चलो थे, आपणे टाल़े नि खोलो थे; हर कोई पाणिए गे बी अथियार लई की जाओ थे।