एज्रा 6

दारा राजे रा उक्कम

1 तेबे दारा राजे री आज्ञा ते बाबेलो दे जेती पुराणे दस्तावेज सम्बाल़ी की राखी राखो थे ओर जेती खजाना बी रओ था, टोल़ कित्ती। 2 तेबे मादे नाओं रे राज्य रे एकबतना शईरो रे राजगढ़ो दे एक कताब मिली, जिदे ये लिखी राखेया था, 3 "फारसो रे राजा कुस्रूए रे पईले सालो दे तिने कुस्रू राजे ई ये आज्ञा दित्ती कि परमेशरो रे मन्दरो रे बारे दे जो यरूशलेम शईरो रे ए, मतलब से मन्दर जिदे बलिदान करो थे, तेतेखे बणाओ ओर तिजी री निऊँ मजबूत बनाणी, तेतेरी ऊचाई ओर चौड़ाई साठ-साठ आथो री ओ; 4 तिदे तीन रद्दे पारी-पारी पात्थरा रे ओ ओर एक परत नवींया लकड़िया री ओ ओर इना री कीमत राजमईलो ते देणी।"

परमेशरो रे मन्दरो खे फेर बनाणे रा उक्कम

5 परमेशरो रे मन्दरो दे जो सूईने ओर चाँदिए रे पांडे नबूकदनेस्सर राजे यरूशलेम शईरो रे मन्दरो ते निकल़वाई की बाबेलो खे पऊँचाए थे से वापस करी की यरूशलेम शईरो रे मन्दरो दे आपणी-आपणी जगा पाँदे पऊँचाओ ओर तैं सेयो परमेशरो रे मन्दरो दे राखी देणे।

6 फेर दारा राजे आपणे कर्मचारिया खे ये उक्कम दित्तेया, "एबे ओ फरात नदिया रिया पच्छमा रिया जगा रे परदान तत्तनै! ओ शतर्बोजनै! तुसे आपू साथे काम करने वाल़ेया लोका समेत ओर फरात नदिया रिया पच्छमा रिया जगा दे फारसिया समेत यहूदी लोका ते दूर रओ; 7 परमेशरो रे मन्दरो रे तेस कामो खे नि रोको; यहूदिया रे परदान ओर यहूदिया रे बुजुर्गा खे परमेशरो रे तेस मन्दरो खे तेसरी जगा देई बनाणे देयो। 8 बल्कि आऊँ उक्कम देऊँआ कि तुसा खे यहूदिया रे तिना बुजुर्गा साथे एड़ा बर्ताव करना कि परमेशरो रा से मन्दर बणाया जाओ; मतलब राजे रे तअनो बीचा ते, फरात नदिया रे पारले करो बीचा ते, तिना लोका खे फटाफट खर्चा देणा; एड़ा नि ओ कि तिना खे रूकणा पड़ो। 9 तेबे क्या खाडू, क्या बाच्छू, क्या मिन्टू, स्वर्गो रे परमेशरो री होमबलिया खे जेते-जेते चीजा री तिना खे जरूरत ओ ओर जितणी कणक, लूण, शराब ओर तेल यरूशलेम शईरो रे पुरोईत बोलो, से सब तिना खे बिना पूल-चूका ते हर रोज दित्तेया जाओ, 10 ताकि सेयो स्वर्गो रे परमेशरो खे सुख देणे वाल़ा खुशबूदार बलि चढ़ाई की, राजा ओर राजकुमारा खे लाम्बी उम्रा री प्रार्थना करेया करो।"

11 आऊँ राजा ऊणे रिया बजा ते ये आज्ञा देऊँआ, "जो कोई बी माणूं एसा आज्ञा खे टाल़ोगा, तेसरे कअरो री कअड़ी निकयाल़ी देणी ओर तेते पाँदे से आपू चढ़ाई की जकड़ी देणा ओर तेसरा कअर एस अपराधो रिया बजा ते पूरी तरआ ते नाश करी देणा। 12 परमेशर जिने तेती आपणे रणे री जगा ठराई राखी, से क्या राजा, क्या प्रजा, तिना सबी खे जो एसा आज्ञा खे टाल़ो ओर परमेशरो रे मन्दरो खे जो यरूशलेम शईरो रे ए नाश करने खे आथ चको से तेसखे नाश करो। मैं दारे ये आज्ञा देई राखी फटाफट एड़ा ई करना।"

मन्दरो रा काम पूरा ऊणा

13 तेबे फरात नदिया रे पच्छमी प्रदेशो रे परदान तत्तनै ओर शतर्बोजनै ओर तिना रे साथिये राजा दारे रा चिट्ठी पेजणे रिया बजा ते, तेसरे ई मुताबिक फटाफट काम कित्तेया। 14 तेबे यहूदी बुजुर्ग लोक, हाग्गै नबी ओर इद्दो रे पाऊ जकर्याह नबीए री भविष्यबाणी करने रे मुताबिक परमेशरो रा मन्दर बनाणे दे सफल ऊए ओर तिने इस्राएलो रे परमेशरो री आज्ञा रे मुताबिक ओर फारसो रे राजा कुस्रू, दारा ओर अर्तक्षत्रो री आज्ञा रे मुताबिक बणांदे-बणांदे से पूरा कित्तेया। 15 ईंयाँ से मन्दर राजा दारा रे राज्य रे छठुए साले अदार मीन्ने रे तीजे दिने बणी की पूरा ऊआ।

16 इजी ते बाद इस्राएली लोक, मतलब पुरोईत, लेविये ओर जितणे गुलामिया ते आए थे तिने तेस मन्दरो री प्रतिष्ठा बड़ी खुशिया साथे कित्ती। 17 तेस मन्दरो री प्रतिष्ठा रे तिने 100 बल़द ओर 200 खाडू ओर 400 मिन्टू पेंट करी की चढ़ाए। तेबे सबी इस्राएली लोका रिया तँईं पापबलि करी की इस्राएलो रे गोत्रा री गिणतिया रे मुताबिक बारा बाकरे चढ़ाए। 18 तेबे जेड़ा मूसे रे बिधानो री कताबा दे लिखी राखेया, तेड़ा ई तिने परमेशरो री आराधना खे जो यरूशलेम शईरो रे ए, बारी-बारी करी की पुरोईत ओर दल-दल करी की लेवी नियुक्त करीते।

फसह रा त्यार मनाणा

19 तेबे यहूदी सालो रे पईले मीन्ने रे चौदुए दिने गुलामिया ते आए रे लोके फसह मनाया। 20 कऊँकि पुरोईते ओर लेविये एक मन ऊई की, आपू-आपू खे शुद्ध कित्तेया था; इजी री खातर सेयो सब के सब शुद्ध थे ओर तिने गुलामिया रे आए रे सबी लोका खे आपणे पुरोईत पाईया खे ओर आपू-आपू खे फसह रे डांगर बलि कित्ते। 21 तेबे गुलामिया ते वापस आए रे इस्राएली लोक ओर जितणे ओर दूजी जातिया री अशुद्धता ते इजी खे लग ऊए थे कि इस्राएलो रे परमेशर यहोवे पीछे चलो, तिने सबी फसह री रोटी खाई। 22 तेबे सेयो बिना सजेड़े री रोटिया रा त्योआर सात दिन तक खुशिया साथे मनांदे रये; कऊँकि यहोवे सेयो खुश कित्ते थे ओर अश्शूरो रे राजे रा मन तिना रिया तरफा खे एड़ा फेरेया कि से परमेशर, मतलब इस्राएलो रे परमेशरो रा मन्दर बनाणे खे तिना री मताद करो।