2 इतिआस 1

सुलैमानो रे राज्य री शुरूआत

1 दाऊदो रा पाऊ राजा सुलैमान आपणे राज्य दे स्थिर ऊईगा ओर तेसरे यहोवा परमेशरे से बऊत ई महान बणाया। 2 सुलैमाने इस्राएलो रे सारे लोक कट्ठे ऊई की आऊणे खे बुलाए। तिना बीचे सेयो सेना रे अधिकारी बी थे जो 1,000 सिपाईया पाँदे अधिकारी थे ओर जो 100 सिपाईया पाँदे अधिकारी थे। तिना दे न्यायी, इस्राएली लोका रे परदान, ओर पीतरा रे कराने रे खास-खास मर्द बी आई रे थे। 3 तेबे सुलैमान पूरी मण्डल़िया समेत गिबोन शईरो री पाह्ड़िया पाँदे गया, कऊँकि परमेशरो रा मिलणे वाल़ा तम्बू, जो यहोवे रे दास मूसे उजाड़ जगा दे बणाया था, से तेथी था। 4 बऊत बखत पईले परमेशरो रे वादे रे सन्दूको खे राजा दाऊद किर्यत्यारीम शईरो ते तेसा जगा खे ली आया था जो तिने तेसरिया तँईं बणाई थी, तिने तो तेसखे यरूशलेम शईरो दे एक तम्बू खड़ा करवाया था। 5 पर पीतल़ी री जो बेदी ऊरीए रे पाऊ बसलेले, जो हूरो रा पोता था, बणाई थी, से गिबोनो दे यहोवे रे रणे री जगा सामणे थी। इजी री खातर सुलैमान मण्डल़िया खे साथे लई कि तेती गया। 6 सुलैमाने तेती तेसा पीतल़ी री बेदिया गे जाई की, जो यहोवे रे सामणे मिलणे वाल़े तम्बूए गे थी, तेते पाँदे 1,000 होमबलि चढ़ाए।

बुद्धिया रिया तँईं सुलैमानो री प्रार्थना

7 तेस ई दिने राती परमेशरे सुलैमानो खे दर्शण देई की तेसखे बोलेया, "जो कुछ तूँ चाएआ कि आऊँ ताखे देऊँ, से मांते माँग।" 8 सुलैमाने परमेशरो ते बोलेया, "तूँ मेरे बाओ दाऊदो पाँदे बड़ी कृपा करदा रया ओर आऊँ तेसरी जगा पाँदे राजा बणाया। 9 एबे ओ यहोवा परमेशर! जो वचन तैं मेरे बाओ दाऊदो खे देई राखेया था, से पूरा ओ; तैं तो आऊँ एड़ी प्रजा रा राजा बणाई की स्थिर करी राखेया जो जमीना री तूड़ा री कणियां जेड़ी बऊत ई। 10 इजी री खातर एबे तूँ माखे एड़ी बुद्धि ओर ज्ञान दे, ताकि आऊँ इना लोका खे चलाणे वाल़ा एक अच्छा राजा बणी सकुँ। जे तूँ मेरिया खातर एड़ा करेगा तो ई आऊँ तेरे लोका रे एस महान राज्य पाँदे शासन करी सकूँआ।"

11 परमेशरे सुलैमानो खे ज्वाब दित्तेया, "तेरी जो एड़ी ई इच्छा ऊई, मतलब तैं ना तो तअन-सम्पत्ति मांगी, ना ऐश्वर्य, ओर ना आपणे बैरिया रे प्राण ओर ना आपणी लाम्बी उम्र मांगी, बस बुद्धि ओर ज्ञानो रा वरदान मांगेया, जेते की तूँ मेरी प्रजा खे, जेसा पाँदे मैं तूँ राजा बणाई राखेया, मेरिया बाटा दे चलाई सके, 12 इजी बजा ते बुद्धि ओर ज्ञान आऊँ ताखे देऊँआ। ओर मां ताखे इतणा तअन-सम्पत्ति ओर ऐश्वर्य देणा, जितणा ना तो तांते पईले केसी राजे खे मिलेया ओर ना तांते बाद केसी राजे खे मिलणा।"

सुलैमानो री सेना ओर शक्ति

13 तेबे सुलैमान गिबोनो री ऊच्ची जगा ते, मतलब मिलणे वाल़े तम्बूए रे सामणे ते यरूशलेम शईरो खे आया ओर तेथी इस्राएलो पाँदे राज करने लगेया। 14 जिंयाँ-जिंयाँ मीन्ने ओर साल बीतदे गये। राजा सुलैमानो गे रथा खे चलाणे खे जादा ते जादा लड़ाईया खे गडिया ओर कोड़े मिलणे लगे। तेसगे 1,400 रथ ओर 12,000 कोड़ेया रे सवार थे। तिने कुछ रथ ओर कोड़े रथो रे शईरो दे राखे ओर बाकि ओरी खे से आपू साथे यरूशलेम शईरो खे लईगा। 15 राजा सुलैमानो रे राजो रे बखते यरूशलेम शईरो दे सूईने-चाँदिए री कीमत पात्थरा जेड़ी आम ऊईगी। ओर यहूदा रे थालले इलाके दे देवदारा री कीमत गूलरो रे डाल़ा बराबर मतलब बऊत ई कम ऊईगी। 16 जो कोड़े सुलैमान राखो था सेयो मिस्रो ते आओ थे ओर राजे रे बपारी तिना खे जो तिना री कीमत राखी राखो थे, चूण्डा रे चूण्ड खरीदो थे। 17 तिने मिस्रो दे खरीदे दे हर एकी रथो रिया तँईं 600 सिक्के चाँदिए रे दित्ते। तिने हर एक कोड़ा 150 चाँदिए रे सिक्के देई की खरीदेया था। तिने हित्तिया रे सबी राजेया ओर अरामो रे राजेया खे रथ ओर कोड़े बेचे।