एज्रा 9

यहूदा रे पापो रिया बजा ते एज्रा री प्रार्थना

1 इना सबी कामा रे करने ते बाद परदान मांगे आई की बोलणे लगे, "ना तो इस्राएली लोक, ना पुरोईत, ना लेवी एस कनारले देशो रे लोका ते लग ऊए; बल्कि तिना जेड़े, मतलब कनानी, हित्ती, परिज्जी, यबूसी, अम्मोनी, मोआबी, मिस्री ओर एमोरिया जेड़े घिनौने काम करदे रये। 2 ओर तिने तिना री बेटिया साथे आपणा ओर आपणे पाऊआ रा ब्या करी ता रा ओर पवित्र कुल एस कनारले देशो रे लोका साथे मिली गा रा, बल्कि परदान ओर सरदार लोक ई एस तोखे रे कामो खे करने खे आगे आई रे।" 3 जिंयाँ ई ये गल्ल सुणी मैं आपणा चोगा ओर टाल्ले फाड़े ओर आपणे सिरो रे ओर दाढ़िया रे बाल़ पट्टे ओर बऊत जादा दु:खी ऊई की बैठेया रा रया।*9:3 मत्ती 26:65, अय्यू. 1:20 4 तेबे जितणे लोक इस्राएलो रे परमेशरो रा वचन सुणी की गुलामिया ते आए रे लोका रे विश्वासघातो रिया बजा ते डरो थे, सारे मांगे कट्ठे ऊए ओर आऊँ साँजा रिया पेंटा तक शर्मिंदा ऊई की बैठेया रा रया। 5 पर साँजकी पेंटा रे बखते आऊँ फटे दे टाल्ले ओर चोगे साथ बअरत करी की उठेया, तेबे आऊँ जानूआ रे पारे चुकेया ओर आपणे आथ आपणे परमेशर यहोवे रिया तरफा खे फैलाई की बोलेया, 6 "ओ मेरे परमेशर! माखे आपणा मूँ तां सामणे चकदे ऊए शर्म आऊणे लगी री, ओर ओ मेरे परमेशर! मेरा मूँ काल़ा ए; कऊँकि आसा लोका रे पापो रे काम आसा रे सिरो पाँदे बढ़ीगे रे ओर म्हारा दोष बढ़दे-बढ़दे सर्गो तक पऊँची गा रा।*9:6 दानि. 9:7,8 7 आपणे बुजुर्गा रे दिना ते लई की आजके दिन तक आसे बड़े दोषी ए ओर आपणे पापो रे कामो रिया बजा ते आसे आपणे राजेया ओर पुरोईता समेत देशो-देशो रे राजेया रे आथो रे कित्ते, ताकि तलवार, गुलामी, लुटणे ओर मूँ काल़ा ऊणे रिया मुसीबता रे पड़ूँ, जेड़ी की आज म्हारी दशा ए। 8 एबे थोड़े दिना ते म्हारे परमेशर यहोवे री दया आसा पाँदे ऊई री, ताकि आसा बीचा ते कोई-कोई बची की निकल़ो ओर आसा खे तेसरी पवित्र जगा दे पैर राखणे खे जगा मिलो ओर म्हारा परमेशर म्हारी आखी दे जोति आऊणे देयो ओर गुलामिया ते आसा खे थोड़ा राम मिलो। 9 आसे दास तो आए ई, पर म्हारी गुलामिया दे बी म्हारे परमेशरे आसे नि छाडे, बल्कि फारसो रे राजे आसा पाँदे एड़े दयावान कित्ते, ताकि आसा खे नवीं जिन्दगी मिलो ओर आसे आपणे परमेशरो रे मन्दरो खे बनाई ओर सुदारी सकिये ओर आसा खे यहूदा ओर यरूशलेम शईरो दे सुरक्षा मिलो।" 10 एबे ओ म्हारे परमेशर इजी ते बाद आसे क्या बोलूँ, येई कि आसे तेरिया सेयो आज्ञा तोड़ी ती रिया,*9:10 दानि. 9:5,10,11 11 जो तैं ये बोली की आपणे नबी दासो रे जरीये दित्ती, "जेस देशो रे अधिकारी ऊणे खे तुसे जाणे वाल़े ए, से तो देश-देशो रे लोका री अशुद्धता रिया बजा ते ओर तिना रे बुरे कामो रिया बजा ते अशुद्ध देश ए, तिने से एक बन्ने ते दूजे बन्ने तक आपणी अशुद्धता साथे परी ता रा। 12 इजी री खातर तैं ना तो आपणी बेटिया रा ब्या तिना रे माठेया साथे करना ओर ना तिना री बेटिया रा ब्या आपणे माठेया साथे करना ओर ना कदी तिना री शान्ति चाणी, इजी खे ताकि तुसे तागतबर बणो ओर तेस देशो रे अच्छे-अच्छे पदार्थ खाई सको ओर तिजी खे एड़ा छाडो, ताकि से तुसा रे कुलो रे अक्को दे सदा बणेया रा रओ।"

13 ओर इना सबी ते बाद जो म्हारे बुरे काम ओर बड़े दोषो रिया बजा ते जो कुछ आसा पाँदे बीतेया, जबकि ओ म्हारे परमेशर तैं म्हारे पापो बराबर आसा खे सजा नि दित्ती, बल्कि आसा बीचा ते कितणे बचायी की राखे, 14 तेबे बी आसे तेरी आज्ञा खे फेर ना मानी की बुरे काम करने वाल़ेया लोका साथे रिश्तेदादारी करी राखी। तां आसा पाँदे एथो तक कोप करना तां आसे मिटाई देणे ओर आसा बीचा ते कोई बी जिऊँदा नि रणा। 15 ओ इस्राएलो रे यहोवा परमेशर! तूँ तो तर्मी ए, आसे बची की आजाद ऊई रे, जेड़ा कि आज ए। देख, आसे तां सामणे दोषी ए, इजी बजा ते कोई तां सामणे खड़ा नि रयी सकदा।