1 राणी अतल्याह रे राजो रे सातवे साले पुरोईत यहोयादे याओ बानी की यरोहामो रे पाऊ, अजर्याह, यहोहानानो रा पाऊ इश्माएल, ओबेदो रे पाऊ अजर्याह, अदायाह रे पाऊ मासेयाह ओर जिक्रीए रे पाऊ एलीशापात, इना सेनापतिया साथे वाचा बानी। 2 तेबे सेयो यहूदा रे कूमी की सारे शईरा ते लेविया खे ओर इस्राएलो रे पितरा रे करानेया रे खास-खास मर्द कट्ठे करी की यरूशलेम शईरो खे ल्याए। 3 तेसे सारी मण्डल़िए परमेशरो रे मन्दरो रे राजे साथे वाचा बानी ओर यहोयादे तिना खे बोलेया, "सुणो, एस राजकुमारो राज्य करना जेड़ा कि यहोवे दाऊदो रे कुलो रे बारे दे बोली राखेया। 4 तेबे तुसे एक काम करो, मतलब तुसे पुरोईत ओर लेविया रे एक तिहाई लोक जो रामो रे दिने आऊणे वाल़े ओ, सेयो रखवाल़ी करो, 5 तुसा बीचा ते एक तिहाई पुरोईत ओर लेविया खे राजमईलो री रखवाल़ी करनी चाईयो। ओर एक तिहाई लोक निऊँआ रे बड़े द्वारो गे रओ ओर सारे लोक यहोवे रे मन्दरो रे आँगणो रे रओ। 6 पर पुरोईत ओर सेवा-टईल करने वाल़े लेविया खे छाडी की ओर कोई यहोवे रे मन्दरो दे पीतरे नि आओ, सेयो तो पीतरे आओ, कऊँकि सेयो पवित्र ए, पर सारे लोक यहोवे रे मन्दरो री निगरानी करो। 7 लेविये लोक आपणे-आपणे आथो रे अथियार लई की राजे रे चऊँ कनारे रये ओर जो कोई मन्दरो रे पीतरे कूसो, तेसखे काई देयो ओर तुसे राजे रे आऊँदे-जांदे तेस साथे रणा।" 8 यहोयादा पुरोईतो री इना सबी आज्ञा रे मुताबिक लेविये ओर यहूदिये कित्तेया। तिने रामो रे दिने आऊणे वाल़े ओर जाणे वाल़े दुँईं दलो रे आपणे-आपणे माणूं आपू साथे करी ले, कऊँकि यहोयादा पुरोईते केसी बी दलो रे लेवी नि पेजे थे। 9 तेबे यहोयादा पुरोईते सेनापतिया खे दाऊद राजे रे बड़छे, भाल़े ओर ढाला, जो परमेशरो रे मन्दरो रे थिया, देईतिया। 10 तेबे तिने तिना सबी लोका खे आपणे-आपणे आथो दे अथियार लई की मन्दरो रे दक्खण कूणे ते लई की, उत्तरी कूणे तक बेदी ओर मन्दरो गे राजे रे चऊँ कनारे ओर तिना री आड़ करी की खड़ा करी ता। 11 तेबे तिने राजकुमार बारे ल्याया ओर तेसरे सिरो पाँदे मुकुट राखेया ओर गवाईया री चिट्ठी देई की से राजा बणाया ओर यहोयादा ओर तेसरे पाऊए तेसरा अभिषेक कित्तेया, तेबे सबी लोके जोरे की बोलेया, "राजा लाम्बी उम्र जिओ।" 12 जेबे अतल्याह खे तिना लोका रा आल्ला, जो दौड़ो ओर राजे खे सराणे लगी रे थे, सुणेया, तेबे से लोका गे यहोवे रे मन्दरो रे गई। 13 तेसे क्या देखेया कि राजा मन्दरो रे द्वारो रे नेड़े खम्बे गे खड़ी रा ओर राजे गे परदान ओर तुरही बजाणे वाल़े खड़ी रे ओर सब लोक खुशी मनाणे लगी रे, तुरहिया बजाणे लगी रे ओर गाणे-बजाणे वाल़े बाजे बजाणे ओर स्तुति करने लगी रे। तेबे अतल्याह आपणे टाल्ले फाड़ी की आका पाणे लगी, "राजद्रोह, राजद्रोह!" 14 तेबे यहोयादा पुरोईते दलो रे अधिकारी सेनापतिया खे बारे ल्याई की बोलेया, "तेसा खे आपणी पाल़िया बीचा ते निकयाल़ी की लई जाओ ओर जो कोई एसा पीछे चलो, तेसखे तलवारी साथे काई देयो।" पुरोईते बोलेया, "एसा खे यहोवे रे मन्दरो रे नि काओ।" 15 तेबे तिने दुँईं तरफा ते तेसा खे जगा दित्ती ओर से राजमईलो रे कोड़ेया रे बड़े द्वारो तक गई ओर तिने से तेती काईती।

16 तेबे यहोयादे आपणे ओर सारी प्रजा रे ओर राजे बीचे यहोवे री प्रजा ऊणे री वाचा बणाई। 17 तेबे सबी लोके जाई की बाल देवते रा मन्दर टाल़ी ता ओर तेसरी बेदिया रे ओर मूर्तिया रे टुकड़े-टुकड़े करीते ओर मत्तान नाओं रा बालो रा पुरोईत बेदिया रे सामणे ई काई ता। 18 तेबे यहोयादे यहोवे रे मन्दरो री सेवा खे सेयो लेवीय पुरोईत ठराईते, जो दाऊदे यहोवे रे मन्दरो पाँदे दल-दल करी की इजी री खातर ठराए थे, ताकि जेड़ा मूसे रे बिधानो रे लिखी राखेया, तेड़े ई सेयो यहोवे खे होमबलि चढ़ाया करो ओर दाऊदो री चलाई री बिधिया रे मुताबिक खुशी करो ओर गाओ। 19 तिने यहोवे रे मन्दरो रे बड़े द्वारो पाँदे द्वारपाल इजी खे खड़े कित्ते, ताकि जो कोई किंयाँ बी अशुद्ध ओ, से पीतरे नि जाई सको। 20 से सेनापति ओर अमीर, प्रजा पाँदे राज करने वाल़े ओर देशो रे सारे लोका खे साथे लई की राजे खे यहोवे रे मन्दरो ते थाले लईगा ओर ऊच्चे बड़े द्वारो ते ऊई की राजमईलो रे आया ओर राजा राजगद्दिया पाँदे बठयाल़ेया। 21 तेबे सारे लोक खुश ऊए ओर यरूशलेम शईरो दे शान्ति ऊई। अतल्याह तो तलवारी साथे काईती री थी।