1 इना सबी गल्ला ओर एड़े प्रबन्दो ते बाद अश्शूरो रे राजा सन्हेरीबे आई की यहूदा दे प्रवेश करी की ओर किले वाल़े शईरा रे खलाफ डेरे लगाई की तिने सेयो आपणे फायदे खे लणे चाए। 2 ये देखी की कि सन्हेरीब नेड़े आई रा ओर यरूशलेम शईरो साथे लड़ना चाओआ, 3 हिजकिय्याहे आपणे परदान ओर सेनापतिया साथे सलाह् कित्ती कि शईरो ते बारे सूबल़ा खे पटवाई देयो ओर तिने तेसरी मताद कित्ती। 4 तेबे बऊत सारे लोक कट्ठे ऊए ओर ये बोली की कि, "अश्शूरो रे राजा कऊँ ऐती आओ ओर आई की बऊत सारा पाणी पाओ" तिने सारी सूबल़ा रोकी तिया ओर से नदी सुखाई ती जो देशो बीचे ऊई की बह्ओ थी। 5 तेबे हिजकिय्याहे याओ बानी की दवाल जेती-केथी टूटी थी, से तेती-तेती बणाई ओर से गुम्मटा रे बराबर ऊच्ची कित्ती ओर बारे एक ओर दवाल बणाई ओर दाऊदो रे शईरो रे मील्लो खे मजबूत कित्तेया ओर बऊत सारे अथियार ओर ढाला बी बणवाईया। 6 तेबे तिने प्रजा पाँदे सेनापति नियुक्त कित्ते ओर सेयो शईरो रे बड़े द्वारो रे कट्ठे कित्ते ओर ये बोली की तिना खे सब्र कराया, 7 "याओ बानो ओर मजबूत ओ, तुसे ना तो अश्शूरो रे राजे ते डरो ओर ना तेस साथली सारी पीड़ा ते ओर ना ई तुसा रा मन कच्चा ओ; कऊँकि जो आसा साथे, से बऊत बड़ा ए। 8 मतलब तेसरा साअरा तो माणूं ईए, पर आसा साथे, म्हारी मताद ओर म्हारी तरफा ते म्हारा यहोवा परमेशर ए।" तेबे प्रजा रे लोके यहूदा रे हिजकिय्याह राजे री गल्ला पाँदे परोसा राखेया।

9 इजी ते बाद अश्शूरो रा राजा सन्हेरीब जो सारी सेना समेत लाकीशो रे सामणे खड़ी रा था, तिने आपणे कर्मचारी यरूशलेम शईरो दे यहूदा रे राजा हिजकिय्याह ओर तिना सबी यहूदिया गे जो यरूशलेम शईरो रे थे ये बोलणे खे पेजे, 10 "अश्शूरो रा राजा सन्हेरीब बोलोआ कि तुसा खे केसरा परोसा ए जेते कि तुसे केरे दे यरूशलेम शईरो दे बैठी रे? 11 क्या हिजकिय्याह तुसा खे ये बोली की कि म्हारे यहोवा परमेशरो आसे अश्शूरो रे राजे रे आथो ते बचाणे, तुसा रा बेवकूफ नि बणांदा, ताकि तुसा खे पूखा-त्याया काओ? 12 क्या तिने हिजकिय्याहे ई तेसरी ऊच्ची जगा ओर बेदिया खे दूर करी की यहूदा ओर यरूशलेम शईरो खे आज्ञा नि दित्ती कि तुसे एक ई बेदिया सामणे माथा टेकणा ओर तूप बाल़ना? 13 क्या तुसा खे पता नि ए कि मैं ओर मेरे बुजुर्गे देशो-देशो रे सबी लोका साथे क्या-क्या कित्तेया? क्या तिना देशा री जातिया रे देवता किंयाँ बी आपणे देशो खे मेरे आथो ते बचाई सके? 14 जितणी जातिया रा मेरे बुजुर्गे सत्यानाश कित्तेया तिना रे सबी देवतेया बीचे एड़ा कुण था, जो आपणी प्रजा खे मेरे आथो ते बचायी सकेया? तेबे तुसा रा देवता तुसा खे मेरे आथो ते किंयाँ बचाई सकोआ? 15 एबे हिजकिय्याह तुसा खे ईंयाँ बेवकूफ या बईकाई नि सको ओर तुसे तेसरा परोसा नि करो, कऊँकि केसी जातिया रा या राज्य रा कोई देवता आपणी प्रजा खे ना तो मेरे आथो ते ओर ना मेरे बुजुर्गा रे आथो ते बचाई सकेया। ये पक्का ए कि तुसा रा देवता तुसा खे मेरे आथो ते नि बचाई सकदा।"

16 तिने इजी ते बी जादा तेसरे काम करने वाल़ेया री ओर परमेशर यहोवे री ओर तेसरे दास हिजकिय्याह री बेज्जती कित्ती। 17 तेबे तिने एक एड़ी चिट्ठी पेजी, जिदे इस्राएलो रे परमेशर यहोवे री निन्दा रिया यो गल्ला लिखी राखिया थिया, "जिंयाँ देशा-देशा री जातिया रे देवता आपणी-आपणी प्रजा खे मेरे आथो ते नि बचाई सके, तिंयाँ ई हिजकिय्याह रा देवता बी आपणी प्रजा खे मेरे आथो ते नि बचाई सकदा।" 18 ओर तिने जोरे की तिना यरूशलेमिया खे जो दवाला पाँदे बैठी रे थे, यहूदी पाषा रे आका पाईया, ताकि तिना खे डराई सको, जेते कि से शईरो खे लई लो। 19 तिने यरूशलेम शईरो रे परमेशरो री एड़ी चर्चा कित्ती कि से मानो तरतिया रे देशो-देशो रे लोका रे देवतेया रे बराबर ओ, जो माणूंए बणाई राखे।

20 तेबे इना घटणा रिया बजा ते राजा हिजकिय्याह ओर आमोसो रे पाऊ यशायाह नबीए दुँईं प्रार्थना कित्ती ओर स्वर्गो रिया तरफा खे दुहाई दित्ती। 21 तेबे यहोवे एक दूत पेजेया, जिने अश्शूरो रे राजे रे डेरेया रे सारे शूरवीर, परदान ओर सेनापति नाश कित्ते। तेबे अश्शूरो रा राजा शर्मिंदा ऊई की आपणे देशो खे वापस ऊईगा। ओर जेबे से आपणे देवते रे मन्दरो दे था, तेबे तेसरे आपणे पाऊए से तेथी तलवारी साथे काया। 22 ईंयाँ यहोवे हिजकिय्याह ओर यरूशलेम शईरो रे रणे वाल़े लोक अश्शूरो रे राजा सन्हेरीब ओर आपणे सारे दुश्मणा रे आथो ते बचाए ओर चऊँ कनारे तिना ते आगे चलेया। 23 तेबे बऊत सारे लोक यरूशलेम शईरो खे यहोवे खे पेंट ओर यहूदा रे राजा हिजकिय्याह खे कीमती चीजा ल्याऊणे लगे ओर तेस बखतो ते से सबी जातिया बीचे महान ऊईगा।

24 तिना दिना दे हिजकिय्याह एड़ा बमार ऊआ कि से मरने वाल़ा था, तेबे तिने यहोवे ते प्रार्थना कित्ती, तेबे तिने से ठीक करिता ओर तेस साथे गल्ला करी की तेसखे एक चमत्कार दखाया। 25 पर हिजकिय्याहे तेस उपकारो रा बदला नि दित्तेया, कऊँकि तेसखे कमण्ड ऊईगा था। इजी बजा ते तेसरा रोष तेस पाँदे ओर यहूदा ओर यरूशलेम शईरो पाँदे पड़केया। 26 तेबे हिजकिय्याह यरूशलेम शईरो रे सबी रणे वाल़ेया समेत आपणे मनो दे कमण्डो रिया बजा ते दीन ऊईगा, इजी बजा ते यहोवे रा गुस्सा तिना पाँदे हिजकिय्याह रे दिना दे नि पड़केया।

27 हिजकिय्याह खे बऊत ई तअन ओर महिमा मिली ओर तिने सूईना, चाँदी, मणिया, खुशबूदार द्रव्य, ढाला ओर सब प्रकारा रे बांके पांडेया खे राखणे खे पण्डार बणाए। 28 तेबे तिने नज्ज, नवां शराब ओर जैतूनो रे तेलो खे राखणे खे पण्डार बणाए ओर सबी प्रकारा रे डांगरा खे गवाईणी ओर पेडा-बाकरिया खे बी गवाईणी बणाईया। 29 तिने शईर बसाए ओर बऊत सारिया पेडा-बाकरिया ओर गायी-बल़दा री सम्पत्ति कट्ठी करी ली, कऊँकि परमेशरे तेसखे बऊत सारा तअन दित्तेया था। 30 तिने हिजकिय्याहे ई गीहोन नाओं री नदिया पाँदे सूबल बणाई की तेसा नदिया खे थालली तरफा खे दाऊदो रे शईरो री पच्छमा रिया तरफा खे सीदी पऊँचाई ओर से आपणे सारे कामो रे सफल ओ था। 31 तेबे बी जेबे बाबेलो रे परदाने तेसगे तेसरे देशो रे कित्ते रे अचम्बे रे कामा रे बारे रे पूछणे खे दूत पेजे, तेबे परमेशरे से इजी खे छाडीता, ताकि तेसरे मनो खे परखी की तेसरा सारा पेत जाणी लो।

32 हिजकिय्याह रे ओर काम ओर तेसरे पलाईया रे काम आमोसो रे पाऊ यशायाह नबीए रे दर्शण नाओं री कताबा दे ओर यहूदा ओर इस्राएलो रे राजेया रे इतियासो री कताबा दे लिखी राखे। 33 अन्तो रे हिजकिय्याह मरी की आपणे बुजुर्गा साथे मिलीगा ओर तेसखे दाऊदो री ल्वादा रे कब्रिस्तानो री चढ़ाईया पाँदे माट्टी दित्ती ओर सारे यहूदी ओर यरूशलेम शईरो रे रणे वाल़ेया तेसरी मौता पाँदे तेसरा आदर कित्तेया। तेबे तेसरा पाऊ मनश्शे तेसरी जगा पाँदे राज करने लगेया।