एज्रा 1

गुलाम यहूदिया रा यरूशलेम शईरो खे वापस जाणा

1 फारस देशो रे राजा कुस्रूए रे राज रे पईले सालो रे यहोवे फारसो रे राजा कुस्रूए रा मन उभारेया, ताकि यहोवे रा जो वचन यिर्मयाह नबीए रे मुंए ते निकल़ेया था से पूरा ओ, इजी री खातर तिने आपणे सारे राज्य दे ये प्रचार करवाया ओर लिखाई बी दित्तेया 2 "आऊँ फारसो रा राजा कुस्रू ए। स्वर्गो रे यहोवा परमेशरे जो इस्राएलो रा बी परमेशर ए, तिने आऊँ पूरी तरतिया रिया सबी जातिया पाँदे परदान चूणी राखेया। ओर तिने माखे यरूशलेम शईरो दे, जो यहूदा रे इलाके दे ए, तेसरिया तँईं एक मन्दर बनाणे खे आऊँ चूणी राखेया ए। 3 तेसरी सारी प्रजा रे लोका बीचा ते तुसा बीचे जो कोई ओ, तेसरा परमेशर तेस साथे रओ ओर से यहूदा रे यरूशलेम शईरो दे जाई की इस्राएलो रे परमेशर यहोवे रा मन्दर बणाओ, जो यरूशलेम शईरो दे ए, सेई परमेशर ए। 4 इस्राएली जातिया रे बचे दे लोक, जेती-जेती रओए, तेते जगा रे माणूं चाँदी, सूईना, तअन ओर डांगर देई की तेसरी मताद करो ओर इजी ते जादा परमेशरो रे यरूशलेम शईरो रे मन्दरो रे आपणी-आपणी इच्छा ते बी पेंट चढ़ाओ।"

5 तेबे यहूदा ओर बिन्यामीनो रे गोत्रो दे जितणे पितरा रे कराने रे खास लोक ओर पुरोईत ओर लेविया बिचा ते परमेशरे जिना लोका रा मन उभारेया था कि जाई की यरूशलेम शईरो दे यहोवे रा मन्दर बणाओ, सेयो सब उठी की खड़े ऊए; 6 ओर तिना रे नेड़े-तेड़े रे सब रणे वाल़ेया चाँदिए रे पांडे, सूईना, डांगर ओर कीमती चीजा देई की, तिना री मताद कित्ती; इजी ते जादा लोके आपणी-आपणी इच्छा ते यहोवे रे मन्दरो खे पेंट दित्ती।

7 तेबे यहोवे रे मन्दरो रे जो पवित्र पांडे नबूकदनेस्सर राजे यरूशलेम शईरो ते निकयाल़ी की आपणे देवते रे मन्दरो दे राखे थे,*1:7 2 राज. 25:8-17 8 फारसो रे राजा कुस्रूए आपणा से माणूं जो तेसरे सारे तअन-दौलता री देखपाल़ करो था, इना चीजा खे बारे ल्याऊणे खे बोलेया। तेस माणूंए रा नाओं मिथ्रदात था। तेबे तिने सेयो सब चीजा यहूदिया रे शेशबस्सर नाओं रे परदानो गे गिणी की सम्बाल़ितिया। 9 तिना री गिणती ये थी, मतलब सूईने रे तीई ओर चाँदिए रे 1,000 पराती ओर उणत्ती छुरिया, 10 सूईने रे तीई कटोरे ओर अल़्के चाँदिए रे 410 कटोरे ओर ओरी प्रकारा रे 1,000 पांडे। 11 सूईने चाँदिए रे सारे पांडे मिलाई की 5,400 थे। इना सबी खे शेशबस्सर तेस बखते ल्याया जेबे गुलाम लोक बाबेलो ते यरूशलेम शईरो खे आए।