1 जेबे योआश राजा बणेया, तेबे से सात साला रा था ओर यरूशलेम शईरो दे चाल़ी साला तक राज करदा रया। तेसरी माया रा नाओं सिब्या था, जो बेर्शेबा शईरो री थी। 2 जदुओ तक यहोयादा पुरोईत जिऊँदा रया, तदुओ तक योआश से काम करदा रया जो यहोवे री नजरा रे ठीक ए। 3 यहोयादे तेसरे दो ब्या कराए ओर तेसरे माठे-बेटिया पैदा ऊए।

4 इजी ते बाद योआश राजे रे मनो दे यहोवे रे मन्दरो री मरम्मत करने री इच्छा ऊई। 5 तेबे तिने पुरोईत ओर लेविया खे कट्ठे करी की बोलेया, "हर साल यहूदा रे शईरो दे जाई-जाई की सबी इस्राएली लोका ते पैसे लया करो जेते कि तुसा रे परमेशरो रे मन्दरो री मरम्मत ओ; देखो, ये काम फटाफट करो।" तेबे बी लेविये कोई तेजी नि कित्ती। 6 तेबे राजे यहोयादा बड़े पुरोईतो खे बुलाई की पूछेया, "क्या बजा ए कि तैं लेविया खे सख्त ऊई की नि बोलेया कि सेयो यहूदा ओर यरूशलेम शईरो ते तेस चन्दे रा पैसा ली आओ जेतेरा नियम यहोवे रे दास मूसा ओर इस्राएलो री मण्डल़िए गवाईया री पर्चिया रिया तँईं चलाया था।" 7 एबे यहोवे रा मन्दर मरम्मत करने खे ऊईगा दा ए कऊँकि तेसा दुष्ट जवाणसा अतल्याह रे माठेया तो परमेशरो रा मन्दर तोड़ी ता ओर यहोवे रे मन्दरो रिया सब पवित्र कित्ती रिया चीजा बाल देवते री मूर्तिया खे देईतिया दिया ए।

8 राजे एक सन्दूक बनाणे री आज्ञा दित्ती ओर से यहोवे रे मन्दरो रे द्वारो गे बारे राखेया। 9 तेबे यहूदा ओर यरूशलेम शईरो रे ये प्रचार कित्तेया कि जेस चन्दे रा नियम परमेशरो रे दास मूसे उजाड़ जगा दे इस्राएलो रे लोका खे चलाया था, तिजी रे पैसे यहोवे रिया तँईं ली आओ। 10 तेबे सारे परदान ओर प्रजा रे सारे लोक खुश ऊई की पैसे ल्याई की जदुओ तक चन्दा पूरा नि ऊआ, तदुओ तक सन्दूको दे पाँदे रये। 11 जेबे-जेबे से सन्दूक लेविया रे आथो ते राजे रे परदाना गे पऊँचाया जाओ ओर ये लगो था कि तिदे पैसे जादा ए, तेबे-तेबे राजे रे परदान ओर बड़े पुरोईतो रे अधिकारी आई की सन्दूको खे खाली करो थे ओर तेबे तिजी खे फेर तेसरी जगा पाँदे ई राखी देयो थे। तिने हर रोज एड़ा ई कित्तेया ओर बऊत सारा पैसा कट्ठा कित्तेया। 12 तेबे राजे ओर यहोयादे से पैसा यहोवे रे मन्दरो रे काम करने वाल़ेया खे देईता ओर तिने राजमिस्त्रिया खे ओर मिस्त्रिया खे यहोवे रे मन्दरो खे सुदारने खे ओर ल्वार ओर पांडे बनाणे वाल़े यहोवे रे मन्दरो री मरम्मत करने खे मजदूरिया पाँदे राखे। 13 कारीगर काम करदे गये ओर काम पूरा ऊँदा गया ओर तिने परमेशरो रा मन्दर जेड़ा का तेड़ा बणाई की मजबूत करी ता। 14 जेबे तिने से काम पूरा करी ता, तेबे सेयो बाकी पैसा राजा ओर यहोयादा बड़े पुरोईतो गे लईगे ओर तिना पैसेया साथे परमेशरो रे मन्दरो रे पांडे बणाए, मतलब सेवा-टईल करने ओर होमबलि चढ़ाणे रे पांडे ओर तूपदान बगैरा सूईने-चाँदिए रे पांडे। जदुओ तक यहोयादा जिऊँदा रया, तदुओ तक यहोवे रे मन्दरो दे होमबलि हर रोज चढ़ाओ थे।

15 पर यहोयादा बड़ा पुरोईत स्याणा ऊईगा ओर लाम्बी उम्रा रा ऊई की मरी गा। जेबे से मरेया तेबे 130 साला रा था। 16 ओर दाऊदो रे शईरो दे राजेया बीचे से दबाईता, कऊँकि तिने इस्राएलो रे ओर परमेशरो रे ओर तेसरे मन्दरो रे बारे दे खरा कित्तेया था। 17 यहोयादो रे मरने ते बाद यहूदा रे परदाने राजे गे जाई की माथा टेकेया ओर राजे तिना री मानी। 18 तेबे सेयो आपणे पितरा रे परमेशर यहोवे खे छाडी की अशेरा ओर मूर्तिया री आराधना करने लगे। तेबे तिना रे एड़े दोषी ऊणे रिया बजा ते परमेशरो रा रोष यहूदा ओर यरूशलेम शईरो पाँदे पड़केया। 19 तेबे बी परमेशरे तिना गे नबी पेजे, ताकि तिना खे यहोवे रे नेड़े फेर ल्याओ ओर इने तिना खे बताईता, पर तिने सुणेया नि। 20 तेबे परमेशरो रा आत्मा यहोयादा पुरोईतो रे पाऊ जकर्याह रे समाया ओर से ऊच्ची जगा रे खड़े ऊई की लोका खे बोलणे लगेया, "परमेशर ईंयाँ बोलोआ कि तुसे परमेशरो री आज्ञा खे कऊँ टाल़ोए? एड़ा करी की तुसा रा पला नि ऊई सकदा। देखो, तुसे तो यहोवा छाडीता रा, इजी बजा ते तिने बी तुसे छाडी ते।" 21 तेबे लोके तेसरे खलाफ साजिशा रिया गल्ला बोली की, राजे री आज्ञा ते यहोवे रे मन्दरो रे आँगणो रे तेस पाँदे पात्थर बाए। 22 ईंयाँ योआश राजे से प्यार पूली की जो यहोयादे तेस साथे कित्तेया था, तेसरा पाऊ काया। मर्दे बखते तिने बोलेया, "परमेशर ई एतेरा बदला लओ।"

23 नया साल लगदे ई अरामिये रिये सेने तिना पाँदे अमला कित्तेया ओर यहूदा ओर यरूशलेम शईरो रे आई की प्रजा बीचा ते सारे परदान खत्म करीते ओर तिना रा सारा तअन लूटी की दमिश्क शईरो रे राजे गे पेजेया। 24 अरामिया री सेना थोड़े ई सेनिका साथे तो आई थी, पर यहोवे एक बऊत बड़ी सेना तिना रे आथो रे करी ती, कऊँकि तिने आपणे बुजुर्गा रा परमेशर छाडीता था। इजी बजा ते योआशो खे बी तिने सजा दित्ती।

25 जेबे सेयो तेसखे बऊत ई काईल करी की छाडी गे, तेबे तेसरे कर्मचारिये यहोयादा पुरोईतो रे पाऊआ रे खूनो रिया बजा ते तेसरे खलाफ साजिशा रिया गल्ला बोली की, से तेसरे बछौणे पाँदे ई एड़ा काया कि से मरी गा ओर तिने से दाऊदो रे शईरो दे दबाईता, पर राजेया रे कब्रिस्तानो रे नि। 26 जिने तेस साथे राजद्रोह री साजिश कित्ती, सेयो यो थे, मतलब अम्मोनी, शिमातो रा पाऊ जाबाद ओर शिम्रित, मोआबिनो रा पाऊ यहोजाबाद। 27 तेसरे पाऊआ रे बारे दे ओर तेसरे खलाफ, जो बड़े दण्डो री भविष्यबाणी ऊई, तिजी रे ओर परमेशरो रा मन्दर बणने रे बारे दे, यो सब गल्ला राजेया रे इतियासो री कताबा रे लिखी राखिया। तेबे तेसरा पाऊ अमस्याह तेसरी जगा पाँदे राजा बणेया।