एज्रा 8

एज्रा रा साथिया समेत यरूशलेम शईरो दे पऊँचणा

1 तिना रे बुजुर्गा रे कराने रे बड़े-बड़े मर्द यो ए ओर जो लोक राजा अर्तक्षत्रो रे राज्य रे बाबेलो ते मां साथे यरूशलेम शईरो खे गये तिना री वंशावली ये ए: 2 मतलब पीनहासो रे कुलो बीचा ते गेर्शोम, ईतामारो रे कुलो बीचा ते दानिय्येल, दाऊदो रे कुलो बीचा ते हत्तूश। 3 शकन्याह रे कुलो रे परोशो रे गोत्रो बीचा ते जकर्याह, जेस साथे 150 मर्दा री वंशावली ऊई। 4 पहत्मोआबो रे कुलो बीचा ते जरहयाह रा पाऊ एल्यहोएनै, जेस साथे 200 मर्द थे। 5 शकन्याह रे कुलो बीचा ते यहजीएलो रा पाऊ, जेस साथे 300 मर्द थे। 6 आदीनो रे कुलो बीचा ते योनातानो रा पाऊ एबेद, जेस साथे पंजा मर्द थे। 7 एलामो रे कुलो बीचा ते अतल्याह रा पाऊ यशायाह, जेस साथे सत्तर मर्द थे। 8 शपत्याह रे कुलो बीचा ते मीकाएलो रा पाऊ जबद्याह, जेस साथे अस्सी मर्द थे। 9 योआबो रे कुलो बीचा ते यहीएलो रा पाऊ ओबद्याह, जेस साथे 218 मर्द थे। 10 शलोमीतो रे कुलो बीचा ते योसिव्याह रा पाऊ, जेस साथे 160 मर्द थे। 11 बेबै रे कुलो बीचा ते बेबैए रा पाऊ जकर्याह, जेस साथे ठाई मर्द थे। 12 अजगादो रे कुलो बीचा ते हक्कातानो रा पाऊ योहानान, जेस साथे 110 मर्द थे। 13 अदोनीकामो रे कुलो बीचा ते जो पीछे गये तिना रे यो नाओं ए: मतलब एलीपेलेत, यूएल ओर शमायाह ओर तिना साथे साठ मर्द थे। 14 ओर बिगवै रे कुलो बीचा ते ऊतै ओर जक्कूर थे ओर इना साथे सत्तर मर्द थे।

15 तेबे मैं एज्रे यो तेसा नदिया गे जो अहवा रिया तरफा खे बह्ओई कट्ठे कित्ते ओर आसे तेती तीऊँ दिना तक डेरे लगाई की राखे ओर मैं तेती लोक ओर पुरोईत देखे पर कोई लेवी नि दिखेया। 16 मैं एलीएजेर, अरीएल, शमायाह, एलनातान, यारीब, एलनातान, नातान, जकर्याह ओर मशुल्लाम जो खास मर्द थे ओर योयारीब ओर एलनातानो खे जो अक्लमंद थे 17 बुलाई की, इद्दो गे जो कासिप्या नाओं री जगा रा परदान था, पेजी ते ओर इना खे समजयाई ता कि कासिप्या जगा रे इद्दो ओर तेसरे पाई मन्दरो दे सेवा करने वाल़े लोका खे क्या-क्या बोलणा, ताकि सेयो आसा गे म्हारे परमेशरो रे मन्दरो खे सेवा-टईल करने वाल़ेया खे ली आओ। 18 म्हारे परमेशरो री दया-दृष्टि जो आसा पाँदे ऊई इजी रे मुताबिक आसा गे ईश्शेकेल, जो इस्राएलो रा पड़पोता ओर लेविये रा पोता महलीए रे कुलो बीचा ते था ओर शेरेब्याह जो एक अक्लमंद माणूं था तेसखे ओर तेसरे पाऊ ओर पाईया खे, मतलब ठारा जणेया खे; 19 ओर हशब्याह खे ओर तेस साथे मरारीये रे कुलो बीचा ते यशायाह खे ओर तेसरे पाऊ ओर पाईया खे, मतलब बीइ जणेया खे; 20 ओर तिना साथे मन्दरो दे 200 सेवादार बी पेजे। तिना रे बुजुर्ग सेयो लोक थे जो दाऊद ओर तेसरे बड़े अधिकारिए लेविया री मताद करने खे चूणी राखे थे। इना सबी रे नाओं लिखे रे थे।

बअरत ओर प्रार्थना

21 तेबे मैं तेती, मतलब अहवा नदिया रे कनारे बअरतो रा प्रचार इजी रिया तँईं कराया, ताकि आसे परमेशरो सामणे दीन ओ ओर तेसते आपणे ओर आपणे बाल-बच्चे ओर आपणी सारी सम्पत्तिया रिया तँईं सीदी यात्रा मांगू। 22 कऊँकि आऊँ बाटा रे दुश्मणा ते बचणे रिया खातर सिपाईया रा दल ओर सवार राजे ते माँगणे ते शर्माऊँ था, कऊँकि आसे राजे खे ये बोली चुके थे, "म्हारा परमेशर आपणे सबी टोल़ने वाल़ेया पाँदे, पलाई करने खे दया-दृष्टि राखोआ ओर जो तेसखे छाडी देओए, तेसरी तागत ओर कोप तिना रे खलाफ ए।" 23 इजी बजा ते आसे बअरत करी की आपणे परमेशरो ते प्रार्थना कित्ती ओर तिने म्हारी सुणी। 24 तेबे मैं पुरोईता रे मुखिया बीचा ते बारा मर्द, मतलब शेरेब्याह, हशब्याह ओर इना रे दस पाई लग करी की, जो सूईना, चाँदी ओर पांडे, 25 राजे ओर तेसरे मंत्री ओर तेसरे परदाने ओर जितणे इस्राएली आजीर थे तिने म्हारे परमेशरो रे मन्दरो खे पेंट दित्ते थे, सेयो तोली की तिना खे दित्ते। 26 मैं तिना रे आथो दे कोई पच्ची टन चाँदी, कोई 3,400 किलो चाँदिए रे पांडे, 27 ह्जार सूईने रे सिक्केया री किमती वाल़े बीइ कटोरे ओर सूईने जेड़े कीमती शुद्ध चमकणे वाल़े पीतल़ी रे दो पांडे तोली की दित्ते। 28 तेबे मैं तिना खे बोलेया, "तुसे तो यहोवे खे पवित्र ए ओर यो पांडे बी पवित्र ए ओर ये चाँदी ओर सूईना पेंटा राए, जो तुसा रे पितरा रे यहोवा परमेशरो खे खुशिया साथे देई राखे। 29 इजी री खातर जागदे रओ ओर जदुओ तक तुसे इना खे यरूशलेम शईरो रे परदान पुरोईत, लेवी ओर इस्राएली लोका रे पितरा रे कराने रे परदाना सामणे यहोवे रे मन्दरो रे कमरे रे तोली की नि देओ, तदुओ तक इना री रक्षा करदे रओ।" 30 तेबे पुरोईते ओर लेविये चाँदी, सूईना ओर पांडे तोली की लई ले, ताकि तिना खे यरूशलेम शईरो रे म्हारे परमेशरो रे मन्दरो रे पऊँचाओ।

यरूशलेम शईरो रिया तरफा खे चलणा

31 पईले मीन्ने रे बारूए दिने आसे अहवा नदिया ते यरूशलेम शईरो खे चले ओर म्हारे परमेशरो री दया-दृष्टि आसा पाँदे रई ओर तिने आसे दुश्मणा ते ओर बाटा रे लूटेरेया ते बचाए। 32 बादो ते आसे यरूशलेम शईरो दे पऊँचे ओर तेती तीऊँ दिना तक रये। 33 तेबे चौथे दिने से चाँदी, सूईना ओर पांडे म्हारे परमेशरो रे मन्दरो दे ऊरिय्याह रे पाऊ मरेमोत पुरोईतो रे आथो दे तोली की दित्ते। तेस साथे पीनहासो रा पाऊ एलीआजार था ओर तिना साथे येशुअ रा पाऊ योजाबाद लेवी ओर बिन्नूईए रा पाऊ नोअद्याह लेवी थे। 34 सेयो सब चीजा तोलिया ओर गिणिया ओर तिना रा बजन तेस बखते ई लिखी ता। 35 जो गुलामिया ते आए थे, तिने इस्राएलो रे परमेशरो खे होमबलि चढ़ाए; मतलब सारे इस्राएली लोका रिया तँईं बारा बाच्छू, छयानुए खाडू ओर सतत्तर मिन्टू चढ़ाए ओर पापबलिया खे बारा बाकरे चढ़ाए; ये सब यहोवे खे होमबलि था। 36 तेबे तिने राजे रिया आज्ञा फरात नदिया रे पच्छमा रिया जगा दे अधिकारिया ओर राज्यपाला खे दित्तिया ओर तिने इस्राएली लोका री ओर परमेशरो रे मन्दरो रे कामो दे मताद कित्ती।