1 जेबे सम्बल्लत, तोबियाह ओर अरबी गेशेम ओर म्हारे ओरी दुश्मणा खे ये सन्देश मिलेया कि आऊँ शईरो रिया चऊँ कनारलिया दवाला री मरम्मत करी चुकेया दा ए; तेबे बी तेस बखतो तक बी मैं बड़े द्वारा रे दरवाजे नि लगाई राखे थे, तेबे बी दवाला दे कोई दरार नि रई दी थी। 2 तेबे सम्बल्लत ओर गेशेमे मांगे ये सन्देसा पेजेया, "आओ, आसे ओनो रे मैदानो रे केसी गाँवो रे एकी-दूजे साथे मिलूँए।" पर सेयो मेरा नुकशाण करना चाओ थे।

3 पर मैं तिना गे दूता रे जरीये सन्देसा पेजेया, "माखे तो बड़ा पारी काम ए, तेती नि जाई सकदा; मेरे एस कामो खे छाडी की तुसा गे आऊणे ते ये काम बन्द कऊँ रओ?"

4 तेबे तिने चार बार मांगे से ई गल्ल बोलणे खे दूत पेजे ओर मैं तिना खे तेड़ा ई ज्वाब दित्तेया। 5 तेबे पाँजी बार सेई समाचार सम्बल्लते आपणा सेवक खोली री चिट्ठी देई की मांगे पेजेया। 6 जिदे लिखी राखेया था, "जातिया-जातिया रे लोका बीचे ये बोलेया जाओआ ओर गेशेम बी येई गल्ल बोलोआ कि तेरी ओर यहूदिया री इच्छा बगावत करने री ये, ओर इजी बजा ते तूँ तेसा दवाला खे बनाणे लगी रा ओर तूँ इना गल्ला रे मुताबिक तिना रा राजा बणना चाएआ। 7 ओर तैं यरूशलेम शईरो दे नबी ठराई राखे, ताकि सेयो तेरे बारे दे ये प्रचार करो कि यहूदिया दे एक राजा ए। एबे एड़ा ई सन्देश राजे खे देणा। इजी री खातर एबे आओ, आसे मिली की सलाह् करूँए।"

8 तेबे मैं तेसगे सन्देसा पेजेया, "जेड़ा तूँ बोलणे लगी रा, तेड़ा तो कुछ पनि ए, तूँ इना गल्ला खे आपणे मनो ते बनाणे लगी रा।" 9 सेयो सब लोक ये सोची की आसा खे डराणा चाओ थे, ताकि म्‍हारे आथ टीले पड़ी जाओ, ओर काम बन्द ऊई जाओ। पर एबे ओ परमेशर तूँ माखे याओ दे। 10 एक दिन आऊँ शमायाह रे कअरे गया, जो दलायाह रा पाऊ ओर महेतबेलो रा पोता था, से तो बन्द कअरो रे था; तिने बोलेया, "आओ, आसे परमेशरो रे मईल, मतलब मन्दरो ते पीतरे आपू बीचे मिलूँए ओर मन्दरो रे द्वार बन्द करूँए; कऊँकि सेयो लोक ताखे काणे आऊणे, सेयो ताखे राथियो खे ई काणे आऊणे।" 11 पर मैं बोलेया, "क्या मां जेड़ा माणूं नठो? ओर मां जेड़ा कुण ए जो आपणे प्राण बचाणे खे मन्दरो दे कूसो? आऊँ नि जाई सकदा।" 12 तेबे माखे पता लगी गा कि से परमेशरो रा पेजेया दा नि ए, पर तिने हर गल्ल परमेशरो रा वचन बोली की मेरे नुकशाणो खे बोली, कऊँकि तोबियाह ओर सम्बल्लते तेसखे पैसा देई राखेया था। 13 तिने तेसखे इजी बजा ते पैसा देई राखेया था कि आऊँ डरी जाऊँ, ओर तेड़ा ई काम करी की पापी बणूँ, ओर तिना खे दोष लगाणे रा मोका मिलो ओर सेयो मेरी बेज्जती करी सको।

14 तेबे मैं प्रार्थना कित्ती ओ मेरे परमेशर! तोबियाह, सम्बल्लत, ओर नोअद्याह नबिया ओर जितणे नबी माखे डराणा चाओ थे, तिना सबी रे एड़े-एड़े कामा रिया बजा ते तिना खे सजा दे।

15 एलूल मीन्ने रे पच्चिये दिने, मतलब बूँजा दिना ते पीतरे दवाल बणीगी। 16 जेबे म्हारे सबी दुश्मणे ये सुणेया, तेबे म्हारे चऊँ कनारे रणे वाल़े सब दूजी जातिया रे लोक डरी गे ओर बऊत शर्मिंदा ऊए; कऊँकि तिना खे पता लगी गा कि ये काम म्हारे परमेशरो रिया तरफा ते ऊआ। 17 तिना दिना रे बी यहूदी अमीर ओर तोबियाह बीचे पर्चिया बऊत आया-जाया करो थिया। 18 कऊँकि से आराह रे पाऊ शकन्याह रा जवांई था, ओर तेसरे पाऊ यहोहानाने बेरेक्याह रे पाऊ मशुल्लामो री बेटिया साथे ब्या करी ला था; इजी बजा ते बऊत सारे यहूदिये तेसरा पक्ष करने री कसम खाई राखी थी। 19 सेयो मां सामणे तेसरे खरे कामो री चर्चा करेया करो थे ओर मेरी गल्ला बी तेसगे सुणाया करो थे ओर तोबियाह माखे डराणे खे पर्चिया पेजेया करो था।