2 इतिआस 14

यहूदा दे आसा रा राज्य

1 अन्तो रे अबिय्याह मरी की आपणे बुजुर्गा साथे मिलीगा ओर तेसखे दाऊदो रे शईरो दे दबाईता ओर तेसरा पाऊ आसा तेसरी जगा पाँदे नवां राजा बणेया। एसरे दिना रे दस साल तक देशो रे शान्ति रई। 2 आसे सेई कित्तेया जो परमेशर यहोवे री नजरा रे ठीक था। 3 तिने पराई वेदिया ओर ऊच्ची जगा दूर कित्तिया ओर तिने सेयो पात्थर तोड़ी ते जिना खे लोक पवित्र समजो थे। 4 ओर तिने यहूदिया खे आज्ञा दित्ती कि आपणे बुजुर्गा रे परमेशर यहोवे खे टोल़ो ओर बिधान ओर आज्ञा खे मानो। 5 तेसरे कर्मचारिये यहूदा रे सारे शईरा री पाह्ड़िया री चूँडिया पाँदे बणी री पूजा री जगा ओर मूर्तिया खे तूप बाल़ने वाल़ी वेदिया नाश करी तिया। इजी बजा ते जेबे आसा यहूदा रे राज्य पाँदे राज करो था तेबे शान्ति थी। 6 तिने यहूदा रे किलेया वाल़े शईर बसाए, कऊँकि देशो रे चैन रया। तिना साला रे तेसखे केसी साथे लड़ाई नि करनी पड़ी, कऊँकि यहोवे तेसखे राम दित्तेया था। 7 तिने यहूदिया खे बोलेया, "आओ आसे इना शईरा खे बसाऊँए ओर तिना रे चऊँ कनारे दवाल, किले ओर बड़े द्वारो रे फल़े ओर बेड़े बणाऊँए; देश एबुए तक आसा सामणे पड़ी रा, कऊँकि आसे आपणे परमेशर यहोवे री टोल़ करी राखी आसे से टोल़ेया ओर तिने आसा खे चऊँ कनारा ते राम दित्तेया।" तेबे तिने सेयो शईर बसाए ओर मजबूत ऊए। 8 फेर आसा राजे गे ढाल ओर बड़छे राखणे वाल़ेया री एक सेना थी, मतलब यहूदा बीचा ते तो 300,000 सिपाई ओर बिन्यामीनिया बीचा ते ढाल राखणे वाल़े ओर धनुर्धारी 280,000 शूरवीर सिपाई थे।

9 तिना रे खलाफ 1,000,000 सिपाईया री सेना ओर 300 रथ लई की जेरह नाओं रा एक कूशी निकल़ेया ओर मारेशा तक आई गा। 10 राजा आसा आपणी सेना खे साथे लई की जेरह ते लड़ने खे गया। ओर मारेश शईरो रे नेड़े सापता नाओं री तराईया दे लड़ने खे आया। 11 तेबे आसे आपणे परमेशर यहोवे री दुहाई दित्ती, "ओ यहोवा! जिंयाँ तूँ तागतवरा री मताद करी सकेया, तिंयाँ ई तेसरी बी करेया जो कमजोर ए, ओ म्हारे यहोवा परमेशर! म्हारी मताद कर, कऊँकि म्हारा परोसा तां ई पाँदे ए ओर तेरे नाओं रा परोसा करी की आसे एसा पीड़ा रे खलाफ आई रे। ओ यहोवा, तूँ म्हारा परमेशर ए, माणूं तां पाँदे प्रबल नि ऊई सकदे।"

12 तेबे यहोवे कूशी लोक आसा राजा ओर यहूदिया सामणे काये ओर कूशी लोक नठीगे। 13 आसा राजा ओर तेस साथले लोके तिना रा पीछा गरारो तक कित्तेया ओर इतणे कूशी काये कि सेयो फेर सिर नि चकी सके, कऊँकि सेयो यहोवा ओर तेसरी सेना ते आरी गे ओर यहूदी बऊत सारी लूट लईगे। 14 तिने गरारो रे नेड़े-तेड़े रे सब शईर खत्म करीते, कऊँकि यहोवे रा डर तिना रे रणे वाल़ेया रे मनो रे समाई गा ओर तिने सेयो शईर लूटी ले, कऊँकि तिना रे बऊत सारा तअन था। 15 तेबे गवाईणी जीती की बऊत सारिया पेडा-बाकरिया ओर ऊँट लूटी की यरूशलेम शईरो खे वापस ऊईगे।