1 कई पुरोईत ओर लेवी लोक शालतीएलो रे पाऊ जरूब्बाबेल ओर येशुअ साथे यरूशलेम शईरो खे गये थे, सेयो यो थे: सरायाह, यिर्मयाह, एज्रा, 2 अमर्याह, मल्लूक, हत्तूश, 3 शकन्याह, रहूम, मरेमोत, 4 इद्दो, गिन्नतोई, अबिय्याह, 5 मिय्यामीन, माद्याह, बिल्गा, 6 शमायाह, योयारीब, यदायाह, 7 सल्लू, आमोक, हिल्किय्याह ओर यदायाह। येशुअ रे दिना दे पुरोईत ओर तिना रे पाईया रे खास लोक यो ई थे।

8 तेबे लेविया बीचा ते यो गये: येशुअ, बिन्नूई, कदमिएल, शेरेब्याह, यहूदा ओर से मत्तन्याह जो आपणे पाईया समेत परमेशरो रा तन्यवाद करने रे कामो खे ठराया था। 9 ओर तिना रे पाई बकबुक्याह ओर उन्नो तिना सामणे आपणी-आपणी सेवकाईया रे लगे रे रओ थे।

10 तेबे येशुओ ते योयाकीम पैदा ऊआ ओर योयाकीमो ते एल्याशीब, एल्याशीबो ते योयादा, 11 योयादा ते योनातान ओर योनातानो ते यद्दू पैदा ऊआ। 12 जेबे योयाकीम बड़ा पुरोईत था तेसरे दिना दे यो पुरोईत आपणे-आपणे पितरा रे कराने रे खास मर्द थे, मतलब सरायाह रा तो मरायाह; यिर्मयाह रा हनन्याह। 13 एज्रा रा मशुल्लाम; अमर्याह रा यहोहानान। 14 मल्लूकीये रा योनातान; शबन्याह रा यूसुफ। 15 हारीमो रा अदना; मरायोतो रा हेलकै। 16 इद्दो रा जकर्याह; गिन्नतोनो रा मशुल्लाम; 17 अबिय्याह रा जिक्री; मिन्यामीनो रे मोअद्याह रा पिलतै; 18 बिल्गा रा शम्मू; शमायाह रा यहोनातान; 19 योयारीबो रा मत्तनै; यदायाह रा उज्जी। 20 सल्लै रा कल्लै, आमोको रा एबेर। 21 हिल्किय्याह रा हशब्याह ओर यदायाह रा नतनेल था। 22 एल्याशीब, योयादा, योहानान ओर यद्दूये रे दिना रे लेविया रे पितरा रे बड़े मर्दा रे नाओं लिखे जाओ थे ओर फारसो रे राजा दारे राज्य रे पुरोईता रे बी नाओं लिखे जाओ थे। 23 जो लेविया रे पितरा रे कराने रे बड़े मर्द थे तिना रे नाओं एल्याशीबो रे पाऊ योहानानो रे दिना तक इतिआसो री कताबा रे लिखे जाओ थे।

24 ओर लेविया रे खास मर्द यो थे: हशब्याह, शेरेब्याह ओर कदमिएलो रा पाऊ येशुअ ओर तिना सामणे तिना रे पाई परमेशरो रे दास दाऊदो री आज्ञा रे मुताबिक आमणे-सामणे स्तुति ओर तन्यवाद करने खे नियुक्त थे। 25 मत्तन्याह, बकबुक्याह, ओबद्याह, मशुल्लाम, तल्मोन ओर अक्कूब बड़े द्वारो गे पण्डारो रा पईरा देणे वाल़े द्वारपाल थे। 26 योयाकीमो रे दिना दे जो योसादाको रा पोता ओर येशुअ रा पाऊ था ओर नहेम्याह राज्यपाल था ओर एज्रा पुरोईत ओर शास्त्रिये रे दिना दे यो ई थे।

27 तेबे यरूशलेम शईरो री दवाला रे अर्पित करने रे बखते लेवी लोक तिना री सब जगा दे टोल़े, ताकि यरूशलेम शईरो खे पऊँचाए जाओ, जेते कि खुशी ओर तन्यवाद करी की ओर छाज, सारंगी ओर बीणा बजाई की ओर गायी की तिजी खे अर्पित करो। 28 तेबे गाणेवाल़ेया री ल्वाद यरूशलेम शईरो रे चऊँ कनारले देशो ते ओर नतोपतिया शईरो रे गाँवो ते, 29 ओर बेतगिलगाल शईरो ते ओर गेबा ओर अज्माबेतो रे डोरूआ ते कट्ठे ऊए; कऊँकि गाणेवाल़ेया यरूशलेम शईरो रे नेड़े-तेड़े गाँवो बसायी ते थे। 30 तेबे पुरोईते ओर लेविये आपू-आपू खे शुद्ध कित्तेया ओर तिने प्रजा खे ओर बड़े द्वार ओर दवाल बी शुद्ध कित्ती। 31 तेबे मैं यहूदी परदाना खे दवाला पाँदे चढ़ाई की दो बड़े दल ठराए, जो तन्यवाद करी की धूमधड़ाके साथे चलो थे। इना बीचा ते एक दल दक्खणा रिया तरफा खे, मतलब कूड़े रे बड़े द्वारो रिया तरफा री दवाला पाँदिए-पाँदिए चलेया; 32 ओर तिना पीछे-पीछे यो चले, मतलब होशायाह ओर यहूदा रे आदे परदान, 33 ओर अजर्याह, एज्रा, मशुल्लाम, 34 यहूदा, बिन्यामीन, शमायाह ओर यिर्मयाह 35 ओर पुरोईता रे कई माठे तुरहिया लई की मतलब जकर्याह जो योनातानो रा पाऊ था ओर से शमायाह रा पाऊ, शमाया मत्तन्याह रा, मत्तन्याह मीकायाह रा पाऊ, मीकायाह जक्कूरो रा पाऊ ओर जक्कूर आसापो रा पाऊ था। 36 ओर तेसरे पाई शमायाह, अजरेल, मिललै, गिललै, माए, नतनेल, यहूदा ओर हनानी परमेशरो रे दास दाऊदो रे बाजे लई की चली रे थे; ओर तिना ते आगे-आगे एज्रा शास्त्री चलेया। 37 यो सोता बड़े द्वारो ते ई सीदे दाऊदो रे शईरो री पईड़िया पाँदे चढ़ी की, दवाला री ऊचाईया पाँदे चली की, दाऊदो रे मईलो पाँदिए ऊई की, पूर्वो रिया तरफा खे पाणिए रे बड़े द्वारो तक पऊँचे।

38 तन्यवाद करने ओर धूमधड़ाके साथे चलणे वाल़ेया रा दूजा दल ओर तिना पीछे-पीछे आऊँ ओर आदे लोक तिना साथे मिलणे खे दवाला पाँदले भट्टेया रे गुम्मटो गे चौड़ी दवाला तक पऊँचे। 39 ओर तेबे एप्रैमो रे बड़े द्वार ओर पुराणे बड़े द्वार ओर मछली बड़े द्वार, हननेल गुम्मट ओर हम्मेआ नाओं रे गुम्मटो ते ऊई की पेडा रे बड़े द्वारो तक चले ओर पईरा देणे वाल़ेया रे बड़े द्वारा गे खड़े ऊईगे। 40 तेबे तन्यवाद करने वाल़ेया रे दोनो दल ओर आऊँ ओर मां साथे आदे परदान परमेशरो रे मन्दरो दे खड़े ऊईगे। 41 तेबे एल्याकीम, मासेयाह, मिन्यामीन, मीकायाह, एल्योएनै, जकर्याह ओर हनन्याह नाओं रे पुरोईत तुरहिया लई की थे। 42 मासेयाह, शमायाह, एलीआजार, उज्जी, यहोहानान, मल्किय्याह, एलाम ओर एजेर खड़ी रे थे ओर गाणे वाल़े जिना रा मुखिया यिज्रह्माह था, सेयो जोरे की गांदे बजांदे रये। 43 तेस ई दिने लोके बड़े-बड़े मेलबलि चढ़ाए ओर खुशी मनाई; कऊँकि परमेशरे सेयो बऊत ई खुश कित्ते थे; जवाणसे ओर बाल बच्चेया बी खुशी मनाई। यरूशलेम शईरो री खुशिया री आवाज दूरो-दूरो तक फैली गी।

44 तेस दिने ई खजानेया रे, चकी री पेंटा रे, पईली-पईली उपजा रे ओर दशमांशो री कमरे रे अधिकारी बणाए, ताकि तिना दे शईरो-शईरो रे डोरूआ रे मुताबिक तिना चीजा खे जमा करो, जो बिधान रे मुताबिक पुरोईत ओर लेविया रे इस्से री थिया; कऊँकि यहूदी आए दे पुरोईत ओर लेविया रिया बजा ते खुश थे। 45 इजी री खातर सेयो आपणे परमेशरो रे काम ओर शुद्धता रे बारे चौकसी करदे रये; ओर गाणे वाल़े ओर द्वारपाल बी दाऊद ओर तेसरे पाऊ सुलैमानो री आज्ञा रे मुताबिक तेड़ा ई करदे रये। 46 पुराणे बखतो ते, मतलब दाऊद ओर आसापो रे दिना दे तो गाणेवाल़ेया रे परदान थे ओर परमेशरो री स्तुति ओर तन्यवादो रे गाणे गाए जाओ थे। 47 जरूब्बाबेल ओर नहेम्याह रे दिना रे सारे इस्राएली, गाणे वाल़े ओर द्वारपाला खे हर रोजो रा इस्सा देंदे रये ओर सेयो लेविया रा इस्सा पवित्र करी की देयो थे ओर लेवी लोक हारूणो री ल्वादा रा इस्सा पवित्र करी की देयो थे।